ទិវាពិភពលោកនៃការបដិសេធទុរគតភាព ៖ វិបត្តិកូវីដរុញច្រានជនក្រីក្រឱ្យកាន់តែវេទនា
ថ្ងៃអាទិត្យទី ១៧ តុលានេះ ជាទិវាពិភពលោកនៃការបដិសេធទុរគតភាព។ ប៉ុន្តែដោយហេតុមហន្តរាយធម្មជាតិបង្កឡើងដោយការប្រែប្រួលអាកាសធាតុ និងវិបត្តិសុខាភិបាលបណ្តាលមកពីជំងឺរាតត្បាតកូវីដ១៩ មានប្រទេសជាច្រើនបានរអិលធ្លាក់កាន់លឿនទៅក្នុងជ្រោះនៃអស្ថិរភាពស្បៀងអាហារ។ ជនក្រីក្រស្រាប់កាន់ធ្លាក់ក្នុងទុគ៌តភាពកាន់ខ្លាំង ជាក់ស្តែង នៅប្រទេសឥណ្ឌា ប្រេស៊ីល ឬក្វាតេម៉ាឡា ...
ចុះផ្សាយនៅថ្ងៃ៖
ស្តាប់ - ០២:០៣
វិបត្តិកូវីដនិងការបិទខ្ទប់ប្រទេសដើម្បីទប់ស្កាត់ការរាតត្បាត ជះឥទ្ធិពលអាក្រក់ក្រៃ និងបានពន្លឿនភាពក្រីក្ររបស់ប្រជាពលរដ្ឋឥណ្ឌា។ ក្នុងរយៈពេលមួយឆ្នាំ ២០២០-២១ ពលរដ្ឋឥណ្ឌាចំនួន ២៣០លាននាក់ ពោលគឺម្នាក់ក្នុងចំណោម៦នាក់ បានធ្លាក់ខ្លួនក្នុងភាពក្រីក្រទុរគត។ នេះបើតាមការប៉ាន់ស្មានរបស់សាកលវិទ្យាល័យឯកជនឥណ្ឌា Azim Premji។ ពលរដ្ឋក្រីក្រស្រាប់ ធ្លាក់ក្នុងគ្រោះទុរ្ភិក្ស និងភាគច្រើនហូបមិនឆ្អែត។ បើតាមរបាយការណ៍ចេញផ្សាយកាលពីសប្តាហ៍មុន ឥណ្ឌាបានធ្លាក់ចំណាត់ថ្នាក់ប្រទេសជួបគ្រោះអត់ឃ្លានពីលេខ១០១ ទៅលេខ ១១៦ និងទៅនៅក្រោយប្រទេសបង់ក្លាដែលដែលក្រីក្រខ្លាំងជាងទៅទៀត។
ចំនួនប្រជាពលរដ្ឋឥណ្ឌាហូបមិនគ្រប់ (១/៦) កើនឡើងជាលើកទីមួយ ក្នុងរយៈពេល១៥ឆ្នាំមកនេះ។ ប៉ុន្តែមហាសេដ្ឋី១០០នាក់ដែលមានជាងគេបំផុតរបស់ឥណ្ឌា កើនទ្រព្យ៥០% ក្នុងរយៈពេលមួយឆ្នាំ។ មានន័យវិបត្តិកូវីដបានរំលេចឱ្យមានវិសមភាពសង្គមកាន់តែខ្លាំង។
វិបត្តិកូវីដក៏បានរុញច្រានប្រេស៊ីលឱ្យធ្លាក់ក្នុងភាពក្រីក្រកាន់តែខ្លាំងនិងកាន់តែច្រើន។ បើតាមការសិក្សារបស់បណ្តាញ Pensannជំនាញខាងសុវត្ថិភាពចំណីអាហារ ១០%នៃប្រជាពលរដ្ឋប្រេស៊ីលរស់ក្នុងភាពទុរគតបំផុត ជាងពាក់កណ្តាលមានជំងឺខ្វះអាហារ ឬបរិភោគមិនគ្រប់។
កាន់តែអណោចអធមទៀត ក្វាតាម៉ា ប្រទេសដ៏ក្រីក្របំផុតនៅអាមេរិកឡាទីន កំពុងជួបគ្រោះអស្ថិរភាពស្បៀងអាហារធ្ងន់ធ្ងរមិនធ្លាប់មានទេ។ ប្រជាពលរដ្ឋ១៦% មានគ្រោះខ្វះអាហារូបត្ថម្ភ ១៨%រស់ក្នុងអស្ថិរភាពស្បៀងអាហារធ្ងន់ធ្ងរ និងមធ្យម ជាង៤៥%។ បើតាមអង្គការសហប្រជាជាតិ កុមារក្វាតេម៉ាឡា ក្រោមអាយុ៥ឆ្នាំ ជិត៥០%មានជំងឺខ្វះអាហារូបត្ថម្ភរ៉ាំរ៉ៃ ៣៩នាក់បានស្លាប់ គិតចាប់តាំងពីខែមករាដើមឆ្នាំមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ