សមត្ថកិច្ចឡាវចាប់ឃាត់គ្រឿងញៀនដ៏ច្រើនបំផុតមិនធ្លាប់មាន តម្លៃជាង៥៥លានដុល្លារ
យោងតាមទីភ្នាក់ងារអង្គការសហប្រជាជាតិ ទទួលបន្ទុកការប្រយុទ្ធប្រឆាំងគ្រឿងញៀន បានឲ្យដឹងកាលពីថ្ងៃព្រហស្បតិ៍ ទី២៨តុលា ថាសមត្ថកិច្ចឡាវ បានចាប់ឃាត់គ្រឿងញៀន ក្នុងតម្លៃជាង៥៥លានដុល្លារ។ នេះគឺជាទំហំគ្រឿងញៀន ដែលត្រូវបានចាប់ឃាត់ ធំបំផុតមិនធ្លាប់មានទេ នៅតំបន់អាស៊ី។
ចុះផ្សាយនៅថ្ងៃ៖
ស្តាប់ - ០២:៣១
ថ្នាំគ្រាប់មេតំហ្វេតាមីន រួមទាំងមេតំហ្វេតាមីនគ្រីស្តាល់ ចំនួន១៥៣៧គីឡូក្រាម ត្រូវបានអាជ្ញាធរឡាវចាប់ឃាត់បាន នៅថ្ងៃទី២៨តុលា ។ គ្រឿងទាំងនេះ មានតម្លៃគិតជាទឹកប្រាក់ ប្រមាណ ៥៥លាន ៦សែនដុល្លារ ដែលជាទំហំច្រើនបំផុត មិនធ្លាប់មានទេ ក្នុងប្រតិបត្តិការប្រឆាំងគ្រឿងញៀននៅអាស៊ី។ នេះបើផ្អែកតាមការបញ្ជាក់ ពីលោក Jeremy Douglas តំណាងទីភ្នាក់ងារប្រយុទ្ធប្រឆាំងគ្រឿងញៀន នៃអង្គការសហប្រជាជាតិ (ONUDC) ប្រចាំតំបន់អាស៊ី ។ ការចាប់ឃាត់លើកនេះ គឺគ្រឿងញៀន ថ្នាំគ្រាប់មេតំហ្វេតាមីន មានទំហំលើសការចាប់ឃាត់សរុបក្នុងឆ្នាំកន្លងទៅ ដល់ទៅ៣ដង នៅក្នុងប្រទេសឡាវ រីឯមេតំហ្វេតាមីនគ្រីស្តាល់ លើសមួយភាគ៣។
សូមបញ្ជាក់ថា ការចាប់ឃាត់ថ្នាំញៀន ដ៏ច្រើនបំផុតមិនធ្លាប់មាន ធ្វើឡើងដោយសមត្ថកិច្ចឡាវនេះ គឺបានកើតឡើង នៅខេត្តបូកែវ ស្ថិតនៅចំចំណុចកណ្តាលនៃតំបន់ត្រីកោនមាស។ ថ្នាំញៀន ត្រូវបានគេបន្លំដាក់ក្នុងរថយន្តកាមីញ៉ុង ដែលអ្នកបើកបរអះអាងថា ដឹកស្រាបៀរ « BeerLao »។
យោងតាមការចុះផ្សាយរបស់បណ្តាញព័ត៌មានក្នុងស្រុកឡាវ ក្រោយការឃាត់ខ្លួនសួរនាំ អ្នកបើកបររថយន្តនោះ បានចង្អុរបង្ហាញផ្ទះមួយនៅមិនក្បែរនោះ ហើយសមត្ថកិច្ចបានឈានទៅ ចាប់ឃាត់ខ្លួនមនុស្ស២នាក់។ ដោយឡែក ក្រុមហ៊ុនស្រាបៀរ Lao Brewery បានចេញលិខិតប្រកាសមួយ អះអាងថា ក្រុមហ៊ុនខ្លួន មិនពាក់ព័ន្ធអ្វីទាំងអស់ ទៅនឹងករណីនេះ ហើយរថយន្តដែលសមត្ថកិច្ចចាប់ឃាត់ ក៏មិនមានចុះបញ្ជីនៅក្នុងក្រុមហ៊ុនខ្លួនដែរ។
គួរបញ្ជាក់ថា តំបន់ត្រីកោនមាស ព្រំដែនរវាងភូមា ថៃ នឹងឡា គឺជាជង្រុកផលិតគ្រឿងញៀន ដ៏ធំបំផុតនៅអាស៊ីអាគ្នេយ៍។ គ្រឿងញៀនកែច្នៃ បានក្លាយជាប្រភពចំណូលដ៏សំខាន់ នៃបណ្តាញឧក្រិដ្ឋកម្មនៅភូមា ព្រមទាំងក្រុមប្រដាប់អាវុធជនជាតិភាគតិច ដែលរស់នៅក្បែរព្រំដែនឡាវ និង ថៃ។
ថ្នាំញៀនមេតំហ្វេតាមីន ជាគ្រីស្តាល់ ដែលមានកម្លាំងឥទ្ធពលខ្លាំងបំផុតនោះ គឺត្រូវបានគេចែកចាយ ទៅតាមទីផ្សាយឯនាយសមុទ្រឆ្ងាយៗ ដើម្បីលក់បានតម្លៃថ្លៃ ដូចជានៅអូស្ត្រាលី និងជប៉ុនជាដើម។ ហើយបើទោះបីជាពិភពលោកជួបបញ្ហាកូវីដ តែចរាចរណ៍គ្រឿងញៀនប្រភេទនេះ ហាក់មិនបានចុះថយទេ។
នៅភូមា មួយផ្នែកធំនៃរដ្ឋស្ហាន មិនស្ថិតក្រោមការគ្រប់គ្រង របស់រដ្ឋាភិបាលរបបសិកភូមាទេ។ ចំណែកនៅខាងថៃវិញ អាជ្ញាធរបានបានបន្ថែមការតាមដាន យ៉ាងសកម្មនៅតាមបណ្តោយព្រំដែន ជាមួយភូមា និងឡាវ តាំងតែពីផ្ទុះវិបត្តិកូវីដមក ដើម្បីទប់ស្កាត់ការឆ្លងរាលដាលមេរោគ មកពីប្រទេសក្បែរខាងទាំង២នេះ។ នៅក្នុងរបាយការណ៍ចុងក្រោយ កាលពីខែមិថុនា អង្គការសហប្រជាជាតិ បានលើកឡើងថា ទីផ្សារថ្នាំញៀនមេតំហ្វេតាមីន នៅអាស៊ីអាគ្នេយ៍ បានរីកធំជាលំដាប់។ រដ្ឋស្ហាន របស់ប្រទេសភូមា គឺជាប្រភពដ៏ធំនៃថ្នាំញៀនប្រភេទនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ