សិង្ហបុរី៖ និពន្ធនាយកបណ្តាញព័ត៌មាន The Online Citizen ប្រឈមនឹងទោសជាប់ពន្ធនគារ២ឆ្នាំ ពីបទបរិហារកេរ្តិ៍
លោក Terry Xu និពន្ធនាយកបណ្តាញព័ត៌មានឯករាជ្យមួយនៅសិង្ហបុរី ឈ្មោះ The Online Citizen ត្រូវបានតុលាការសិង្ហបុរី សម្រេចទទួលស្គាល់ទោស ពីបទបរិហារកេរ្តិ៍ ធ្វើទៅលើរដ្ឋមន្ត្រីមួយចំនួន នៃរដ្ឋាភិបាល។ ការសម្រេចនេះ ត្រូវបានក្រុមសកម្មជនសិទ្ធិមនុស្ស ចាត់ទុកថាវាគឺជាការបន្ត វិធានការធ្វើបាប និងបំបិទសិទ្ធិសេរីភាពសារព័ត៌មាន បន្ទាប់ពីបណ្តាញព័ត៌មាន The Online Citizen ត្រូវបានអាជ្ញាធរសិង្ហបុរី ដកហូតអាជ្ញាបណ្ណ កាលពីចុងខែតុលា។
ចុះផ្សាយនៅថ្ងៃ៖
ស្តាប់ - ០២:៤៧
នៅឆ្នាំ២០១៨ គេហទំព័រ The Online Citizen បានចុះផ្សាយលិខិតមួយ ដែលមានខ្លឹមសារចោទប្រកាន់ រដ្ឋមន្ត្រីធំៗមួយចំនួន នៃរដ្ឋាភិបាលសិង្ហបុរី ថាបានធ្វើអំពើពុករលួយ។ លោក Terry Xu និពន្ធនាយកគេហទំព័រ ព័ត៌មានឯករាជ្យនេះ អាចប្រឈមនឹងទោសជាប់ពន្ធនាគារ២ឆ្នាំ ព្រមទាំងត្រូវបង់ប្រាក់ពិន័យ ពីបទបានអនុញ្ញាត ឲ្យមានការផ្សព្វផ្សាយលិខិត ដែលមានខ្លឹមសារបរិហារកេរ្តិ៍នេះ។ សវនាកាសម្រេចទោស នឹងត្រូវធ្វើនៅខែធ្នូ។
ដោយឡែក លោក Daniel De Costa Augustin អាយុ៣៨ឆ្នាំ ដែលជាអ្នកសរសេលិខិតនេះ ត្រូវបានតុលាការសិង្ហបុរី សម្រេចទទួលស្គាល់ កាលពីថ្ងៃទី១២វិច្ឆិកា ថាបានធ្វើអំពើបរិហារកេរ្តិ៍ និងបានបំពានច្បាប់ប្រឆាំងបទល្មើសបច្ចេកវិទ្យា តាមរយៈការផ្ញើឯកសារចេញពីគណនីមួយ ដែលមិនមែនជារបស់ខ្លួន ដោយគ្មានការអនុញ្ញាត។
យ៉ាងណាក៏ដោយ រដ្ឋអាជ្ញាសិង្ហបុរី បានអះអាងថា សំណុំរឿងនេះ វាមិនមានពាក់ព័ន្ធអ្វី ជាមួយសិទ្ធិសេរីភាពបញ្ចេញមតិអ្វីនោះទេ ហើយក៏មិនមែនដូចពាក្យគេចោទ ថារដ្ឋាភិបាលចង់សងសិក ធ្វើបាបលើបណ្តាញព័ត៌មាននេះដែរ។ រដ្ឋអាជ្ញា អះអាងថាសំណុំរឿងនេះ ផ្តោតសំខាន់តែទៅលើចំណុចគតិយុត្តិ ថាតើមនុស្សម្នាក់ អាចប្រើប្រាស់គេហទំព័រ ឬបណ្តាញបច្ចេកវិទ្យាមួយ ដើម្បីផ្សព្វផ្សាយលិខិត ដែលចោទប្រកាន់ បែបបរិហារកេរ្តិ៍ ដោយគ្មានមូលដ្ឋានភស្តុតាងដែរឬទេ។
លោក Terry Xu បាន ប្រាប់អ្នកកសែតAFP ថាលោកខកចិត្តខ្លាំងណាស់ ចំពោះសេចក្តីសម្រេចរបស់តុលាការ។ លោកបានអះអាងថា នៅក្នុងលិខិតដែលគេហទំព័រលោកបានចុះផ្សាយ គឺមិនបានចោទទៅលើ ឈ្មោះរដ្ឋមន្ត្រី ឬសមាជិករដ្ឋាភិបាលណាម្នាក់ ដោយចំពោះនោះទេ។ លោកថ្លែងថាលោកនឹងប្តឹងទាស់ ទៅសាលាឧទ្ធរណ៍។
គួរកត់សំគាល់ថា បរិយាកាសសេរីភាពសារព័ត៌មាននៅសិង្ហបុរី នាប៉ុន្មានសប្តាហ៍ចុងក្រោយនេះ ហាក់មានភាពច្របូកច្របល់តានតឹងណាស់។ កាលពីខែកញ្ញា លោក Terry Xu ត្រូវបានតុលាការផ្តន្ទាទោស ឲ្យបង់ប្រាក់ពិន័យម្តងរួចហើយ នៅក្នុងសំណុំរឿងបរិហារកេរ្តិ៍ លោកនាយករដ្ឋមន្ត្រី លី សៀនឡុង។ ហើយកាលពីចុងខែតុលា គេហទំព័រ The Online Citizen ត្រូវបានអាជ្ញាធរសិង្ហបុរី ដកហូតអាជ្ញាបណ្ណផ្សព្វផ្សាយ ដោយចោទថាគេហទំព័រនេះ មិនបានបង្ហាញពីប្រភពថវិកា។ ការផ្តន្ទាទោសពីបទបរិហារកេរ្តិ៍ មួយបន្ថែមទៀត មកលើនិពន្ធនាយកគេហទំព័រនេះ ត្រូវបានគេមើលឃើញថា អាជ្ញាធរសិង្ហបុរី កំពុងតែរិតបន្តឹងកណ្តាប់ដៃ សង្កត់លើបណ្តាញព័ត៌មានឯករាជ្យ។ បណ្តាញព័ត៌មានសិង្ហបុរី គឺគ្របដណ្តប់ដោយបណ្តាញដែលគាំទ្ររដ្ឋាភិបាល។ ក្នុងតារាងចំណាត់ថ្នាក់សេរីភាពសារព័ត៌មាន សិង្ហបុរីជាប់លេខរៀងទី ១៦០ ក្នុងចំណោមប្រទេសទាំងអស់ ១៨០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ