កីឡាការនីតេនីសចិន ផឹង ស្ហយ បង្ហាញខ្លួនជាសាធារណៈជាលើកទី១ ក្រោយបាត់ខ្លួនជិត២សប្តាហ៍
នៅថ្ងៃអាទិត្យទី២១ វិច្ឆិកានេះ គេឃើញកីឡាការនីតេនីស ផឹង ស្ហយ បានបង្ហាញខ្លួនជាសាធារណៈ នៅក្នុងកម្មវិធីប្រកួតតេនីសកុមារមួយ នៅក្រុងប៉េកាំង។ នេះបើយោងតាមរូបភាពដែលផ្សព្វផ្សាយលើគណនីWeiboផ្លូវការ នៃការប្រកួត។ ការបង្ហាញវត្តមានជាលើកទី១នេះ គឺបន្ទាប់ពីមានការស្រែកអំពាវនាវ ពីសំណាក់ពិភពកីឡាអន្តរជាតិ និងសហគមអន្តរជាតិផង ថាឲ្យអាជ្ញាធរចិន ត្រូវតែបង្ហាញភស្តុតាងជាក់ច្បាស់ ថាកីឡាការនីរូបនេះ ពិតជាស្ថិតនៅទីកន្លែងមានសុវត្ថិភាព។ កីឡាការនី ផឹង ស្ហយ បានបាត់ដំណឹងឈឹងសូន្យ ប្រមាណជិត២សប្តាហ៍ ក្រោយពេលដែលនាងបានចោទ លោកចាង កៅលី អតីតឧបនាយករដ្ឋមន្ត្រីចិន ពីបទបំពារបំពានផ្លូវភេទ។
ចុះផ្សាយនៅថ្ងៃ៖
ស្តាប់ - ០៣:០៥
គណនីWeiboផ្លូវការ របស់China Open បានបង្ហោះរូបភាពប៉ុន្មានសន្លឹក បង្ហាញពីវត្តមានរបស់ កីឡាការនី ផឹង ស្ហយ (Peng Shuai) នៅក្នុងកម្មវិធីប្រកួតកីឡាតេនីសកុមារ Fila Kids Junior Tennis Challenger Finals នៅទីក្រុងប៉េកាំង។
រីឯគណនីTwitter របស់លោក Hu Xijin និពន្ធនាយកកាសែតGlobal Times ក៏បានបង្ហោះវីដេអូមួយផងដែរ នៃកម្មវិធីនេះ ដោយគេឃើញកីឡាការនី ផឹង ស្ហយ កំពុងឈរកណ្តាលចំណោមមនុស្ស ខណៈមានការសម្លេងប្រកាសឈ្មោះភ្ញៀវកិត្តិយស អមដោយសំឡេងទះដៃកងរំពង។ អ្នកកាសែត Global Times ម្នាក់ទៀត បានបង្ហោះវីដេអូ លើ Twitter ដែរ ដែលគេឃើញ កីឡាការនី ផឹង ស្ហយ កំពុងចុះហត្ថលេខាឲ្យក្មេងៗ និងថតរូបជាមួយពួកគេ នៅក្នុងពហុកីលាដ្ឋានមួយ ដែលទំនងដូចជាទីតាំងតែមួយ។
បន្ថែមពីនេះ នៅវេលាល្ងាចថ្ងៃសៅរ៍ លោក Hu Xijin ដែលគេដឹងថាជាមនុស្សស្និទ្ធនឹងរដ្ឋាភិបាលចិននោះ បានបង្ហោះវីដេអូចំនួន២ទៀត បង្ហាញឲ្យឃើញ កីឡាការនី ផឹង ស្ហយ កំពុងទទួលទានអាហារជាមួយ គ្រូបង្វឹក និងមិត្តភក្តិរបស់នាង នៅក្នុងភោជនីយដ្ឋានមួយ ក្នុងក្រុងប៉េកាំង។
យ៉ាងណាក៏ដោយ បណ្តាញព័ត៌មានបារាំង AFP មិនអាចមានលទ្ធភាពពិនិត្យជាក់ច្បាស់ អំពីប្រភព ទីតាំង និងកាលបរិច្ឆេទ នៃរូបថត ក៏ដូចជាវីដេអូ ដែលគេបង្ហោះផ្សាយទាំងនេះទេ។ នៅក្នុងវីដេអូ ដែលមានសំឡេងមនុស្សអ៊ូអរ បុរសម្នាក់ដែលអង្គុយទល់មុខកីឡាការនី ផឹង ស្ហយ បាននិយាយថា « ថ្ងៃអាទិត្យស្អែកនេះគឺជាថ្ងៃ ២០វិច្ឆិកា » មុននឹងស្ត្រីម្នាក់អង្គុយក្បែរនោះ កាត់សំដីថា « ទេ! ថ្ងៃអាទិត្យស្អែក គឺជាថ្ងៃទី ២១វិច្ឆិកា »។ ការឆ្លងឆ្លើយគ្នានេះ មានលក្ខណៈជាការរៀបចំឆាកល្ខោន ខណៈវីដេអូនេះ ត្រូវបានថតដោយទូរស័ព្ទដៃរបស់មនុស្សម្នាក់ទៀត ដែលគេមិនស្គាល់អត្តសញ្ញាណ។
លោក Steve Simon អគ្គនាយក WTA បានចេញលិខិតប្រកាស កាលពីថ្ងៃសៅរ៍ថា វាជាដំណឹងល្អមួយ បន្ទាប់ពីលោកបានឃើញវីដេអូ បង្ហាញវត្តមានរបស់កីឡាការនីផឹង ស្ហយ។ តែយ៉ាងណាលោកអះអាងថា វាមិនគ្រប់គ្រាន់ទេ ព្រោះវីដេអូទាំងនេះ មិនអាចបញ្ជាក់ថា កីឡាការនីរូបនេះមានសិទ្ធិសេរីភាព អាចទៅណាមកណា ឬអាចសម្រេចអ្វីមួយដោយខ្លួនឯងបាននោះទេ។
សូមរំលឹកថា កីឡាការនីតេនីស ផឹង ស្ហយ អាយុ៣៥ឆ្នាំ អតីតជើងឯកលេខ១ពិភពលោក បានសរសេរសារលើទំព័រ Weibo កាលពីថ្ងៃទី២វិច្ឆិកា ចោទលោក ចាង កៅលី អតីតឧបនាយករដ្ឋមន្ត្រីចិន ថាបានចាប់បង្ខំរួមភេទមកលើរូបនាង។ ក្រោយការសរសេរសារនេះ នាងបានបាត់ដំណឹងឈឹងសូន្យ និងបានបង្កឲ្យមានការតវ៉ា អំពាវនាវ ពីសំណាក់ពិភពកីឡា និងសហគមអន្តរជាតិ ដែលទាមទារឲ្យអាជ្ញាធរចិន បង្ហាញភស្តុតាង ថានាងពិតជាមានសុវត្ថិភាព។ អគ្គនាយក WTA បានគំរាមថា នឹងផ្តាច់កិច្ចសន្យាជាមួយចិនទាំងអស់ មិនឲ្យចិនចូលរួមក្នុងការប្រកួតតេនីសអន្តរជាតិ ប្រសិនបើគ្មានដំណឹងជាក់ច្បាស់ណាមួយ ពីសុវត្ថិភាពរបស់កីឡាការនី ផឹង ស្ហយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ