WTA នៅតែព្រួយបារម្ភខ្លាំង ពីសិទ្ធិសេរីភាពរបស់កីឡាការនីតេនីសចិន ផឹង ស្ហយ
កីឡាការនីតេនីសចិនដ៏ល្បី ឈ្មោះ ផឹង ស្ហយ បានបាត់ខ្លួនប្រមាណជិត២សប្តាហ៍ បន្ទាប់ពីនាងបានសរសេរសារ លើបណ្តាញសង្គម រៀបរាប់ថានាងត្រូវបានលោក ចាង កៅលី អតីតឧបនាយករដ្ឋមន្ត្រីចិន បំពារបំពានផ្លូវភេទ។ បន្ទាប់ពីមានអន្តរាគមន៍ អំពាវនាវ ពីសហគមអន្តរជាតិ និងពិភពកីឡាអន្តរជាតិ កាលពីសប្តាហ៍មុននេះ គឺឃើញកីឡាការនីរូបនេះ បានបង្ហាញខ្លួនជាសាធារណៈឡើងវិញ។ ក៏ប៉ុន្តែ សមាគមតេនីស្តស្ត្រី WTA នៅតែបង្ហាញការព្រួយបារម្ភខ្លាំង ស្តីអំពីសិទ្ធិសេរីភាព របស់កីឡាការនីចិនរូបនេះ។
ចុះផ្សាយនៅថ្ងៃ៖
ស្តាប់ - ០២:៤០
សមាគមតេនីសស្ត្រី WTA បានលើកឡើង កាលពីថ្ងៃទី២៧វិច្ឆិកាថា គេនៅតែមានការព្រួយបារម្ភខ្លាំង ទាន់ទិននឹងសិទ្ធិសេរីភាព របស់កីឡាការនី ផឹង ស្ហយ។ យោងតាមអ្នកនាំពាក្យសមាគមនេះ គឺលោក Steve Simon ដែលជាប្រធានសមាគម បានសាកល្បងទាក់ទង ទៅកីឡាការនី ផឹង ស្ហយ ដោយវិធីផ្សេងៗ តួយ៉ាងដូចជាតាមរយៈសារអ៊ីមែលជាដើម។ អ្នកនាំាពាក្យ WTA អះអាងថា បើពិនិត្យលើចម្លើយតបមកវិញ វាច្បាស់ណាស់ ដែលថាកីឡាការនី ផឹង ស្ហយ កំពុងរងសំពាធឥទ្ធិពល ពីអ្នកផ្សេង។
គួររំលឹកថា កីឡាការនីតេនីសចិន វ័យ៣៥ឆ្នាំ ឈ្មោះផឹង ស្ហយ បានបាត់ខ្លួន បន្ទាប់ពីនាងបានសរសេរសារបង្ហោះតាមបណ្តាញ Weibo កាលពីថ្ងៃទី២វិច្ឆិកា ថានាងត្រូវបានលោក ចាង កៅលី អតីតឧបនាយករដ្ឋមន្ត្រីចាប់បង្ខំឲ្យរួមភេទ។ ក្រោយការបង្ហោះសារនេះ នាងបានបាត់ខ្លួនប្រមាណ២សប្តាហ៍ មិននឹងបានលេចមុខមកវិញ កាលពីថ្ងៃសៅរ៍សប្តាហ៍មុន បន្ទាប់ពីសហគមអន្តរជាតិ និងពិភពកីឡា បានរួមគ្នាអំពាវនាវ និងដាក់សំពាធលើអាជ្ញាធរចិន។
កាលពីថ្ងៃអាទិត្យ កីឡាការនី ផឹង ស្ហយ បានជួបនិយាយតាមប្រព័ន្ធវីស៉្យូខុនហ្វឺរិនស៍ ជាមួយលោក Thomas Bach ប្រធានគណកម្មាធិការអន្តរជាតិកីឡាអូឡាំពិក។ យោងតាមលោកម្នាក់នេះ គឺនាង ផឹង ស្ហយ បានអះអាងប្រាប់លោកថា នាងសុខសប្បាយ និងកំពុងស្ថិតនៅគេហដ្ឋាន នៅក្នុងប៉េកាំង ហើយនាងសំណូមពរឲ្យគ្រប់គ្នា គោរពជីវិតឯកជនរបស់នាង។
តែយ៉ាងណា ដោយយោងលើភាសានិយាយស្តី ព្រមទាំងលក្ខណៈនៃការបង្ហាញខ្លួន របស់នាង ផឹង ស្ហយ បានធ្វើឲ្យគណកម្មាធិការអូឡាំពិក មិនអាចទុកចិត្តបានទេ។ គេជឿថា កីឡាការនីរូបនេះ កំពុងរងសំពាធ ឬស្ថិតក្រោមការយាមតាមដាន ពីសំណាក់អាជ្ញាធរចិន។
ដោយឡែក កាលពីថ្ងៃអង្គារ លោក Zhao Lijian អ្នកនាំពាក្យក្រសួងការបរទេសចិន បានចេញមុខនិយាយជាលើកទីមួយ ទាក់ទិននឹងបញ្ហានេះ ដោយលោកលើកឡើងថា ករណីកីឡាការនី ផឹង ស្ហយ វាមិនមានអ្វីពាក់ព័ន្ធនឹងនយោបាយការទូតនោះទេ។ លោកបានសំណូមពរ ឲ្យឈប់យកបញ្ហានេះ មកមួរបង្កាច់ បង្ខូចកិត្តិយស ប្រឆាំងរដ្ឋាភិបាលចិនតទៅទៀត។
តែយ៉ាងណាក៏ដោយ សហភាពអឺរ៉ុប បានប្រកាសកាលពីថ្ងៃពុធថា អាជ្ញាធរចិនត្រូវតែបង្ហាញភស្តុតាងជាក់ច្បាស់ និងឯករាជ្យ ថាកីឡាការនី ផឹង ស្ហយ ពិតជាសុខសប្បាយ និងមានសិទ្ធិសេរីភាពដើរហើរ ទៅណាមកណាជាធម្មតា។ ដូចគ្នាដែរ សមាគមWTA ដែលជាអ្នកចាត់ចែងរៀបចំការប្រកួតកីឡាតេនីសស្ត្រី ទូទាំងពិភពលោក បានអះអាង ដរាបណានៅគ្មានភស្តុតាងគួរឲ្យទុកចិត្ត គឺគេនៅតែបន្តតាមជជីកសួរ រដ្ឋាភិបាលចិនជានិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ