ឡាវបើកសម្ពោធខ្សែរថភ្លើងទីមួយរបស់ខ្លួន ដែលចិនឲ្យប្រាក់ខ្ចីវិនិយោគ
ថ្ងៃសុក្រទី៣ធ្នូនេះ ប្រទេសឡាវបានបើកសម្ពោធ ដាក់ឲ្យប្រើប្រាស់ ខ្សែរថភ្លើងទីមួយរបស់ខ្លួន។ ជាបណ្តាញផ្លូវដែក ដែលចិនបានផ្តល់ប្រាក់វិនិយោគ ប្រមាណជិត៦ពាន់លានដុល្លារ ហើយក៏ជាផ្នែកមួយ នៃគម្រោងផ្លូវមួយខ្សែក្រវ៉ាត់មួយរបស់ចិនផងដែរ។ ទឹកប្រាក់ដ៏សន្ធឹកសន្ធាប់នេះ នឹងបន្ថែមទំងន់ បំណុលរបស់ប្រទេសឡាវ ចំពោះចិន ខណៈចិនអះអាងថា ខ្សែរថភ្លើងនេះ នឹងជួយជ្រោងសេដ្ឋកិច្ចឡាវ ឲ្យលូតលាស់ឡើង។
ចុះផ្សាយនៅថ្ងៃ៖
ស្តាប់ - ០២:២៩
ផ្លូវរថភ្លើងប្រវែង ១០៣៥គីឡូម៉ែត្រ ពីក្រុងគុនមីងប្រទេសចិន ឆ្លងកាត់ជ្រលងដងភ្នំ មកដល់ទីក្រុងវៀងចន្ទ ប្រទេសឡាវ ត្រូវបានបើកសម្ពោធ នៅថ្ងៃសុក្រ ទី៣ធ្នូ ដោយមានវត្តមានរបស់លោកប្រធានាធិបតីចិន ស៊ី ជីនពីង ថ្លែងសារពីចំងាយ។
គម្រោងវិនិយោគរបស់ចិន ដែលមានតម្លៃទឹកប្រាក់ ប្រមាណជិត៦ពាន់លានដុល្លារនេះ គឺជាផ្នែកមួយនៃគម្រោងផ្លូវមួយខ្សែក្រវ៉ាត់មួយរបស់ចិន។ ចិនចង់ភ្ជាប់ខ្សែរថភ្លើងពីខេត្តយូណានរបស់ខ្លួន ទៅដល់សង្ហបុរី ដោយឆ្លងកាត់ ឡាវ ថៃ និងម៉ាឡេស៊ី។ លោក Wang Wenbin អ្នកនាំពាក្យម្នាក់នៃក្រសួងការបរទេសចិន បានអះអាងថា ខ្សែរថភ្លើងនេះ នឹងជួយជ្រោងសេដ្ឋកិច្ចឡាវ ដែលជាប្រទេសក្រីក្រជាងគេក្នុងតំបន់អាស៊ីអាគ្នេយ៍ ឲ្យស្ទុះរីកចម្រើនឡើង។
គួរបញ្ជាក់ថា ថ្វីបើអ្នកជំនាញបានទទួលស្គាល់ ពីលទ្ធភាពនៃការទទួលបានផលវិជ្ជមានខ្លះ ពីខ្សែរថភ្លើងនេះ តែគេកំពុងបារម្ភថាតើ ឡាវអាចទ្រាំទ្រ សងបំណុលចំនួនជាង១ពាន់លានដុល្លារ ឲ្យចិនរួចដែរឬទេ ព្រោះថាឡាវមានហេដ្ឋារចនាសម្ព័ន្ធសេដ្ឋកិច្ច ទន់ខ្សោយណាស់។ ធនាគារពិភពលោក បានផ្តល់អនុសាសន៍ ឲ្យរដ្ឋាភិបាលឡាវ ត្រូវតែធ្វើកំណែទម្រង់សំខាន់ច្រើនចំណុច ជាក់ស្តែងការរៀបចំប្រព័ន្ធគ្រប់គ្រងព្រំដែន ទើបអាចទាញផលចំណេញពីខ្សែរថភ្លើងនេះបាន។
យ៉ាងណាក៏ដោយ លោក Greg Raymond សាស្ត្រាចារ្យ នៅ Australian National University បានលើកឡើងថា អំពើពុករលួយ កង្វះតម្លាភាព គឺជាវិបត្តិធំនៅឡាវ។ សេដ្ឋកិច្ចឡាវ រំពឹងខ្លាំងលើកសិកម្ម ហើយប្រជាជនឡាវ មានចំណូលមធ្យម ត្រឹមតែ១១០ដុល្លារក្នុងមួយខែប៉ុណ្ណោះ។ លោកអះអាងថា សេដ្ឋកិច្ចឡាវអាចនឹងអាច ទទួលបានផលវិជ្ជមានពីខ្សែរថភ្លើងនេះទេ។
គួរបញ្ជាក់ថា ខ្សែរថភ្លើងនេះ ឆ្លងកាត់ប្រទេសឡាវ ប្រវែង ៤១៤គីឡូម៉ែត្រ ដោយចំណាយពេលសាងសង់ ប្រមាណ៥ឆ្នាំ ជាមួយនឹងសំណង់រូងក្រោមភ្នំចំនួន៧៥ និងស្ពានចំនួន១៦៧។ គម្រោងសាងសង់នេះ បានប៉ះពាល់ផងដែរទៅលើប្រជាជនឡាវ ចំនួនប្រមាណ៤៤០០គ្រួសារ ដែលត្រូវរដ្ឋរឹបអូសដីស្រែ និងរុះរើសផ្ទះសម្បែង។ យោងតាមរបាយការណ៍ របស់អង្គការចលនាសិទ្ធិមនុស្សឡាវ មួយភាគធំនៃជនរងគ្រោះ បានទទួលសំណងជំងឺចិត្ត យ៉ាងយឺតយ៉ាវ និងក្នុងទំហំទឹកប្រាក់ស្តួចស្តើងបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ