អ.ស.ប រន្ធត់ចិត្ត ក្រោយឃើញការសន្និដ្ឋានរបស់ក្រុមអ្នកជំនាញឯករាជ្យ ស្តីពីការរំលោភសិទ្ធិមនុស្សនៅស៊ីនជាំង
តំណាងឧត្តមស្នងការសិទ្ធិមនុស្ស នៃអង្គការសហប្រជាជាតិ បានថ្លែងថា មានការរន្ធត់ចិត្តបំផុត បន្ទាប់ពីបានឃើញខ្លឹមសារ នៃការសន្និដ្ឋានរបស់ក្រុមអ្នកជំនាញឯករាជ្យ ទាក់ទិននឹងការរំលោភសិទ្ធិមនុស្ស នៅខេត្តស៊ីនជាំងប្រទេសចិន។ គួរបញ្ជាក់ថា ក្រុមមេធាវី និងអ្នកជំនាញឯករាជ្យនៅទីក្រុងឡុងដ៍ បានចេញរបាយការណ៍មួយ កាលពីថ្ងៃទី៩ធ្នូ អះអាងថា ចិនបានធ្វើអំពើ « ប្រល័យពូជសាសន៍ » ទៅលើសហគមនជនជាតិភាគតិច កាន់សាសនាអ៊ីស្លាមនៅខេត្តស៊ីនជាំង។ តែយ៉ាងណា អង្គការសហប្រជាជាតិ កំពុងតែពិនិត្យលំអិត លើការសន្និដ្ឋាននេះ ហើយនឹងចេញរបាយការណ៍របស់ខ្លួនមួយទៀត ក្នុងពេលខាងមុខ។
ចុះផ្សាយនៅថ្ងៃ៖
ស្តាប់ - ០២:៥៣
មេធាវី និងអ្នកជំនាញសិទ្ធិមនុស្សមួយក្រុម មានសមាជិក៩នាក់ បានរួមគ្នាបង្កើតក្រុមការងារមួយ ដាក់ឈ្មោះថា « តុលាការអ៊ុយហ្គួរ »។ ឆ្លងកាត់ការស្រាវជ្រាវ ប្រមូលឯកសារ ភស្តុតាង និង សក្ខីកម្ម អស់រយៈពេលជាច្រើនខែ ក្រុមអ្នកជំនាញឯករាជ្យនេះ បានចេញរបាយការណ៍មួយ កាលពីថ្ងៃទី៩ធ្នូ ដោយបានចាត់ទុកថា អ្វីដែលអាជ្ញាធរចិន បានធ្វើទៅលើជនជាតិអ៊ុយហ្កួរ និងសហគមន៍ជនជាតិភាគតិច កាន់សាសនាអ៊ីស្លាមឯទៀត នៅក្នុងខេត្តស៊ីនជាំង វាគឺជាអំពើ« ប្រល័យពូជសាសន៍ »។
ថ្លែងទៅកាន់អ្នកកាសែត លោក Rupert Colville អ្នកនាំពាក្យឧត្តមស្នងការសិទ្ធិមនុស្ស នៃអង្គការសហប្រជាជាតិ បានបញ្ចៀសមិនលើកឡើងអំពី ពាក្យថា « ប្រល័យពូជាសាសន៍ » ទេ។ តែលោកបានអះអាងថា ក្រុមការងារលោកមានការរន្ធត់ចិត្តណាស់ បន្ទាប់ពីបានអានរបាយការណ៍ខាងលើ។ លោកបន្ថែមថា ការសន្និដ្ឋាននេះ គឺវាមានទំរង់ប្រហាក់ប្រហែល នឹងអ្វីដែលក្រុមការងារលោកធ្លាប់បានសង្កេតឃើញ ដែលមានដូចជា ការចាប់ដាក់ឃុំក្រៅប្រព័ន្ធច្បាប់ អំពើជិះជាន់ ទារុណកម្ម ការដកហូតសិទ្ធិសង្គម វប្បធម៌ និងសិទ្ធិពលរដ្ឋ ជាដើម។ អ្នកនាំពាក្យរូបនេះ អះអាងថា អង្គការសហប្រជាជាតិ កំពុងតែប្រមូលឯកសារ ដើម្បីចេញរបាយការណ៍ផ្ទាល់ខ្លួនមួយទៀត ស្តីពីស្ថានការណ៍រំលោភសិទ្ធិមនុស្ស នៅខេត្តស៊ីនជាំងនេះ។
គួរបញ្ជាក់ថា ក្រុមអ្នកជំនាញតុលាការអ៊ុយហ្គួរ បានលើកឡើងថា គេគ្មានភស្តុតាងអ្វី មកបញ្ជាក់ថា អាជ្ញាធររដ្ឋចិន បានសម្លាប់រង្គាល ទៅលើប្រជាជនអ៊ុយហ្គួរ និងជនជាតិភាគតិចផ្សេងទៀត នៅខេត្តស៊ីនជាំងទេ។ ក៏ប៉ុន្តែ មានធាតុផ្សំជាច្រើនបានរួមគ្នា បញ្ជាក់អំពី « ចេតនារបស់រដ្ឋចិន ក្នុងការធ្វើអំពើប្រល័យពូជសាសន៍ » ដូចអ្វីដែលមានកំណត់ នៅក្នុងសន្ធិសញ្ញា ប្រយុទ្ធប្រឆាំងនឹងឧក្រិដ្ឋកម្មប្រល័យពូជសាសន៍។
យោងតាមរបាយការណ៍ កម្រាស់៦៣ទំព័រនេះ អាជ្ញាធរចិនបានធ្វើសកម្មភាពកាត់ស្បូនស្ត្រីជនជាតិអ៊ុយហ្គួរ ចាប់បង្ខំឲ្យរំលូតកូន និងចាប់ក្រៀវកុំឲ្យមានកូនជាដើម។ វិធានការទាំងនេះ គឺវាស្តែងអំពីចេតនាកាត់បន្ថយ និងកំទេចចំនួនប្រជាជនអ៊ុយហ្គួរទៅថ្ងៃអនាគត។ ក្រុមអ្នកជំនាញ បានអះអាងផងដែរថា រដ្ឋចិនជាអ្នកទទួលខុសត្រូវ លើអំពើឧក្រិដ្ឋកម្មប្រឆាំងមនុស្សជាតិ ដូចជាការចាប់មនុស្សដាក់ឃុំដោយខុសច្បាប់ ការធ្វើទារុណកម្ម អំពើហិង្សាផ្លូវភេទ ការកាត់ផ្តាច់លទ្ធភាពបង្កកំណើត និងអំពើអមនុស្សធម៌ជាច្រើនទំរង់ផ្សេងទៀត។
ក្រសួងការបរទេសចិន បានច្រានចោលរបាយការណ៍នេះ ថាជារបាយការណ៍ភូតកុហក និងបានអះអាងថា វាគឺជាឧបករណ៍នយោបាយ បង្កើតឡើងដោយប្រទេសលោកខាងលិច ដើម្បីបង្កាច់បង្ខូចកិត្តិយសចិនតែប៉ុណ្ណោះ។
គួររំលឹកថា លោកស្រី Michelle Bachelet ប្រធានឧត្តមស្នងការសិទ្ធិមនុស្ស ធ្លាប់បានទាមទារចុះទៅពិនិត្យដោយផ្ទាល់ នៅខេត្តស៊ីនជាំង ជាច្រើនឆ្នាំមកហើយ តែសំណើរនេះ ត្រូវបានអាជ្ញាធរចិនបដិសេធជានិច្ច។ ទាក់ទិននឹងសំណុំរឿងរំលោភសិទ្ធិមនុស្សនៅខេត្តស៊ីនជាំងនេះ សហរដ្ឋអាមេរិក បានប្រកាសធ្វើពហិការការទូត មិនចូលរួមក្នុងកម្មវិធីប្រកួតកីឡាអូឡាំពិករដូវរងារ នៅក្រុងប៉េកាំងនាដើមឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ