យូណេស្កូ អំពាវនាវសហគមន៍អន្តរជាតិ រួមគ្នាពង្រឹងការប្រយុទ្ធប្រឆាំងនឹងការជួញដូរវត្ថុសិល្បៈបុរាណ
តំណាងអង្គការយូណេស្កូ បានអំពាវនាវ ឲ្យប្រទេសទាំងអស់រួមគ្នា ពង្រឹងការប្រយុទ្ធប្រឆាំងនឹង ការជួញដូរវត្ថុសិល្បៈបុរាណ។ ខណៈដែលការប្រគល់ត្រលប់ទៅឲ្យប្រទេសដើមវិញ នូវវត្ថុសិល្បៈមានតម្លៃ ត្រូវបានគេធ្វើកាន់តែច្រើនឡើងៗ អង្គការយូណេស្កូ បានអំពាវនាវ ឲ្យប្រទេសទាំងអស់រួមសហការគ្នា នៅក្នុងតំបន់ ដើម្បីទប់ស្កាត់សកម្មភាពជួញដូរដោយខុសច្បាប់ នូវវត្ថុសិល្បៈវប្បធម៌។
ចុះផ្សាយនៅថ្ងៃ៖
ស្តាប់ - ០២:២៦
ថ្លែងពីទីក្រុងញូដេលី ក្នុងឱកាសសន្និសីទស្តីពីមធ្យោបាយប្រយុទ្ធនឹងការជួញដូរវត្ថុសិល្បៈ លោក Eric Falt តំណាងអង្គការយូណេស្កូ ប្រចាំតំបន់អាស៊ីខាងត្បូង បានលើកឡើងថា មានការទទួលស្គាល់កាន់តែច្រើនឡើងៗ ថាវត្ថុសិល្បៈ ដែលត្រូវបានយកចេញ ដោយខុសច្បាប់ពីប្រទេសដើម គឺត្រូវតែប្រគល់ត្រលប់ទៅប្រទេសដើមវិញ។
តំណាងអង្គការយូណេស្កូរូបនេះ បានបន្ថែមថា បច្ចុប្បន្ននេះ មធ្យោបាយមួយ ក្នុងការពង្រឹងការប្រយុទ្ធប្រឆាំងការជួញដូរវត្ថុសិល្បៈបុរាណ គឺផ្អែកលើសន្ធិសញ្ញាយូណេស្កូ ចុះនៅឆ្នាំ១៩៧០ ដែលមានប្រទេសប្រមាណ ១៤១ប្រទេស បានធ្វើសច្ចាប័នគោរព។ ក៏ប៉ុន្តែទន្ទឹមនឹងនេះ ការរៀបចំកសាង កិច្ចសហប្រតិបត្តិការក្នុងតំបន់ ត្រូវតែពង្រឹងបន្ថែមឲ្យបានល្អប្រសើរជាងនេះ ដើម្បីឲ្យការប្រយុទ្ធប្រឆាំងការជួញដូរវត្ថុបុរាណ អាចធ្វើទៅបានដោយប្រសិទ្ធភាព។
លោកបានឆ្លៀតលើកឡើងផងដែរថា ឥណ្ឌាគឺជាប្រទេសមួយដែលមានសម្បត្តិវប្បធម៌ និងវត្ថុសិល្បៈបុរាណច្រើន និងសំបូរបែបបំផុត។ ឥណ្ឌាក៏ជាប្រទេសមួយ បានរងគ្រោះខ្លាំងផងដែរ ដោយការជីក កាប់គាស់ លួចវត្ថុសិល្បៈបុរាណរបស់ខ្លួន ដោយបណ្តាញឈ្មួញទុច្ចរិត។ តែទន្ទឹមនឹងនេះ ប្រទេសជាច្រើនបានចាប់ផ្តើម ស្ម័គ្រចិត្តប្រគល់វត្ថុសិល្បៈមកឲ្យប្រទេសដើមវិញ បន្ទាប់ពីបានដឹងអំពីប្រភពខុសច្បាប់ នៃការជួញដូរវត្ថុសិល្បៈទាំងនេះ។ ជាក់ស្តែង នៅក្នុងឱកាសទស្សនកិច្ចលើកទី១របស់លោកនាយករដ្ឋមន្ត្រីឥណ្ឌា ណារិន្ទ្រ ម៉ូឌី ទៅសហរដ្ឋអាមេរិក អាមេរិកបានប្រគល់វត្ថុសិល្បៈចំនួន ១៥៧ មកឲ្យឥណ្ឌាវិញ។
ជាមួយគ្នានេះដែរ សារៈមន្ទីរជាតិអូស្ត្រាលីនៅទីក្រុងកង់បេរ៉ា បានប្រកាសកាលពីខែកក្កដាកន្លងទៅថា នៅឆ្នាំ២០២២ខាងមុខ គេនឹងប្រគល់មកឲ្យឥណ្ឌាវិញ នូវវត្ថុសិល្បៈចំនួន ១៤មុខ ដែលមានតម្លៃទឹកប្រាក់ប្រមាណ ២.២លានដុល្លារ។ វត្ថុសិល្បៈ១៣ ក្នុងចំនោមនោះ គឺមានពាក់ព័ន្ធជាមួយនឹងឈ្មួញជួញដូរវត្ថុបុរាណម្នាក់ ឈ្មោះ Subhash Kapoor ដែលត្រូវបានអាជ្ញាធរអាមេរិក ចាប់ខ្លួនកាលពីឆ្នាំ២០១១។
លោក Alok Tripathi អគ្គនាយកក្រុមសង្កេតការណ៍បុរាណវិទ្យាឥណ្ឌា បានទទួលស្គាល់ថា ប៉ុន្មានឆ្នាំចុងក្រោយនេះ ពិតជាមានការប្រគល់វត្ថុបុរាណមកឲ្យឥណ្ឌាវិញ កាន់តែច្រើនពិតមែន។ ហើយបច្ចុប្បន្ន អាជ្ញាធរឥណ្ឌាកំពុងតែបើកការចរចា ថ្មីៗទៀត ដើម្បីសុំត្រលប់មកវិញនូវវត្ថុបុរាណ ដែលត្រូវបានយកចេញពីប្រទេសខ្លួន ដោយខុសច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ