UNHCR អំពាវនាវឲ្យថៃ បើកផ្លូវឲ្យគេចូលទៅជួយជនភៀសខ្លួន ដែលរត់គេចពីការប្រយុទ្ធគ្នានៅរដ្ឋស្ហានប្រទេសភូមា
កាលពីសប្តាហ៍កន្លងទៅ ការវាយប្រយុទ្ធគ្នាសាជាថ្មី បានផ្ទុះឡើង រវាងកងទ័ពជាតិភូមា និងក្រុមឧទ្ទាមសម្ព័ន្ធជាតិការ៉េន នៅរដ្ឋស្ហាន។ មានប្រជាជនជិត៤ពាន់នាក់ បានភៀសខ្លួនគេចពីការវាយប្រយុទ្ធនេះ ហើយបានព្យាយាមហែលឆ្លងទន្លេ តាមបណ្តោយព្រំដែន ទៅកាន់ប្រទេសថៃ។ អង្គការសហប្រជាជាតិ ទទួលបន្ទុកជនភៀសខ្លួន បានអំពាវនាវកាលពីថ្ងៃចន្ទទី២០ធ្នូ ឲ្យរដ្ឋាភិបាលថៃ បើកផ្លូវឲ្យក្រុមការងារអង្គការសហប្រជាជាតិ អាចចូលទៅជួយ ជនភៀសខ្លួនភូមាទាំងនោះ។
ចុះផ្សាយនៅថ្ងៃ៖
ស្តាប់ - ០២:២៥
កាលពីថ្ងៃព្រហស្បតិ៍ សប្តាហ៍កន្លងទៅ មានប្រជាជនកេរ៉េន ប្រមាណ៧០០នាក់ បានហែលឆ្លងទឹកទន្លេ Moei ដែលជាព្រំដែនរវាងរដ្ឋស្ហានប្រទេសភូមា និងខេត្តតាកប្រទេសថៃ។ ដោយសារតែការវាយប្រហារ បាញ់ប្លោងគ្រាប់កាំភ្លើងធំ នៅតែបន្តរហូតដល់ថ្ងៃអាទិត្យ មានមនុស្សជាច្រើនពាន់នាក់ផ្សេងទៀត បានបន្តរត់ភៀសខ្លួន មកកាន់ប្រទេសថៃ។
យោងតាមអាជ្ញាធរខេត្តតាកប្រទេសថៃ គិតត្រឹមថ្ងៃចន្ទទី២០ធ្នូ មានជនភៀសខ្លួនការ៉េនប្រមាណ៣៩០០នាក់ ដែលបានភៀសខ្លួនមកដល់ខាងថៃ។ ពួកគេត្រូវបានអាជ្ញាធរថៃ រៀបចំឲ្យស្នាក់នៅបណ្តោះអាសន្ន ក្នុងជំរំ២ទីតាំងខុសគ្នា មិនឆ្ងាយប៉ុន្មានពីព្រំដែន។
ដោយមានការព្រួយបារម្ភ ពីសុវត្ថិភាព និងសុខមាលភាព របស់ជនភៀសខ្លួន នៅថ្ងៃចន្ទ ទី២០ធ្នូ អង្គការសហប្រជាជាតិទទួលបន្ទុកជនភៀសខ្លួន UNHCR បានចេញសេចក្តីប្រកាសមួយ អំពាវនាវសុំឲ្យរដ្ឋាភិបាលថៃ បើកភ្លើងខៀវ ឲ្យក្រុមមន្ត្រីអន្តរជាតិ ចូលទៅជួយជនភៀសខ្លួនការ៉េនទាំងនោះ។
យោងអគ្គលេខាធិការអង្គការជួយស្រ្តីការ៉េន គឺអាជ្ញាធរថៃ បានជួយជាជំនួយមនុស្សធម៌ ដល់ជនភៀសខ្លួន និងបានរៀបចំបណ្តាញដឹកជញ្ជូន អ្នកដែលស្ម័គ្រចិត្ត ឲ្យត្រលប់ទៅរដ្ឋស្ហានវិញ។ ក៏ប៉ុន្តែ ជនភៀសខ្លួននៅតែមានការភ័យខ្លាច ដោយសារតែការវាយប្រយុទ្ធគ្នា រវាងកងទ័ពជាតិភូមា និងក្រុមឧទ្ទាមសម្ព័ន្ធជាតិការ៉េន KNU នៅតែបន្តដដែល។ ជាក់ស្តែងនៅថ្ងៃចន្ទ ការវាយប្រយុទ្ធបាញ់ប្លោងគ្រាប់កាំភ្លើងធំ បានផ្ទុះឡើងនៅតំបន់ Mae Htaw Thalay មិនឆ្ងាយប៉ុន្មានពីព្រំដែនថៃ។
លោក Zaw Min Tun អ្នកនាំពាក្យរបបសិកភូមា បានទទួលស្គាល់ថា ពិតជាមានការវាយប្រយុទ្ធគ្នាមែន នៅក្នុងរដ្ឋស្ហាន ក្បែរព្រំដែនថៃ។ អ្នកនាំពាក្យរូបនេះ អះអាងថា កងទ័ពជាតិភូមា បានគ្រប់គ្រងស្ថានការណ៍ហើយ ហើយកំពុងចរចាជាមួយនឹងតំណាងរបស់ក្រុមឧទ្ទាមការ៉េន។
គួររំលឹកថា នៅក្រោយរដ្ឋប្រហារយោធានៅខែកុម្ភៈ ក្រុមឧទ្ទាមការ៉េន បានចេញមុខប្រឆាំងនឹងរបបសិកភូមា ខ្លាំងជាងគេ នឹងបានទទួលក្រុមសកម្មជននយោបាយប្រឆាំងជាច្រើននាក់ ឲ្យចូលទៅពួនសំងំលាក់ខ្លួន នៅក្នុងរដ្ឋស្ហាន។ យោងតាមប្រភពមួយចំនួន ការផ្ទុះអាវុធជាថ្មីនេះ បានកើតឡើង បន្ទាប់ពីបណ្តាញព័ត៌មានរដ្ឋភូមា បានផ្សព្វផ្សាយថា កងទ័ពជាតិភូមា បានសំរុកចូលទៅក្នុងរដ្ឋស្ហាន ដើម្បីតាមចាប់ខ្លួនក្រុមអ្នកប្រឆាំងនឹងរបបសិកភូមាជាច្រើននាក់ ក្នុងនោះមានអតីតតំណាងរាស្រ្តម្នាក់ ស្និទ្ធនឹងលោកស្រីអ៊ុងសាន ស៊ូជី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ