អាមេរិកតែងតាំងប្រេសិតពិសេស ទទួលបន្ទុកសំណុំរឿងតំបន់ទីបេ
រដ្ឋាភិបាលអាមេរិក បានប្រកាសតែងតាំង លោកស្រី Uzra Zeya ឲ្យធ្វើជាអ្នកសម្របសម្រួលពិសេស នៅក្នុងកិច្ចការលើកកំពស់ការគោរពសិទ្ធិមនុស្សនៅទីបេ ព្រមទាំងជំរុញការចរចា រវាងរដ្ឋាភិបាលចិន និងសម្តេចសង្ឃដាឡៃឡាម៉ា។ នេះគឺជាកាយវិការជានិម្មិតរូបមួយ របស់រដ្ឋាភិបាលលោកចូ បៃដិន។ តែគេពិបាកសង្ឃឹមណាស់ ថារដ្ឋាភិបាលចិន នឹងយកចិត្តទុកផ្តល់សារៈសំខាន់ លើការគោរពសិទ្ធិមនុស្សនៅទីបេ ហើយនឹងបើកការចរចា ជាមួយសម្តេចសង្ឃដាឡៃឡាម៉ានោះ។
ចុះផ្សាយនៅថ្ងៃ៖
ស្តាប់ - ០២:៥៣
លោកស្រី Uzra Zeya បច្ចុប្បន្នជាអនុរដ្ឋលេខាធិការ ទទួលបន្ទុកកិច្ចការប្រជាធិបតេយ្យ និងសិទ្ធិមនុស្ស ត្រូវបានបន្ថែមមុខងារមួយទៀត ឲ្យទទួលបន្ទុកសំណុំរឿងតំបន់ទីបេ។ នេះបើយោងតាមលិខិតប្រកាសរបស់ លោកអង់តូនី ប្លីងកិន រដ្ឋមន្ត្រីការបរទេសអាមេរិក។
លោកស្រី Uzra Zeya នឹងទទួលបន្ទុកបេសកកម្ម សម្របសម្រួលការចរចាដ៏ចាំបាច់ ដោយគ្មានលក្ខខណ្ឌបឋម រវាងរដ្ឋាភិបាលចិន និងសម្តេចសង្ឃដាឡៃឡាម៉ា ព្រមទាំងតំណាងថ្នាក់ដឹកនាំដែលត្រូវបានប្រជាជនទីបេ បោះឆ្នោតជ្រើសរើសដោយស្របច្បាប់។ លោកស្រី ក៏នឹងមានបេសកកម្ម លើកកំពស់ការគោរពសិទ្ធិមនុស្ស សេរីភាពជាមូលដ្ឋានរបស់ប្រជាជនទីបេ តួយ៉ាងដូចជាសិទ្ធិសេរីភាពគោរពជំនឿសាសនា អភិរក្សប្រពៃណី កេរតំណែលវប្បធម៌ ភាសា និងប្រវត្តិសាស្ត្ររបស់តំបន់ទីបេ។
គួរបញ្ជាក់ថា កាលពីពាក់កណ្តាលខែធ្នូនេះ មានសមាជិកសភាខុនហ្ក្រេសអាមេរិក ជាង៦០នាក់ បានរួមគ្នា សរសេរលិខិតមួយទៅកាន់លោកចូ បៃដិន ដើម្បីឲ្យលោករៀបចំជំនួបមួយ ជាមួយសម្តេចសង្ឃដាឡៃឡាម៉ា ព្រមទាំងរកវិធីជំរុញឲ្យរដ្ឋាភិបាលចិន ត្រលប់មកចូលតុចរចាជាមួយសម្តេចសង្ឃដាឡៃឡាម៉ាវិញ។ សមាជិកសភាអាមេរិក លើកឡើងថា ជំនួបរវាងលោកចូ បៃដិន និងសម្តេចសង្ឃដាឡៃឡាម៉ា គឺអាចជាការបង្ហាញឆន្ទៈច្បាស់ៗ នៃនយោបាយការបរទេសរបស់អាមេរិក ដែលឈរលើគោលការណ៍គាំទ្រការគោរពសិទ្ធិមនុស្ស ព្រមទាំងការពារភាពថ្លៃថ្នូរជាមនុស្ស របស់ប្រជាជនទីបេ។
គួររំលឹកថា សម្តេចសង្ឃដាឡៃឡាម៉ា បានភៀសខ្លួនទៅឥណ្ឌានៅឆ្នាំ១៩៥៩ ដើម្បីជាការប្រឆាំងចំពោះសកម្មភាពរំលោភបំពាន និងការធ្វើទុក្ខបុកម្នេញ ពីសំណាក់អំណាចនយោបាយកុម្មុយនីស្តចិន មកលើប្រជាជនទីបេ។ សម្តេចសង្ឃបានបរិហារអំពី ការជាន់ឈ្លីរបស់អំណាចកុម្មុយនីស្ត មកលើវប្បធម៌ ជំនឿសាសនា ភាសា និងអត្តសញ្ញាណទីបេ ព្រមទាំងបានបង្ហូរក្រុមជនជាតិហាន ឲ្យមករស់នៅក្នុងតំបន់ទីបេថែមទៀតផង ដើម្បីធ្វើឲ្យប្រជាជនទីបេ ក្លាយជាជនជាតិភាគតិចនៅក្នុងលើទឹកដីរបស់ខ្លួន។
គួរបញ្ជាក់ដែរថា ការចរចារៀបចំលក្ខខន្តិកៈតំបន់ទីបេ រវាងសម្តេចសង្ឃដាឡៃឡាម៉ា និង រដ្ឋាភិបាលចិន ត្រូវបានចិនទំលាក់ចោល លែងអើពើ ប្រមាណ១២ឆ្នាំមកហើយ។ បើតាមការវិភាគ គឺរដ្ឋាភិបាលចិន រំពឹងរងចាំ នៅក្រោយមរណភាព របស់សម្តេចសង្ឃដាឡៃឡាម៉ា ដែលបច្ចុប្បន្នមានព្រះជន្ម៨៦វស្សារហើយនោះ ដើម្បីឲ្យចលនាតស៊ូទីបេ សាបរលាបដោយខ្លួនឯង ដោយមិនចាំបាច់ធ្វើសម្បទានអ្វីទាំងអស់។
យ៉ាងណាក៏ដោយ កាយវិការជានិម្មិតរូប របស់រដ្ឋាភិបាលអាេមរិក ដែលបានតែងតាំងមន្ត្រីពិសេសម្នាក់ ទទួលបន្ទុកកិច្ចការទីបេនេះ គឺគេពុំសូវមានសង្ឃឹមថា អាចនឹងប្តូរគំនិតយល់ឃើញរបស់ចិននោះទេ។ ផ្ទុយទៅវិញ វាអាចជាចំណុចរសើប បន្ថែមភាពតានតឹងមួយកម្រិតទៀត រវាងចិន និងអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ