ភូមា ៖ គ្រោះថ្នាក់់បាក់ដីក្នុងអណ្តូងរ៉ែបង្កឱ្យស្លាប់និងបាត់ខ្លួនជាច្រើននាក់
មានមនុស្សយ៉ាងហោចណាស់៧០នាក់ បានបាត់ខ្លួន និងយ៉ាងហោចណាស់ម្នាក់បានបាត់ជីវិត នៅក្នុងគ្រោះថ្នាក់បាក់ដីក្នុងអណ្តូងរ៉ែមួយនៅភាគខាងជើងប្រទេសភូមា។ នេះបើតាមការអះអាងរបស់ក្រុមអ្នកសង្គ្រោះមកកាន់ភ្នាក់ងារសារព័ត៌មានបារាំងAFP។ កាសែតក្នុងស្រុក Kachin News បានប្រកាសថាមានកម្មករជីករ៉ែ២០នាក់បានស្លាប់ក្នុងហេតុការណ៍នោះ។
ចុះផ្សាយនៅថ្ងៃ៖
ស្តាប់ - ០២:០១
ហេតុការណ៍បានកើតឡើងនៅវេលាម៉ោង៤ទៀបភ្លឺ នៅកន្លែងរុករករ៉ែថ្លើមថ្ម (ហ្គិច) ក្នុងតំបន់ Hpakant នៃរដ្ឋKayah ប្រទេសភូមា។ ប្រតិបត្តិការសង្គ្រោះបានកម្លាំងជំនួយពីក្រុមអ្នកពន្លត់អគ្គីភ័យជាង២០០នាក់ ខ្លះស្វែងរកអ្នករួចពីស្លាប់នៅលើដី ខ្លះជិះទូកតាមប្រព័ន្ធផ្លូវទឹក ក្នុងបឹងចាំស្រង់សាកសពឬកម្មកររួចពីស្លាប់។ គិតរហូតមកត្រឹមពេលរសៀល ក្រុមអ្នកសង្គ្រោះបានរកឃើញសាកសពមនុស្សម្នាក់ និងបញ្ជូនអ្នករងរបួស២៥នាក់ទៅមន្ទីរពេទ្យ។ ប៉ុន្តែក្រុមអ្នកសង្គ្រោះមិនបានចេញសេចក្តីថ្លែងការណ៍ផ្លូវការបញ្ជាក់អំពីតុល្យការនៃជនរងគ្រោះបាត់បង់ជីវិតឬបាត់ខ្លួននៅក្នុងគ្រោះថ្នាក់នេះទេ។
នៅភូមា ក្នុងមួយឆ្នាំៗ មានកម្មករអណ្តូងរ៉ែរាប់សិបនាក់បានស្លាប់ ក្នុងពេលធ្វើការ ដោយហេតុតែលក្ខខណ្ឌការងារលំបាក និងគ្មានសុវត្ថិភាព។ គ្រោះបាក់ដីក្នុងអណ្តូងរ៉ែ តែងកើតឡើងជាញឹកញយ ក្នុងតំបន់ក្រីក្រ និងដាច់ស្រយាលខ្លាំង ដែលក្រុមហ៊ុនរ៉ែធំៗនាំគ្នាទៅប្រមូលផលដោយមិនខ្វល់ខ្វាយគិតដល់បញ្ហាបរិស្ថាន។
តាំងពីឆ្នាំ២០១៦មក ក្រុមហ៊ុនរ៉ែធំៗជាច្រើនបាននាំគ្នាដកខ្លួនចេញពីភូមា បិទសកម្មភាពរករ៉ែ និងបោះបង់តំបន់នោះចោល ទើបក្រុមអ្នករករ៉ែតូចតាចបានឱកាសម្តង។ ក្រុមហ៊ុនតូចតាច មានប្រភពចេញមកពីសហគមន៍ជនជាតិភាគតិចក្រីក្រ បាននាំគ្នាទៅរុករករ៉ែលើគំនរអណ្តូងចាស់ ដោយខុសច្បាប់ និងដោយគ្មានការត្រួតពិនិត្យអ្វីទាំងអស់។ កាលពីឆ្នាំ២០២០ នៅពេលមានព្យុះភ្លៀងរដូវវស្សាធ្លាក់មកខ្លាំង គ្រោះបាក់ដី និងទឹកភក់ហូរកប់កម្មករ៣០០នាក់ឱ្យស្លាប់និងបាត់ខ្លួន នៅតំបន់ឧស្សាហកម្មរ៉ែ ប៉ាក់ខាន ដែលជាតំបន់ខ្ពង់រាប ជាប់ព្រំដែនចិន។
ឧស្សាហកម្មរ៉ែថ្លើមថ្ម ជាប្រភពចំណូលធំរបស់ភូមាដែលមានទំហំដល់ទៅជាង៣០ពាន់លានដុល្លារក្នុងមួយឆ្នាំ ពោលគឺស្មើនឹងជិតពាក់កណ្តាលនៃផលិតផលសរុបក្នុងស្រុក។ ប៉ុន្តែថវិកាបានមកពីឧស្សាហកម្មរ៉ែនេះចូលហិបរដ្ឋតិចតួចណាស់។ ពាណិជ្ជកម្មរ៉ែហ្គិច បានបំប៉ោងភាពមានបានរបស់ពួកយោធាដែលគ្រប់គ្រងតំបន់Kpakantនេះតាំងពីឆ្នាំ១៩៩០មក និងបានចិញ្ចឹមក្រុមឧទ្ទាមប្រដាប់អាវុធឱ្យមានកម្លាំងតតាំងជាមួយរដ្ឋាភិបាលកណ្តាល។ រដ្ឋប្រហារថ្ងៃទី១កុម្ភៈ ២០២១ បានមកក្តិចផ្តាច់ពន្លក កំណែទម្រង់វិស័យរ៉ែ ផ្តូចផ្តើមឡើងដោយរដ្ឋាភិបាលស៊ីវិលភូមារបស់លោកស្រី អ៊ុងសានស៊ូជី។ នេះបើតាមរបាយការណ៍ប្រចាំឆ្នាំ២០២១របស់អង្គការGlobal Witness៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ