កិច្ចព្រមព្រៀងពាណិជ្ជកម្មសេរីធំជាងគេក្នុងពិភពលោក ចាប់កំណើតនៅអាស៊ី
កិច្ចព្រមព្រៀងពាណិជ្ជកម្មសេរី ហៅកាត់ជាភាសាអង់គ្លេស ថា “អាសិប” RCEP ដែលអាស៊ាននិងប្រទេសចំនួន៥បានចុះហត្ថលេខា កាលពីចុងឆ្នាំ ២០២០ បានចាប់ចូលជាធរមានពីថ្ងៃទី១ ខែមករា ឆ្នាំ ២០២២នេះ។ កិច្ចព្រមព្រៀងពាណិជ្ជកម្មសេរី ដែលប្រមូលផ្តុំជាលើកទី១ ប្រទេសមហាអំណាចសេដ្ឋកិច្ចអាស៊ីទាំង៣ គឺចិន ជប៉ុន និងកូរ៉េខាងត្បូង បានក្លាយកិច្ចព្រមព្រៀងពាណិជ្ជកម្មសេរីពហុភាគីលើកទី១ ក្នុងពិភពលោក និងតំណាងឲ្យ៣០%នៃផលិតផលក្នុងស្រុកសរុប របស់ពិភពលោក។
ចុះផ្សាយនៅថ្ងៃ៖
ស្តាប់ - ០២:៤៣
អាស៊ីបានបោះមួយជំហានធំឆ្ពោះ ទៅរកសមាហរណកម្មសេដ្ឋកិច្ច និងពាណិជ្ជកម្ម។ បន្ទាប់ពីចំណាយពេលចរចា អស់៨ឆ្នាំ និងចុះហត្ថលេខា កាលពីចុងឆ្នាំ ២០២០ កិច្ចព្រមព្រៀងពាណិជ្ជកម្មសេរី ដែលហៅកាត់ជាភាសាអង់គ្លេសថា RCEP (Regional Comprehensive Economic Partnership) ត្រូវចាប់អនុវត្ត ជាផ្លូវការពីថ្ងៃទី ១ ខែមករាឆ្នាំ២០២២នេះ។
ផ្តួចផ្តើមគំនិតនិង សម្របសម្រួលដោយអាស៊ាន កិច្ចព្រមព្រៀងពាណិជ្ជកម្មសេរី RCEP បានក្លាយជាកិច្ចព្រមព្រៀងពាណិជ្ជកម្មសេរីដ៏ធំ ជាងគេក្នុងពិភពលោក ព្រោះវាប្រមូលផ្គុំជាលើកទី១ មហាអំណាចសេដ្ឋកិច្ចអាស៊ី ទាំងបី គឺចិន ជប៉ុន និងកូរ៉េខាងត្បូង។ ជាមួយការចូលរួមផងដែរ របស់អូស្ត្រាលី និងនូវែលសេឡង់ វាបានក្លាយជាតំបន់ដោះដូរពាណិជ្ជកម្មសេរី ដ៏មានសក្តានុពល បើគេមើលទៅលើផលិតផលក្នុងស្រុកសរុប ចំនួនប្រជាជន និងអត្រាកំណើនសេដ្ឋកិច្ចរបស់ប្រទេសសមាជិកទាំង១៥។
កិច្ចព្រមព្រៀង “RCEP”ផ្តោតសំខាន់ទៅលើកាត់បន្ថយពន្ធ រវាងប្រទេសសមាជិក នៅក្នុងវិស័យ ឧស្សាហកម្មវាយនភណ្ឌ ពាណិជ្ជកម្មផ្នែកសេវា កសិកម្ម និងជំរុញ ការវិនិយោគដើម្បីជួយ សេដ្ឋកិច្ចរបស់ប្រទេសដែលកំពុងអភិវឌ្ឍឲ្យដើរទាន់ ប្រទេសដទៃទៀត ក្នុងពិភពលោក។
ការវិភាគនៅឆ្នាំ ២០២០ របស់វិទ្យាស្ថានPeterson សម្រាប់សេដ្ឋកិច្ចអន្តរជាតិ បានបង្ហាញថា កិច្ចព្រមព្រៀងពាណិជ្ជកម្មសេរី RCEP ត្រូវបង្កើនផលិតផលក្នុងស្រុកសរុបរបស់ប្រទេសសមាជិក ម្នាក់ៗប្រមាណ ០,២% ជាពិសេស ចិន កូរ៉េខាងត្បូង និងជប៉ុន ដែលនឹងទាញយកផលប្រយោជន៍សេដ្ឋកិច្ចពីកិច្ចព្រមព្រៀងនេះបានច្រើនជាងគេ។
សន្និសីទអង្គការសហប្រជាជាតិស្តីពីពាណិជ្ជកម្ម និងអភិវឌ្ឍ Cnuced ធ្លាប់វាយតម្លៃថា កិច្ចព្រមព្រៀង RCEP នឹងជំរុញឲ្យការដោះដូរពាណិជ្ជកម្មកើនឡើង ២%នៅក្នុងតំបន់ ដែលស្មើនឹង ៤២ពាន់លានដុល្លារ។ កំណើននេះបានមកពីការទម្លាក់របាំងពន្ធគយ រវាងប្រទេសសមាជិក ហើយនិងការបង្វែរទិសដោះដូរពាណិជ្ជកម្មជាមួយពិភពខាងក្រៅ។ ជារួម ការនាំចេញពីអឺរ៉ុប អាមេរិក សម្រាប់តំបន់RCEP នឹងធ្លាក់ថយចុះ ២% និង១% ចំណែកប្រទេសអាស៊ីខាងត្បូងដែលរងប៉ះពាល់ និងឃើញការនាំចេញរបស់ខ្លួនទៅកាន់តំបន់RCEPធ្លាក់ថយចុះខ្លាំង មានប៉ាគីស្ថាន(-៤%) បង់ក្លាដែស(-១២%) និងឥណ្ឌា (-២%)។
សម្រាប់អ្នកជំនាញអាល្លឺម៉ង់ លោក Hanns Günther Hilpert អ្នកទទួលខុសត្រូវផ្នែកអាស៊ី នៅវិទ្យាស្ថានអាល្លឺម៉ង់ សម្រាប់កិច្ចការអន្តរជាតិ និងសន្តិសុខ នៅក្នុងខណៈពេលដែលអាមេរិក និងចិន កំពុងជាប់ជម្លោះពាណិជ្ជកម្ម កិច្ចព្រមព្រៀងពាណិជ្ជកម្មសេរី នឹងជួយជំរុញផងដែរ ឲ្យក្រុមហ៊ុនបរទេសទៅបោះទុនវិនិយោគនៅក្នុងតំបន់ ក្រៅពីប្រទេសចិន។ ជាក់ស្តែង ក្រុមហ៊ុននៅអឺរ៉ុបដែលខ្លាចជាប់ទណ្ឌកម្មសេដ្ឋកិច្ចរបស់អាមេរិក អាចងាកទៅវិនិយោគនៅតំបន់អាស៊ាន ដែលគេប្រើជាទីតាំងថ្មី សម្រាប់ធ្វើការនាំចេញផលិតផល ទៅក្នុងទីផ្សារពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ