ក្រុមហ៊ុនTesla រងការរិះគន់ក្រោយបើកទីតាំងបង្ហាញរថយន្តនៅតំបន់ស៊ីនជាំង
ក្រុមហ៊ុនផលិតរថយន្តអគ្គិសនី Tesla របស់មហាសេដ្ឋីអាមេរិក អេឡុន ម៉ាស្ក៍ (Elon Musk) ប្រកាសថាបានបើកទីតាំងបង្ហាញរថយន្តមួយកន្លែងនៅតំបន់ស៊ីនជាំងប្រទេសចិន។ សេចក្តីប្រកាសនេះទទួលបានការរិះគន់ភ្លាមៗនៅក្នុងសហរដ្ឋអាមេរិកពីក្រុមអ្នកការពារសិទ្ធិមនុស្ស និងអង្គការវិជ្ជាជីវៈជាច្រើន។
ចុះផ្សាយនៅថ្ងៃ៖
ស្តាប់ - ០២:៣៣
ក្រុមហ៊ុន Teslaបានបើក showroomសម្រាប់តាំងបង្ហាញរថយន្តរបស់ខ្លួននៅឯក្រុងអ៊ុយរ៉ូមឈី (Urumqi) ក្នុងតំបន់ស៊ីនជាំងដ៏ចម្រូងចម្រាស់របស់ប្រទេសចិននៅអំឡុងថ្ងៃចូលឆ្នាំសកល។ កំហឹងពីក្នុងសហរដ្ឋអាមេរិកបានចាប់ផ្ទុះឡើងបន្ទាប់ពីការប្រកាសរបស់ក្រុមហ៊ុន Tesla។
នៅថ្ងៃអង្គារ ទី៤ មករាម្សិលមិញ អង្គការតស៊ូមតិអ៊ីស្លាមដ៏ធំបំផុតនៅអាមេរិកគឺក្រុមប្រឹក្សាទំនាក់ទំនងអាមេរិក-អ៊ីស្លាមបានរិះគន់ទង្វើរបស់ក្រុមហ៊ុន Tesla ដោយនិយាយថាក្រុមហ៊ុនកំពុងគាំទ្រអំពើប្រល័យពូជសាសន៍របស់ចិនទៅលើជនជាតិអ៊យហ្គួរ។ នៅលើគណនីធ្វីតទ័រផ្លូវការរបស់ខ្លួន ក្រុមអ្នកតស៊ូមតិអ៊ីស្លាមថែមទាំងបានប្រាប់លោក Elon Musk ដែលជាស្ថាបនិកក្រុមហ៊ុន Tesla ឲ្យបិទទីតាំងបង្ហាញរថយន្តនៅស៊ីនជាំងទៀតផង។
មិនទាន់អស់នោះទេ ការរិះគន់ស្រដៀងគ្នានេះបានធ្លាក់មកផងដែរពីអង្គភាពពាណិជ្ជកម្មអាមេរិកមួយក្រុមដែលមានឈ្មោះថាសម្ព័ន្ធសម្រាប់ការផលិតអាមេរិក និងពីសមាជិកព្រឹទ្ធសភាអាមេរិកម្នាក់មកពីបក្សសាធារណរដ្ឋគឺលោក Marco Rubio។
លោក Marco Rubio ដែលជាអ្នកបានគាំទ្រចំពោះការអនុម័តច្បាប់របស់អាមេរិកហាមឃាត់ទំនិញនាំចូលពីស៊ីនជាំងបានបង្ហាញការមិនគាំទ្រចំពោះការសម្រេចរបស់ក្រុមហ៊ុន Tesla។ លោកបានចាត់ទុកទង្វើរបស់ Teslaថាមិនខុសអីពីការជួយរដ្ឋាភិបាលក្រុងប៉េកាំងបិទបាំងអំពើប្រល័យពូជសាសន៍ និងការប្រើពលកម្មដោយបង្ខំលើជនជាតិអ៊ុយហ្គួរឡើយ។
ក្រោយពាក្យរិះគន់ធ្លាក់មកជាហូរហែ គេនៅមិនទាន់ឃើញក្រុមហ៊ុន Teslaចេញមុខធ្វើការឆ្លើយតបអ្វីភ្លាមៗទេ។ យ៉ាងណាក៏ដោយ ការបើកទីតាំងបង្ហាញផលិតផលរថយន្តរបស់ក្រុមហ៊ុនTeslaនៅស៊ីនជាំងនេះត្រូវបានស្វាគមន៍យ៉ាងទូលំទូលាយពីក្រុមអ្នកប្រើប្រាស់ប្រព័ន្ធបណ្តាញសង្គម Weibo ចិន។
គួរជ្រាបថា ស៊ីនជាំងបានក្លាយជាចំណុចដ៏រស៊ើបនៃជម្លោះរវាងរដ្ឋាភិបាលលោកខាងលិចនិងរដ្ឋាភិបាលចិននាប៉ុន្មានឆ្នាំថ្មីៗនេះ។ អាមេរិកបានចាត់ទុកការប្រព្រឹត្តរបស់ចិនលើជនជាតិអ៊ុយហ្គួរ និងជនជាតភាគតិចកាន់សាសនាអ៊ីស្លាមផ្សេងទៀតនៅស៊ីនជាំងថាជាអំពើប្រល័យពូជសាសន៍។ ក្រៅតែពីបានអនុម័តច្បាប់ហាមឃាត់ទំនិញនាំចូលពីស៊ីនជាំង ថ្មីៗនេះអាមេរិកក៏បានដឹកនាំសម្ព័ន្ធមិត្តអង់គ្លេស អូស្ត្រាលី និងកាណាដាធ្វើពហិការកីឡាអូឡាំពិករដូវរងារនៅក្រុងប៉េកាំងទៀតផង ដើម្បីប្រឆាំងនឹងការរំលោភសិទ្ធិមនុស្សធ្ងន់ធ្ងរធ្វើឡើងដោយអជ្ញាធរចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ