នគរបាលឡាវ ចាប់ឃាត់បានគ្រឿងញៀនមេតំហ្វេតាមីន ក្នុងទំហំដ៏ធំជាលើកទី២
យោងតាមការប្រកាសឲ្យដឹង ពីមន្ត្រីជំនាញអង្គការសហប្រជាជាតិ កាលពីថ្ងៃសៅរ៍ទី២៩មករា នគរបាលឡាវ បានចាប់ឃាត់ថ្នាំញៀនប្រភេទម៉េតំហ្វេតាមីន បានចំនួន៣៦លានគ្រាប់ នៅក្នុងខេត្តបូកែវ ស្ថិតក្នុងតំបន់ត្រីកោណមាស។ នេះគឺជាយុទ្ធនាការរឹបអូសថ្នាំញៀន ក្នុងទំហំធំជាលើកទី២ហើយ ដែលអាជ្ញាធរឡាវបានសម្រេចបាន នៅក្នុងតំបន់នេះ បើគិតពីខែតុលាឆ្នាំមុន ដែលអាជ្ញាធរឡាវបានចាប់ឃាត់បានចំនួន ៥៥លានគ្រាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
ខេត្តបូកែវស្ថិតនៅភាគខាងជើងឡាវ ជាប់ព្រំដែនភូមា និងថៃ គឺជាដែនដីដាច់ស្រយ៉ាលក្នុងតំបន់ត្រីកោណមាស។ តំបន់នេះ គឺជាជង្រុកនៃការជួញដូរគ្រឿងញៀន ដែលភាគច្រើនលើសលុប ត្រូវគេផលិតក្នុងរដ្ឋហ្សាន របស់ភូមា។ ចាប់តាំងពីថៃ បានរិតបន្តឹងការយាមព្រំដែន ដើម្បីទប់ស្កាត់ការឆ្លងរាលដាលកូវីដមក ឡាវបានក្លាយជាច្រកទ្វារដ៏សំខាន់ ដែលឈ្មួញទុច្ចរិតនាំគ្រឿងញៀន ចេញពីភូមា ឆ្លងចូលឡាវ មុននឹងនាំឆ្លងទន្លេមេគង្គ ទៅកាន់ប្រទេសថៃ។
យោងតាមលោក Jeremy Douglas មន្ត្រីអង្គការសហប្រជាជាតិទទួលបន្ទុកការប្រយុទ្ធប្រឆាំងគ្រឿងញៀនប្រចាំតំបន់អាស៊ី គឺសមត្ថកិច្ចឡាវ ទើបតែបានចាប់ឃាត់គ្រឿងញៀនក្នុងទ្រង់ទ្រាយធំ ជាថ្មីម្តងទៀត។ ការចុះចាប់ បានធ្វើឡើងកាលពីថ្ងៃពុធទី២៦មករា នៅក្នុងឃុំ Huay Xai ដោយក្នុងនោះនគរបាលឡាវ បានរឹបអូសបាន ថ្នាំគ្រាប់មេតំហ្វេតាមីន ចំនួន៣៦លានគ្រាប់ ព្រមជាមួយសារធាតុមេតំហ្វេតាមីនគ្រីស្តាល់ ចំនួនប្រមាណ៥៩០គីឡូក្រាម។
ប្រភពដដែលនេះ អះអាងថា មនុស្សចំនួន៤នាក់ ត្រូវបានគេចាប់ឃាត់ខ្លួន តែសុទ្ធតែជាមនុស្សតូចតាច នៅជាន់ក្រោមបំផុត នៃបណ្តាញជួញដូរទុច្ចរិតនេះ។ យោងតាមរូបថា ដែលបណ្តាញព័ត៌មានបារាំងAFP បានឃើញ គឺគេឃើញជនល្មើសទាំង៤នាក់ ឈរថតជាមួយសមត្ថកិច្ចឡាវ នៅពីខាងមុខគំនរថ្នាំញៀនច្រកបាវ។ ដោយឡែក បណ្តាញព័ត៌មានថៃបានផ្សព្វផ្សាយថា សមត្ថកិច្ចឡាវ បានចាប់ឃាត់ថ្នាំញៀនហេរ៉ូអ៊ីន មួយចំនួន ព្រមទាំងកាំភ្លើងហ្វុយហ្ស៊ីលមួយដើមផងដែរ។
យោងតាមលោក Jeremy Douglas ថ្នាំគ្រាប់មេតំហ្វេតាមីន ជាទូទៅគឺត្រូវឈ្មួញបញ្ជូនចូលទៅទៅផ្សារប្រទេសថៃ ចំណែកសាធារធាតុមេតំហ្វេតាមីនគ្រីស្តាល់ ឬហៅថាម៉ាទឹកកកនោះ គឺអាចសំដៅបញ្ជូនទៅ អូស្ត្រាលីដែលគេលក់បានថ្លៃជាង។ អ្នកជំនាញរូបនេះអះអាងថា ថ្នាំគ្រាប់ម៉េតំហ្វេតាមីនសំបូរខ្លាំងណាស់ នៅអាស៊ីអាគ្នេយ៍ ដែលធ្វើឲ្យតម្លៃចុះថោកខ្លាំង។
ជាមួយនឹងវិបត្តិនយោបាយ និងសេដ្ឋកិច្ចនៅភូមា បណ្តាលមកពីរដ្ឋប្រហារផង និងជម្ងឺឆ្លងកូវីដ១៩ ធ្វើឲ្យក្រុមអ្នកផលិតគ្រឿងញៀននៅភូមា បន្ថែមការផលិតកាន់តែច្រើនដើម្បីលក់ប្រមូលប្រាក់។ ជាងនេះទៀត ភាពចលាចល អស្ថិរភាពនៅភូមា ដោយគ្មានរដ្ឋបាលអាជ្ញាធរត្រឹមត្រូវ គឺវាបានបើកដៃឲ្យមានការនាំចូលគ្រឿងផ្សំសារធាតុគីមី ដើម្បីផលិតជាគ្រឿងញៀន យ៉ាងទូលំទូលាយ ដោយគ្មានការសមត្ថកិច្ចណាអើរពើឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ