ក្រុមអ្នកជំនាញច្បាប់ការងារនៃអង្គការ ILO សម្តែងក្តីបារម្ភពីការងារពួកអ៊ុយហ្គួរក្នុងខេត្តស៊ីនជាំង
អង្គការពលកម្មអន្តរជាតិហៅកាត់ ILO បានចេញផ្សាយរបាយការណ៍ប្រចាំឆ្នាំរបស់ខ្លួនក្នុងថ្ងៃសុក្រ ទី១១ កុម្ភៈ។ នៅក្នុងរបាយការណ៍ គណៈកម្មាធិការនៃក្រុមអ្នកជំនាញច្បាប់ការងារបានសម្តែងក្តីបារម្ភយ៉ាងខ្លាំងចំពោះទង្វើរបស់រដ្ឋអំណាចចិនលើក្រុមជនជាតិភាគតិច ពិសេសពួកអ៊ុយហ្គួរក្នុងខេត្តស៊ីនជាំង។ ទង្វើរបស់រដ្ឋអំណាចចិនដែលគណៈកម្មាធិការនេះចង់និយាយ គឺការចាប់ពួកអ៊ុយហ្គួរឲ្យធ្វើការងារដោយបង្ខំ។ ប្រតិកម្មភ្លាមៗ ចិនបានច្រានចោលយ៉ាងដាច់អហង្ការលើការចោទប្រកាន់នេះ។
ចុះផ្សាយនៅថ្ងៃ៖
ស្តាប់ - ០២:១៣
គណៈកម្មាធិការនៃក្រុមអ្នកជំនាញឯករាជ្យដែលមានសមាជិក ២០រូបមានតួនាទីជាអ្នកវាយតម្លៃលើការអនុវត្តន៍សន្ធិសញ្ញានៃអង្គការពលកម្មអន្តរជាតិ ILO នៅក្នុងប្រទេសនីមួយៗ។ សម្រាប់ប្រទេសចិន គណៈកម្មាធិការបានសម្តែងក្តីបារម្ភជាពន់ពេកចំពោះនយោបាយការងារចាប់បង្ខំដែលរដ្ឋអំណាចចិនបានធ្វើទៅលើក្រុមជនជាតិភាគតិច ពិសេសលើពួកអ៊ុយហ្គួរអ្នកកាន់សាសនាអ៊ីស្លាមក្នុងខេត្តស៊ីនជាំង។ ការលើកឡើងរបស់គណៈកម្មាធិការនៃក្រុមអ្នកជំនាញបានធ្វើឡើងដោយផ្អែកលើឯកសាររបស់សហព័ន្ធសហជីពអន្តរជាតិ។ គួរបញ្ជាក់ថាតាមក្រុមអង្គការសិទ្ធិមនុស្ស មានពួកអ៊ុយហ្គួរយ៉ាងតិច ១លាននាក់ត្រូវបានចិនឃុំនៅក្នុងជំរំលត់ដំ ធ្វើទារុណកម្ម និងចាប់បង្ខំឲ្យធ្វើការងារ។
តែចិនតែងបដិសេធ និងបានបញ្ជាក់ច្រើនដងថា ជំរំនោះជាជំរំបង្ហាត់បង្រៀនវិជ្ជាជីវៈក្នុងគោលដៅអប់រំ និងអូសទាញពួកអ៊ុយហ្គួរកុំឲ្យធ្លាក់ក្នុងអំពើភេរវនិយម និងផ្តាច់ទឹកដីនិយម។ យ៉ាងណាក៏ដោយ គណៈកម្មាធិការនៃក្រុមអ្នកជំនាញបានជំរុញឲ្យចិនធ្វើអ្វីៗគ្រប់យ៉ាងដើម្បីជួយដល់ផលប្រយោជន៍របស់ក្រុមជនជាតិភាគតិចដោយផ្អែកតាមការចង់បានរបស់ពួកគេ និងតាមតម្រូវការក្នុងសង្គម។ ទន្ទឹមគ្នានេះ គណៈកម្មាធិការនៃក្រុមអ្នកជំនាញក៏បានស្នើជាលក្ខណៈទូទៅឲ្យចិនឈប់រារាំងដល់រោងចក្រ សហគ្រាស និងក្រុមសហជីពក្នុងការបំពេញតួនាទីត្រឹមត្រូវរបស់ពួកគេ។
បន្ទាប់មក គណៈកម្មាធិការរបស់អង្គការ ILO ដដែលនេះក៏បានស្នើឲ្យចិនបញ្ជូនព័ត៌មានលំអិតស្តីពីវិធានការដែលបានអនុម័តទាក់ទងនឹងការប្តេជ្ញាចិត្តក្នុងការគោរពត្រឹមត្រូវលើច្បាប់ការងារស្មើភាពដោយគ្មានការបែងចែកប្រភេទមនុស្សនៅតាមមជ្ឈមណ្ឌលបង្ហាត់បង្រៀនវិជ្ជាជីវៈក្នុងខេត្តស៊ីនជាំង ឬមួយក៏ទាក់ទងនឹងពួកអ៊ុយហ្គួរណាដែលចង់ស្វែងរកការងារធ្វើនៅក្រៅខេត្តស៊ីនជាំង។ អាមេរិកក៏ដូចអង់គ្លេសបានសាទរលើរបាយការណ៍រិះគន់ចិនរបស់ ILO។ តែចិនបានច្រានចោលរបាយការណ៍នេះយ៉ាងដាច់អហង្ការ និងបានចោទសហព័ន្ធសហជីពអន្តរជាតិពីបទមើលមិនឃើញពីភាពរីកចម្រើនដែលចិនបានធ្វើនៅក្នុងខេត្តស៊ីនជាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ