ឥណ្ឌូណេស៊ីផ្អាកការនាំចេញផលិតផលដូងប្រេង និងប្រេងដូង
ដើម្បីការពារតម្រូវការទីផ្សារផ្ទៃក្នុងប្រទេស និងដើម្បីបន្ធូរបន្ថយកំហឹងសង្គម រដ្ឋាភិបាលឥណ្ឌូណេស៊ី បានប្រកាសផ្អាកការនាំចេញ ប្រេងឆា (ចម្រាញ់ពីដូងប្រេង) គ្រប់ទម្រង់ ចាប់ពី ថ្ងៃព្រហស្បតិ៍ទី ២៨មេសា វេលាម៉ោង២៤អាធ្រាត្រនេះតទៅ។ សេចក្តីសម្រេចរបស់ឥណ្ឌូណេស៊ី អាចនឹងបង្កបញ្ហាដល់ប្រទេសនាំចូលជាច្រើន និងបង្កឱ្យមានអស្ថិរភាពទីផ្សារប្រេងឆាកាន់តែខ្លាំង។
ចុះផ្សាយនៅថ្ងៃ៖
ស្តាប់ - ០២:០១
ឥណ្ឌូណេស៊ីជាប្រទេសនាំចេញប្រេងដូង និងផលិតផលដូងប្រេង (៣៤,២លានតោន) លំដាប់ទីមួយពិភពលោក ត្រូវជា៦០%ទីផ្សារប្រេងដូងសកល និងមួយភាគបី សម្រាប់បម្រើទីផ្សារក្នុងស្រុក។ ប៉ុន្តែតាំងពីជាច្រើនខែមកនេះ ឥណ្ឌូណេស៊ីប្រឈមនឹងកង្វះប្រេងឆា ធ្វើពីដូងប្រេងយ៉ាងខ្លាំង ហើយតម្លៃក៏ហក់ឡើងយ៉ាងខ្ពស់ ៖ ១០%នៅថ្ងៃម្សិលមិញ និងដល់ទៅ ៦៣%ក្នុងរយៈពេលតែមួយឆ្នាំ។ ប្រជាពលរដ្ឋសាមញ្ញបន្តកន្ទុយកាន់តែវែងនិងរង់ចាំកាន់យូរឡើងៗ ដល់រាប់ម៉ោង នៅមុខមណ្ឌលចែកចាយរដ្ឋ តាមទីក្រុងនានា ទម្រាំអាចរកទិញប្រេងដែលជាប្រភពចម្អិនអាហារដ៏សំខាន់ផុតនៅឥណ្ឌូណេស៊ី ក្នុងតម្លៃថោកបាន។ ប្រជាពលរដ្ឋចាប់មានកំហឹងនិងចាប់នាំគ្នាធ្វើបាតុកម្មនៅតាមទីប្រជុំធំៗមួយចំនួនហើយ។
ប្រឈមនឹងស្ថានភាពបែបនេះ និងដើម្បីកុំឱ្យមានភាពតឹងសង្គមទាន់ ប្រធានាធិបតីឥណ្ឌូណេស៊ី បានប្រកាសផ្អាកការនាំចេញប្រេងឆានេះ គ្រប់ទម្រង់ រាប់ទាំងដូងប្រេងឆៅតែម្តង រហូតណាតែតម្លៃប្រេងបោះដុំក្នុងស្រុក ធ្លាក់មកនៅត្រឹម១៤០០០រូពី (៩៥សេនដុល្លារ)វិញ។ វិធានការនេះបានទទួលការស្វាគមន៍ពីប្រជាជន ប៉ុន្តែមិនប្រាកដថានឹងអាចដោះស្រាយបញ្ហាបានទេ ព្រោះបញ្ហាមិនស្ថិតនៅត្រង់ទិន្នផលដូងប្រេងទេ។ បើតាមអ្នកវិភាគ កង្វះប្រេងឆា បណ្តាលមកពីប្រព័ន្ធចែកចាយនិងប្រព័ន្ធបំរុងទុក របស់ឥណ្ឌូណេស៊ី ដោយក្រុមហ៊ុនអ្នកផលិតចង់តែនាំចេញទៅទីផ្សារអន្តរជាតិដែលកំពុងមានតម្លៃខ្ពស់ខ្លាំង។
ក្នុងកំរិតពិភពលោក សេចក្តីសម្រេចផ្អាកការនាំចេញផលិតផលដូងប្រេងរបស់ឥណ្ឌូណេស៊ី នឹងធ្វើឱ្យចិន ឥណ្ឌា ប៉ាគីស្ថាន បង់ក្លាដែស ឬអេហ្ស៊ីប ជួបបញ្ហាខ្វះប្រេងឆាបរិភោគមុននិងខ្លាំងជាងគេ ហើយតម្លៃប្រេងដែលឡើងថ្លៃស្រាប់ នឹងបន្តឡើងថែមទៀត។ ឥណ្ឌូណេស៊ីផ្ទាល់ខ្លួន អាចនឹងត្រូវរងការផាកពិន័យពីបទផ្តាច់កិច្ចសន្យានាំចេញប្រេងឆា និងអាចជាប់បណ្តឹងនៅអង្គការពាណិជ្ជកម្មពិភពលោកផង ប្រសិនបើការនាំចេញត្រូវផ្អាកក្នុងរយៈពេលវែង។
សូមបញ្ជាក់ថា តាំងពីខែមីនា២០២២មក ប្រេងឆាសម្រាប់បរិភោគ គ្រប់ប្រភេទ បានឡើងថ្លៃដល់កំពូលមិនធ្លាប់មានក្នុងប្រវត្តិសាស្ត្រ និងធ្វើឱ្យពិភពលោកជួបវិបត្តិផ្គត់ផ្គង់ប្រេងបរិភោគ ព្រោះតែរុស្ស៊ីនិងអ៊ុយក្រែនដែលជាប្រទេសផលិតប្រេងឆាផ្កាឈូករត្ន័ លំដាប់ទីមួយនិងទីពីរពិភពលោក រវល់ធ្វើសង្គ្រាមនឹងគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ