រុស្ស៊ីប្រកាសផ្អាកឈប់បាញ់ នៅរោងចក្រស្លរដែកទីក្រុងម៉ារីយូប៉ូល ដើម្បីរំដោះប្រជាជនស៊ីវីល
នៅព្រឹកថ្ងៃព្រហស្បតិ៍ទី ៥ឧសភា ក្រសួងការពារជាតិរុស្ស៊ីបានប្រកាសថា កងទ័ពរុស្ស៊ីនឹងផ្អាកឈប់បាញ់ រយៈពេល៣ថ្ងៃ នៅក្រុងម៉ារីយូប៉ូល ដើម្បីអនុញ្ញាតឲ្យរំដោះប្រជាជនស៊ីវីល។ បច្ចុប្បន្ននេះ មានប្រជាជនស៊ីវីលអ៊ុយក្រែន និងទាហានរបួសជាច្រើនរយនាក់ ដែលកំពុងលាក់ខ្លួននៅរូងក្រោមដី ក្នុងរោងចក្រស្លរដែក Azovstal ស្ថិតនៅជាយក្រុងម៉ារីយូប៉ូល។
ចុះផ្សាយនៅថ្ងៃ៖
ស្តាប់ - ០៩:០០
ផ្អាកប្រយុទ្ធ៣ថ្ងៃ ពីម៉ោង ៨ព្រឹក ដល់ម៉ោង៦ល្ងាច
ក្រសួងការពារជាតិរុស្ស៊ីបានប្រកាសថា ខាងភាគីគេ ដែលមានកងទ័ពរុស្ស៊ី រួមជាមួយកងកម្លាំងសាធារណរដ្ឋផ្តាច់ខ្លួនដូណេតស៍ នឹងផ្អាកការប្រយុទ្ធដោយឯកតោភាពគី ចន្លោះពីម៉ោង ៨ព្រឹក រហូតដល់ម៉ោង៦ល្ងាច ម៉ោងនៅរុស្ស៊ី រយៈពេល៣ថ្ងៃ គឺថ្ងៃទី៥ ទី៥ និងទី៧ឧសភា។ មិនមែនផ្អាកការប្រយុទ្ធនៅក្រុងម៉ារីយូប៉ូល ទាំងមូលទេ គឺផ្អាកនៅតែតំបន់រោងចក្រស្លរដែក Azovstal ដែលមានជនស៊ីវីលព្រមទាំងទាហានអ៊ុយក្រែន សំងំលាក់ខ្លួននៅទីនោះ ជាច្រើនរយនាក់។
ក្រសួងការពារជាតិរុស្ស៊ីបានធានាថា ប្រជាជនស៊ីវីលអ៊ុយក្រែន ដែលជាប់នៅរោងចក្រនោះ នឹងត្រូវអនុញ្ញាតឲ្យចាកចេញពីតាំងនេះ ដោយអាចចេញទៅខាងទឹកដី ក្រោមការកាន់កាប់របស់រុស្ស៊ីក៏បាន ទៅខាងអ៊ុយក្រែនក៏បាន។ ជាការពិត យើងបានឃើញកន្លងមកថា ការរំដោះមនុស្សចេញពីម៉ារីយូប៉ូលនេះ បានការលំបាក និងជួបបរាជ័យច្រើនដងមកហើយ ដោយភាគីអ៊ុយក្រែន អះអាងថាខាងរុស្ស៊ីមិនបានធានាសុវត្ថិភាពឲ្យបានពេញលេញទេ ហើយថែមទាំងមានការវាយឆ្មក់ ទម្លាក់គ្រប់តាមច្រកចេញថែមទៀតផង។
តែយ៉ាងណា ប៉ុន្មានថ្ងៃចុងក្រោយនេះ គេបានរំដោះមនុស្សចេញពីរោងចក្រស្លរដែក Azovstal បានចំនួន២លើកហើយ ដោយមានអន្តរាគមន៍ជួយពីអង្គការសហប្រជាជាតិ។ កាលពីថ្ងៃចន្ទ គេបានរំដោះបានចំនួនជាង១០០នាក់ ហើយនៅថ្ងៃពុធ គេបានរំដោះបានចំនួន ៣៤៤នាក់ទៀត ដោយដឹកយកចេញទៅកាន់ ក្រុងZaporijjia ស្ថិតនៅខាងអ៊ុយក្រែន ចំងាយប្រមាណ២៣០គីឡូម៉ែត្រ ពីម៉ារីយូប៉ូល។ នៅក្នុងសារវីដេអូ របស់លោកហ្សេឡេនស្គី កាលពីយប់មិញ លោកបានលើកឡើងថា លោកទើបតែបាននិយាយទូរស័ព្ទ ជាមួយលោកអគ្គលេខាធិការអង្គការសហប្រជាជាតិ ដើម្បីរកវិធីរំដោះមនុស្សចេញពីម៉ារីយូប៉ូលបន្តទៀត ព្រោះថានៅសល់ច្រើនរយអ្នកណាស់ ទាំងប្រជាជនស៊ីវីល ស្ត្រី កុមារ និងទាហានរបួស ដែលកំពុងលាក់ខ្លួននៅរូងក្រោមដី ក្នុងរោងចក្រស្លរដែក Azovstal។
អ្នកនាំពាក្យវិមានក្រឹមឡាំង អះអាងថាច្រកផ្លូវមនុស្សធម៌បានដំណើរការដូចការគ្រោងទុក
មេបញ្ជាការកងទ័ពអ៊ុយក្រែន ម្នាក់បានអះអាង កាលពីថ្ងៃពុធថា កងទ័ពរុស្ស៊ីកំពុងត្រៀមបើកប្រតិបត្តិការប្រយុទ្ធទ្រង់ទ្រាយធំ នៅតំបន់រោងចក្រស្លរដែក ដើម្បីបំបែកកម្លាំងចុងក្រោយរបស់អ៊ុយក្រែន នៅម៉ារីយូប៉ូល។ ក៏ប៉ុន្តែ នៅល្ងាចថ្ងៃពុធ ខាងភាគីរុស្សី បានបដិសេធថាមិនពិតទេ គេមិនមានគម្រោងបើកការវាយប្រហារនៅរោងចក្រស្លរដែកនេះទេ។ តែយ៉ាងណា នៅវេលាម៉ោង ៤ទាបភ្លឺថ្ងៃព្រហស្បតិ៍នេះ កងទ័ពអ៊ុយក្រែនអះអាងថា កងទ័ពរុស្ស៊ីបានបើកការវាយប្រហារ ទំលាក់គ្រាប់ពីលើអាកាសផង បាញ់ប្លោងគ្រាប់ផង នៅតំបន់រោងចក្រស្លរដែក Azovstal ដើម្បីធ្វើយ៉ាងណា ដណ្តើមកាន់កាប់តំបន់នេះឲ្យបាន។
ដោយឡែក លោក Dmitri Peskov អ្នកនាំពាក្យវិមានក្រឹមឡាំង ទើបតែបានអះអាងប្រាប់អ្នកកាសែត នៅមុននេះបន្តិចថា កងទ័ពរុស្ស៊ីពិតជាបានផ្អាកការប្រយុទ្ធពិតមែន។ លោកបានបញ្ជាក់ទៀតថា ច្រកផ្លូវមនុស្សធម៌ ដើម្បី រំដោះមនុស្សចេញពីរោងចក្រស្លរដែក Azovstal នេះ គឺបានចាប់ផ្តើមដំណើរការហើយ ដូចអ្វីដែលក្រោងទុក។
កងទ័ពរុស្ស៊ីហាត់សមប្រើមីស៊ីលដែលអាចបំពាក់ក្បាលគ្រាប់នុយក្លេអ៊ែរ នៅកាលីនីនហ្ក្រាដ
ដូចអ្វីដែលភាគីរុស្ស៊ីបានបញ្ជាក់ គឺថាគេផ្អាកឈប់ប្រយុទ្ធ៣ថ្ងៃ តែនៅតំបន់រោងចក្រស្លរដែក Azovstal ប៉ុណ្ណោះ។ ដូច្នេះ កន្លែងផ្សេង គឺគេនៅតែប្រយុទ្ធ នៅតែវាយប្រហារដដែល។ នៅភាគខាងកើត ក្នុងតំបន់ដូណេតស្គ៍ គ្រាប់របស់រុស្ស៊ីបានធ្លាក់នៅភូមិ Chandrygolove បណ្តាលឲ្យស្លាបឮមនុស្ស២នាក់ របួស១១នាក់ សុទ្ធតែប្រជាជនស៊ីវីលទាំងអស់។ នេះបើផ្អែកតាមលោក Pavlo Kyrylenko អភិបាលខាងអ៊ុយក្រែន នៃតំបន់ដូណេតស្គ៍។ នៅខារគីវ គ្រាប់រុស្ស៊ី ក៏បានសម្លាប់ជិវិតមនុស្សម្នាក់ និងរបួសកុមារម្នាក់ដែរ កាលពីថ្ងៃពុធ។
កងទ័ពរុស្ស៊ីក៏បានបាញ់ប្លោងគ្រាប់ ទៅកាន់ភាគខាងលិច ជាច្រើនទីតាំង ដូចជានៅក្បែរក្រុង Lviv ក្បែរព្រំដែនប៉ូឡូញ ព្រមទាំងតំបន់ភ្នំ ក្បែរព្រំដែនហុងគ្រីថែមទៀតផង។ ដោយឡែក នៅ Mykolaiv និង Kherson ទីក្រុងភាគខាងត្បូង កងទ័ពអ៊ុយក្រែនបានអះអាងថា នៅព្រឹកថ្ងៃព្រហស្បតិ៍នេះថា គេបានប្រឹងប្រែងវាយដណ្តើមដែនដីខ្លះមកវិញ ពីសត្រូវ។
ជាមួយគ្នានេះដែរ កងទ័ពបេឡារុស បានប្រកាសកាលពីថ្ងៃម្សិលមិញ គេបានចាប់ផ្តើមធ្វើសមយុទ្ធយោធា នៅខាងទឹកដីគេ។ ជាសមយុទ្ធដើម្បីសាកល្បងសមត្ថភាព ប្រតិកម្មរហ័សរបស់កងទ័ពបេឡារុស។ នេះបើផ្អែកតាមការប្រកាសរបស់ក្រសួងការពារជាតិបេឡារុស។ ក្រៅពីនេះទៀត រុស្ស៊ីបានប្រកាសនៅល្ងាចថ្ងៃពុធម្សិលមិញ ថាកងទ័ពគេ បានចាប់ផ្តើមហាត់សមបាញ់មីស៊ីល ដែលអាចបំពាក់ក្បាលគ្រាប់នុយក្លេអ៊ែរ នៅតំបន់ Kaliningrad ដែលជាដែនដីរុស្ស៊ី ដាច់ស្រយ៉ាល នៅចម្លោះប៉ូឡូញ និងលីទុយអានី។ ក្រសួងការពារជាតិរុស្ស៊ីអះអាងទៀតថា ទាហានប្រមាណជាង១០០នាក់ ដែលចូលរួមក្នុងប្រតិបត្តិការនេះ ក៏បានហាត់សាកល្បង ក្នុងលក្ខខណ្ឌមានសារធាតុវិទ្យុសកម្មនុយក្លេអ៊ែរ និងសារធាតុពុលគីមីផ្សេងទៀតផងដែរ។ ជាមួយនឹងការប្រកាស ស្តីពីការហាត់សមរបស់កងទ័ពរុស្ស៊ីនេះ គឺមានទម្រង់លក្ខណៈជាការគំរាម ថារុស្ស៊ីអាចនឹងប្រើអាវុធនុយក្លេអ៊ែរ។
ព័ត៌មានរបស់ចារកិច្ចអាមេរិក អនុញ្ញាតឲ្យអ៊ុយក្រែនសម្លាប់បានមេទ័ពធំៗរបស់រុស្ស៊ីជាង១០នាក់
កាសែត New York Times បានផ្សាយកាលពីថ្ងៃពុធម្សិលមិញ ដោយស្រង់ប្រភពពីមន្ត្រីអាមេរិក ថាទីភ្នាក់ការចារកិច្ចអាមេរិក បានជួយផ្តល់ព័ត៌មាន ដើម្បីឲ្យអ៊ុយក្រែនសម្លាប់មេទ័ពធំៗរបស់រុស្ស៊ី ដល់ទៅជាង១០នាក់ឯណោះ។
ក្រុមប្រឹក្សាសន្តិសុខជាតិអាមេរិក NSC បានប្រតិកម្មថា ការចុះផ្សាយរបស់កាសែត New York Times ដែលថាភ្នាក់ងារចារកិច្ចអាមេរិក បានផ្តល់ព័ត៌មានដើម្បីឲ្យកងទ័ពអ៊ុយក្រែន សម្លាប់មេទ័ពធំៗរបស់រុស្ស៊ីនោះ គឺវាជាការចុះផ្សាយដោយគ្មានការទទួលខុសត្រូវ។ លោកស្រី Adrienne Watson អ្នកនាំពាក្យ ក្រុមប្រឹក្សាសន្តិសុខជាតិអាមេរិក បានបញ្ជាក់នៅក្នុងអ៊ីម៉េលថា ទីភ្នាក់ងារចារកិច្ចអាមេរិក បានផ្តល់ទិន្នន័យព័ត៌មាន ជួយកងទ័ពអ៊ុយក្រែនមែន តែមិនមែនក្នុងគោលបំណង កម្មវត្ថុទៅសម្លាប់មេទ័ពធំៗរបស់រុស្ស៊ីនោះទេ។
ដោយឡែក បើតាមការចុះផ្សាយរបស់ កាសែត New York Times ដែលស្រង់ប្រភពពីមន្ត្រីអាមេរិកជាច្រើននាក់ គឺថា ទិន្នន័យព័ត៌មានដែលអាមេរិកផ្តល់ឲ្យ គឺដើម្បីជួយអ៊ុយក្រែន នៅកៀកផ្ទាល់នឹងសមរភូមិប្រយុទ្ធតែម្តង ដូចជាការកំណត់ទីតាំង ព្រមទាំងព័ត៌មានលំអិតផ្សេងទៀត ទាក់ទិននឹងទីបញ្ជាការដ្ឋានរបស់ទ័ពរុស្ស៊ី ដែលចល័តផ្លាស់ទី។ បើតាមន័យនេះ គឺវាអាចដែលកងទ័ពអ៊ុយក្រែន បានបើកការវាយប្រហារ ទៅលើទីតាំងរបស់ទ័ពរុស្ស៊ី ដោយយោងលើព័ត៌មានរបស់ទីភ្នាក់ងារចារកិច្ចអាមេរិក។ ហើយការវាយប្រហារនោះ ទោះចេតនា ឬមិនចេតនា គឺវាបានបណ្ដាលឲ្យស្លាប់មេទ័ពធំៗរបស់រុស្ស៊ីមែន។ បើតាមប្រភពមួយចំនួន គិតចាប់ពីថ្ងៃរុស្ស៊ីផ្តើមធ្វើសង្គ្រាមនៅអ៊ុយក្រែន គឺយ៉ាងហោចមេទ័ពធំៗរបស់រុស្ស៊ីចំនួន ១២នាក់ បានស្លាប់នៅសមរភូមិ។
យ៉ាងណាមិញ កាលពីថ្ងៃចន្ទ ក្រសួងការពារជាតិអាមេរិក បានអះអាងថា អគ្គមេបញ្ជាការកងទ័ពរុស្ស៊ី ឈ្មោះ Valéri Guerrassimov បានទៅដល់សមរភូមិតំបន់ដុនបាស រយៈពេលច្រើនថ្ងៃ ដែលមានន័យថា មេទ័ពធំៗរបស់រុស្ស៊ីចុះទៅកៀកខ្លាំងណាស់ នឹងសមរភូមិប្រយុទ្ធ។ កងទ័ពអ៊ុយក្រែន បានអះអាងថាមាន ផ្ទុះគ្រាប់នៅក្រុង Izioum ក្នុងតំបន់ដុនបាស ដោយបណ្តាលឲ្យមានមន្ត្រីទ័ពធំៗរបស់រុស្ស៊ីរបួសច្រើននាក់។ លោកអគ្គមេបញ្ជាការកងទ័ពរុស្ស៊ី Valéri Guerrassimov ក៏ស្ថិតនៅទីនោះដែរ នេះបើផ្អែកតាមទីប្រឹក្សាពិសេសរបស់ប្រធានាធិបតីអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ