កូរ៉េខាងត្បូង ប្តឹងចោទប្រកាន់អតីតប្រធានអង្គភាពចារកិច្ច២នាក់ ពីបទរំលោភអំណាច
នៅកូរ៉េខាងត្បូង, អតីតប្រធានផ្នែកចារកិច្ច ២រូប ត្រូវដាក់ឲ្យឋិតក្នុងការស៊ើបអង្កេតរបស់តុលាការ ជុំវិញបទចោទប្រកាន់របស់ រដ្ឋអាជ្ញា ពីបទរំលោភអំណាច, ការគ្រប់គ្រងការងារមិនល្អ ហើយនិងក្តីសង្ស័យថា មានការជ្រៀតជ្រែកកិច្ចការមួយចំនួន ដែលនាំឲ្យបម្រើផលប្រយោជន៍កូរ៉េខាងជើង ប្រទេសជាសត្រូវ។ តើអាចទេ ដែលថា អតីតរដ្ឋាភិបាលកូរ៉េខាងត្បូង ក្រោមអាណត្តិប្រធានាធិបតីចាស់ បានព្យាយាមលាក់បាំងសំណុំរឿងឧក្រិដ្ឋមួយចំនួន ក្នុងបំណងសម្រួលយុទ្ធសាស្ត្រនយោបាយរបស់ខ្លួន?
ចុះផ្សាយនៅថ្ងៃ៖
ស្តាប់ - ០២:២០
នៅក្រុងសេអ៊ូល ក្នុងសប្តាហ៍នេះ គឺមានការសង្ស័យនិងចោទប្រកាន់ប្តឹងផ្តល់ចំពោះអតីតប្រធានទីភ្នាក់ងារចារកិច្ច កូរ៉េខាងត្បូង ចំនួនពីរនាក់។ ម្នាក់ឈ្មោះ ផាក់ ជើ-វុន (Park Jie-won) និងម្នាក់ទៀតលោក សុះ ហ៊ុន (Suh Hoon)។ អ្នកទាំងទ្វេ សុទ្ធកាន់តំណែងបន្តបន្ទាប់គ្នា ជាប្រធានចារកិច្ច នៅក្រោមអាណត្តិប្រធានាធិបតី ម៉ូន ចៃអ៊ីន ដែលទើបបញ្ចប់នៅខែឧសភាកន្លងទៅ។
នៅថ្ងៃពុធ ទី៦កក្កដា ឆ្នាំ២០២២ ទីភ្នាក់ងារចារកិច្ច កូរ៉េខាងត្បូង បានដាក់ពាក្យប្តឹង និងដែលត្រូវ អយ្យការ បានបើកការចោទប្រកាន់ ទៅលើលោក ផាក់ ជើ-វុន ជុំវិញករណីសង្ស័យថា អតីតប្រធានចារកិច្ចរូបនេះ បានលុបចោលរបាយការណ៍ស៊ើបអង្កេតឃាតកម្ម មន្ត្រីខាងនេសាទម្នាក់ ដែលកំពុងបំពេញការងារនៅក្បែរសមុទ្រជាប់ដែនទឹកកូរ៉េខាងជើង។ មន្ត្រីនេះ ត្រូវ ឆ្មាំសមុទ្រកូរ៉េខាងជើង បាញ់សម្លាប់ នៅខែកញ្ញា ឆ្នាំ២០២០។ រដ្ឋាភិបាលក្រុងសេអ៊ូល កាលនោះ បានបិទសេចក្តីសន្និដ្ឋានថា មន្ត្រីនេសាទរូបនោះ ត្រូវគេសម្លាប់ ព្រោះតែបានរត់ចោលជួរ ទៅចូលទឹកដីកូរ៉េខាងជើង។ នោះជាការសន្និដ្ឋានដែលគ្មានភស្តុតាងរហូតមកទល់នឹងពេលនេះ។ ប៉ុន្តែ នៅពេលក្រោយមក អាជ្ញាធរកូរ៉េខាងត្បូង បានដឹងថា បុរសម្នាក់នោះត្រូវគេបាញ់សម្លាប់និងដុតសាកសពចោល។ លោក ផាក់ ជើ-វុន បានការពារខ្លួនដោយច្រានចោលការចោទប្រកាន់ និងចាត់ទុកថា នេះជារឿងប្រឌិតសុទ្ធសាធ។
ចំណែក អតីតប្រធានចារកិច្ចមួយរូបទៀត លោក សុះ ហ៊ុន ត្រូវជាប់ពាក្យប្តឹងពីបទបិទខ្ទប់សំណុំរឿងមុនកាលកំណត់ ជុំវិញការបញ្ចូនអ្នកនេសាទពីរកូរ៉េខាងត្បូងពីរនាក់ទៅកាន់កូរ៉េខាងជើង ដែលផ្ទុយពីឆន្ទៈរបស់ពួកគេ។ អ្នកទាំងពីរបានសម្លាប់មនុស្សប្រមាណ១៦នាក់។ រឿងនេះបានកើតឡើង នៅខែវិច្ឆិកា ឆ្នាំ២០១៩។
ទាក់ទិននឹងសំណុំរឿងក្តីនេះ មន្ត្រីជាន់ខ្ពស់ម្នាក់ នៃ ការិយាល័យប្រធានាធិបតីកូរ៉េខាងត្បូងបច្ចុប្បន្ន បានថ្លែងក្នុងលក្ខខណ្ឌលាក់ឈ្មោះ ថា សំណុំរឿងចោទប្រកាន់ទាំង២នេះ គឺអាចចាត់ទុកថាជាឧក្រិដ្ឋកម្មប្រឆាំងមនុស្សជាតិបាន ប្រសិនបើជនជាប់សង្ស័យត្រូវតុលាការរកឃើញថា បានប្រព្រឹត្តខុសមែននោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ