កូវីដ៖ ចិនសម្រេចលើកកម្មវិធីកីឡាអូឡាំពិកអាស៊ីទៅធ្វើនៅឆ្នាំ២០២៣
បន្ទាប់ពីបានប្រកាសលើកពេលម្តង ដោយហេតុកូវីដ កម្មវិធីកីឡាអូឡាំពិកអាស៊ីឆ្នាំ២០២២ នឹងប្រព្រឹត្តទៅ ដោយយឺតយ៉ាវមួយឆ្នាំក្រោយ ពោលគឺនៅ២០២៣ នៅក្រុងហង់ចូវ Hangzhou ប្រទេសចិន។ នេះបើតាមសេចក្តីប្រកាសរបស់ស្ថាប័នទទួលបន្ទុករៀបចំកម្មវិធីកីឡា នៅថ្ងៃអង្គារទី ១៩ កក្កដា២០២២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
គ្រោងធ្វើជាដំបូង ពីថ្ងៃទី១០ដល់ថ្ងៃទី២៥កញ្ញា២០២២ និងបានប្រកាសលើកពេល ដោយគ្មានកាលកំណត់កាលពីខែឧសភា នៅទីបំផុត ក្រុមប្រឹក្សាអូឡាំពិកអាស៊ី បានសម្រេច ដោយមានការព្រមព្រៀងពីម្ចាស់ផ្ទះ រៀបចំការប្រកួតកីឡាអូឡាំពិកអាស៊ី នៅក្រុងហង់ចូវ (Hangzhou)នៅថ្ងៃទី ២៣កញ្ញាដល់ថ្ងៃ ៨តុលា ឆ្នាំ២០២៣ វិញ។
គណៈកម្មការអូឡាំពិកអាស៊ី និងគណៈកម្មការរៀបចំកីឡា បានព្រមព្រៀងរើសយកកាលបរិច្ឆេទនេះ ព្រោះគ្មានជាន់នឹងព្រឹត្តិការណ៍កីឡាអន្តរជាតិផ្សេង។ តាមធម្មតា កីឡាអូឡាំពិកអាស៊ី តែងទាក់ទាញនិងមានកីឡាករលើទ្វីបអាស៊ីជាងមួយម៉ឺននាក់ចូលរួម។
ស្ថិតនៅភាគខាងកើតប្រទេស ល្បីឈ្មោះជាក្រុងសួគ៌ មានប្រជាជនរស់នៅជាង១២លាននាក់ ហង់ចូវ បានក្លាយជាក្រុងទីបីរបស់ចិនដែលទទួលរៀបចំព្រឹត្តិការណ៍កីឡាអាស៊ី បន្ទាប់ពីប៉េកាំង កាលពីឆ្នាំ១៩៩០ និងកង់តុង កាលពីឆ្នាំ២០១០។
ក្នុងពេលប្រកាសកាលវិភាគថ្មីនៃកម្មវិធីអូឡាំពិកអាស៊ី គណៈកម្មការបានសន្យារៀបចំព្រឹត្តិការណ៍កីឡានិងវប្បធម៌ឱ្យអស្ចារ្យ។ ប៉ុន្តែអាជ្ញាធរចិននៅតែខ្វល់ខ្វាយខ្លាំងខ្លាច មិនអាចបញ្ចៀសករណីឆ្លងកូវីដនាំចូលមកពីក្រៅ ក្រោយព្រឹត្តិការណ៍ខ្នាតអន្តរជាតិ។
ជាមួយនឹងនយោបាយហ្សេរ៉ូកូវីដ ដ៏តឹងតែង ធ្វើតេស្តជាសមូហភាព ធ្វើចត្តាឡីស័កអ្នកវិជ្ជមានកូវីដ ឬបិទខ្ទប់ខេត្តក្រុងទាំងមូល នៅពេលមានលេចករណីឆ្លងក្នុងសហគមន៍ភ្លាម ចិនបានកាត់បន្ថយទំនាក់ទំនងអន្តរជាតិយ៉ាងខ្លាំង តាំងពីឆ្នាំ២០២០មក និងមិនទទួលរៀបចំព្រឹត្តិការណ៍កីឡាអន្តរជាតិអ្វីទាំងអស់ លើកលែងតែកីឡាអូឡាំពិកនិងប៉ារ៉ាអូឡាំពិករដូវរងារក្រុងប៉េកាំង កាលពីខែកុម្ភៈ-មីនា២០២២មួយចេញ។ ព្រឹត្តិការណ៍កីឡានេះ បានប្រព្រឹត្តទៅដោយជោគជ័យ និងក្លាយជាគំរូនៃការរៀបចំកីឡាអូឡាំពិកអាស៊ីឆ្នាំក្រោយ។
ចិននឹងមិនបន្ធូរបន្ថយវិធានការប្រឆាំងកូវីដទេ សម្រាប់ពេលនេះ ព្រោះអត្រាមនុស្សចាស់ចាក់ថ្នាំបង្ការនៅទាប ហើយធនធានថ្នាំព្យាបាលមានមិនគ្រប់គ្រាន់។ តាំងពីខែមីនា២០២២មក ចិនបានស្គាល់រលកចម្លងកូវីដស្ទុះឡើងខ្លាំងជាថ្មី ជាហេតុធ្វើឱ្យខេត្តក្រុងជាច្រើន មានជាអាទិ៍ក្រុងសៀងហៃដែលស្ថិតនៅចម្ងាយប្រមាណ២០០គីឡូម៉ែត្រពីក្រុងហង់ចូវ បិទខ្ទប់អស់រយៈពេលជិតពីរខែ។ បើតាមក្រសួងសុខាភិបាល នៅថ្ងៃអង្គារទី ១៩កក្កដានេះ ចិនរាប់ឃើញមានអ្នកឆ្លងថ្មីចំនួន៧០០ករណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ