រកឃើញភស្តុតាងឧក្រិដ្ឋកម្មប្រឆាំងមនុស្សជាតិនៅភូមា៖ អ្នកស៊ើបអង្កេតអង្គការសហប្រជាជាតិ
ក្រុមអ្នកស៊ើបអង្កេតរបស់អង្គការសហប្រជាជាតិកាលពីថ្ងៃអង្គារនេះបានរាយការណ៍ថាមាន ភស្តុតាងជាច្រើនដែលឆ្លុះបញ្ចាំងអំពីសកម្មភាពប្រឆាំងមនុស្សជាតិ រួមមានឃាតកម្ម ការធ្វើទារុណកម្ម និងអំពើហិង្សាផ្លូវភេទ ដែលបានប្រព្រឹត្តឡើងនៅក្នុងប្រទេសភូមា ចាប់តាំងពីមានរដ្ឋប្រហារយោធាកាលពីឆ្នាំមុនមក។ យន្តការស៊ើបអង្កេតឯករាជ្យរបស់អង្គការសហប្រជាជាតិនៅប្រទេសភូមា ក៏បានរាយការណ៍ថាជនរងគ្រោះភាគច្រើនជាស្ត្រី និងកុមារ។
ចុះផ្សាយនៅថ្ងៃ៖
ស្តាប់ - ០២:១៥
កាលពីថ្ងៃទី១ ខែកុម្ភៈ ឆ្នាំមុននេះរបបយោធាភូមាបានធ្វើ ការដណ្តើមអំណាច ដោយបណ្តេញរដ្ឋាភិបាលស៊ីវិលចេញ ហើយចាប់ខ្លួនលោកស្រី អ៊ុងសាន ស៊ូជី។ បើយោងតាមក្រុមអ្នកឃ្លាំមើលក្នុងតំបន់ របបយោធានេះធ្វើការគ្រប់គ្រងប្រទេសដោយការបង្ហូរឈាម និង ដោយអំពើហិង្សា បណ្តាលឱ្យជនស៊ីវិលជាង ២ពាន់នាក់បានស្លាប់ និង ជិត១ម៉ឺន៥ពាន់នាក់ទៀតត្រូវបានចាប់ខ្លួន។
ហេតុនេះអង្គការសហប្រជាជាតិ បានបង្កើតយន្តការស៊ើបអង្កេតឯករាជ្យមួយ នៅចុងឆ្នាំ២០១៨ ដើម្បីប្រមូលសំណុំរឿងលើឧក្រិដ្ឋកម្មនេះ។ ក្រុមស៊ើបអង្កេតនេះបានព្រមាន នៅក្នុងរបាយការណ៍ប្រចាំឆ្នាំរបស់ខ្លួនថា ក្នុងរយៈពេល ១២ ខែមកនេះ វិសាលភាពនៃឧក្រិដ្ឋកម្មអន្តរជាតិ នៅក្នុងប្រទេសភូមាបានរីកសុះសាយជាយ៉ាងខ្លាំង។
ប្រធានយន្តការស៊ើបអង្កេតឯករាជ្យនេះ បាននិយាយថា ក្រុមអ្នកស៊ើបអង្កេតរបស់លោក កំពុងផ្តោតជាពិសេសទៅលើឧក្រិដ្ឋកម្មដែលបានប្រព្រឹត្តឡើងលើស្ត្រី និងកុមារ ដែលជា បទល្មើសដ៏ធ្ងន់ធ្ងរ តែភាគច្រើនត្រូវបានគេមើលរំលង។ របាយការណ៍របស់ក្រុមនេះបានរកឃើញថា កុមារក្នុងប្រទេសភូមា ត្រូវបានគេសម្លាប់ ធ្វើទារុណកម្ម និងឃុំខ្លួនតាមអំពើចិត្ត។
ជាក់ស្តែងក្រុមស៊ើបអង្កេតរហូតមកដល់ពេលនេះ មិនទាន់ទទួលបានការអនុញ្ញាត ឱ្យចូលទៅក្នុងប្រទេសភូមានៅឡើយទេ តែទោះបីជាយ៉ាងណាក៏ដោយ ឥឡូវនេះពួកគេបាន ប្រមូលភស្ដុតាងបានជិត ៣លានច្បាប់ រួចមកហើយ ក្នុងនោះមានទាំងកិច្ចសម្ភាសន៍ ឯកសារ រូបថត និងរូបភាពភូមិសាស្ត្រផងដែរ។
ក្រុមអ្នកស៊ើបអង្កេតបាននិយាយថា ភស្តុតាងដែលពួកគេបានប្រមូលបង្ហាញថា ជម្លោះប្រដាប់អាវុធជាច្រើនដែលនៅតែបន្តកើតមាន នៅលើទឹកដីភូមា ហើយពួកគេក៏បានចង្អុលទៅលើ ការប្រហារជីវិតអ្នកទោសនយោបាយបួននាក់ កាលពីខែមុននេះ ថាជាការប្រហារជីវិតលើកដំបូងក្នុងប្រទេសក្នុងរយៈពេលជាច្រើនទសវត្សរ៍មកហើយ។
ប្រាំឆ្នាំក្រោយពីការបង្ហូរឈាមនៅឆ្នាំ២០១៧ ដែលធ្វើឱ្យមនុស្សជិតមួយលាននាក់ត្រូវបាត់បងទីលំនៅ ប្រធានក្រុមអ្នកស៊ើបអង្កេតរបស់អង្គការសហប្រជាជាតិនេះ ក៏បានគូសបញ្ជាក់ពីស្ថានភាពដែលកំពុងបន្តកើតមានចំពោះជនជាតិមូស្លីមភាគតិច រ៉ូហ៊ីងយ៉ាផងដែរ។
ជារួមជនជាតិរ៉ូហ៊ីងយ៉ាប្រហែល ជាង៨០ម៉ឺននាក់ត្រូវបានជម្លៀសខ្លួនកាន់ប្រទេសបង់ក្លាដែសហើយ ខណៈដែល ៦០ម៉ឺននាក់ទៀតនៅក្នុងប្រទេសភូមានៅឡើយ ហើយបើគ្មានការដាក់ទោសដល់ជនល្មើសនោះទេ ការការពារសុវត្តិភាព និង សនិ្តភាពរបស់ជនជាតិនេះនិងមិនអាចសម្រេចបាននោះឡើយ។
ម្យ៉ាងទៀតកាលពីខែមុន តុលាការយុត្តិធម៌អន្តរជាតិ បានសម្រេចច្រានចោលនូវការជំទាស់ពីមេដឹកនាំយោធាភូមា ហើយបានបានទទួលយកពាក្យបណ្តឹងចោទប្រកាន់ប្រទេសភូមាពីបទប្រល័យពូជសាសន៍ លើជនជាតិរ៉ូហ៊ីងយ៉ានេះផងដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ