ស្រីលង្កាយល់ព្រមឲ្យនាវារបស់ចិនចូលចត ខណៈឥណ្ឌាចោទថា ជានាវាឈ្លបយកការណ៍របស់ចិន
បន្ទាប់ពីបានស្ទាក់ស្ទើអស់ជាច្រើនថ្ងៃ ទីបំផុតទៅរដ្ឋាភិបាលស្រីលង្កា បានសម្រេចអនុញ្ញាតឲ្យនាវាមួយរបស់ចិន ចូលចតនៅកំពង់ផែក្រុងកូឡុំបូ។ ឥណ្ឌាដែលមហាអំណាចតំបន់ បានបង្ហាញការជំទាស់ប្រឆាំង ដោយបានអះអាងថា នាវារបស់ចិននោះ គឺជានាវាដែលចិនបញ្ជូនមកស៊ើប ឈ្លបយកការណ៍ នៅក្នុងមហាសមុទ្រឥណ្ឌា។
ចុះផ្សាយនៅថ្ងៃ៖
ស្តាប់ - ០២:៣៦
នាវាចិន ឈ្មោះ Yuan Wang 5 ត្រូវចូលមកចតនៅកំពង់ផែ Hambantota របស់ស្រីលង្ក កាលពីថ្ងៃទី១១សីហា។ ក៏ប៉ុន្តែ អាជ្ញាធរស្រីលង្ការ បានអេះអុញ រារែក ដោយសារតែខ្លាចការជំទាស់របស់ភាគីឥណ្ឌា។ តែទីបំផុត តំណាងគ្រប់គ្រងកំពង់ផែ បានប្រាប់អ្នកកាសែតថា ខ្លួនបានទទួលការអនុញ្ញាតជាផ្លូវការពីរដ្ឋាភិបាលស្រីលង្ការហើយ នៅថ្ងៃទី១៣សីហា។ នាវា Yuan Wang 5 របស់ចិនអាចចូលមកចត នៅកំពង់ផែទឹកជ្រៅ Hambantota ចាប់ពីថ្ងៃទី១៦ ដល់ថ្ងៃទី២២សីហា។ ប្រភពដដែលនេះ បញ្ជាក់ថាបច្ចុប្បន្ននេះ នាវា Yuan Wang 5 កំពុងស្ថិតនៅចំងាយប្រមាណ១០០០គីឡូម៉ែត្រ ភាគអាគ្នេយ៍ស្រីលង្កា។
គួរបញ្ជាក់ថា ការចូលចតរបស់នាវាចិន ឈ្មោះ Yuan Wang 5 នៅកំពង់ផែស្រីលង្កានេះ កំពុងតែបង្កឲ្យមានបញ្ហាការទូត រវាងឥណ្ឌា និងស្រីលង្ការ។ ក្រុមជំនាញអន្តរជាតិ ឃ្លាំមើលចរាចរណ៍ក្នុងសមុទ្រ អះអាងថា នាវា Yuan Wang 5 របស់ចិន គឺជានាវាប្រើប្រាស់ ក្នុងប្រតិបត្តិការស្រាវជ្រាវ និងសិក្សាផ្សេងៗ។ តែយ៉ាងណា ទូរទស្សន៍ CNN-News18 របស់ឥណ្ឌាបានផ្សាយថា នាវា Yuan Wang 5 គឺជានាវាឈ្លបយកការណ៍ ដែលចិនប្រើទាំងផ្នែកស៊ីវីល និងផ្នែកកងទ័ព។ ចិនប្រើនាវានេះ ដើម្បីប្រមូលទិន្នន័យស៊ើបការណ៍ ពីលើអាកាស តាមរយៈការប្រើផ្កាយរណប និងអាចប្រើវា ដើម្បីបាញ់មីស៊ីលបាលីស្ទីកអន្តរទ្វីប ថែមទៀតផង។
សូមរំលឹកដែរថា កំពង់ផែ Hambantota គឺជាកំពង់ផែទឹកជ្រៅ ដ៏ធំមហិមារបស់ស្រីលង្កា ដែលប្រទេសនេះ បានទៅខ្ចីប្រាក់ពីចិនចំនួន១៤០០លានដុល្លារ ដើម្បីសាងសង់។ នៅឆ្នាំ២០១៧ ស្រីលង្កាបានប្រកាសខ្លួនគ្មានលទ្ធភាពសងបំណុលចិន ហើយទីបំផុតស្រីលង្កាត្រូវបង្ខំចិត្តប្រគល់កំពង់ផែនេះ ទៅឲ្យក្រុមហ៊ុនចិនគ្រប់គ្រងរយៈពេល៩៩ឆ្នាំ។ គួរកត់សំគាល់ដែរថា វត្តមានកំពង់ផែទឹកជ្រៅស្រីលង្កា គ្រប់គ្រងដោយក្រុមហ៊ុនចិន ហើយដែលស្ថិតនៅមិនឆ្ងាយប៉ុន្មាន ពីឆ្នេររបស់ឥណ្ឌានេះ បានធ្វើឲ្យឥណ្ឌារបាំចិត្តជាខ្លាំង។ ឥណ្ឌាខ្លាចក្រែងថា វានឹងក្លាយជាទីតាំងសំចតរបស់នាវាចិន ដែលចូលមកឈ្លបស៊ើបការណ៍ ស្តីពីសកម្មភាពរបស់កងទ័ពឥណ្ឌា។
ក្រោយដឹងថាស្រីលង្កាយល់ព្រមអនុញ្ញាត ឲ្យនាវាចិន Yuan Wang 5 ចូលចត រដ្ឋាភិបាលឥណ្ឌា បានជូនដំណឹងទៅរដ្ឋាភិបាលស្រីលង្កាភ្លាម ដោយបានលើកឡើងពីការបារម្ភរបស់ខ្លួន។ រដ្ឋមន្ត្រីក្រសួងការបរទេសឥណ្ឌា បានបញ្ជាក់ថា ឥណ្ឌាសូមរក្សាសិទ្ធិចាត់វិធានការ ឆ្លើយតបទៅវិញឲ្យបានស្រប ក្នុងករណីដែលវត្តមានរបស់នាវាឈ្លបយកការណ៍របស់ចិន អាចបង្កឲ្យមានការប៉ះទង្គិច ឬប៉ះពាល់ទៅលើសន្តិសុខ និងផលប្រយោជន៍សេដ្ឋកិច្ចរបស់ឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ