កូវីដ ៖ ហ្វីលីពីន បើកសាលារៀនវិញជាលើកទីមួយ បន្ទាប់ពីបិទទ្វារអស់ជាងពីរឆ្នាំ
សិស្សានុសិស្សហ្វីលីពីនជាច្រើនលាននាក់ បាននាំគ្នាធ្វើដំណើរទៅសាលារៀន នៅថ្ងៃចន្ទទី ២២សីហា២០២២នេះ ដែលជាថ្ងៃបើកបវេសនកាលប្រចាំឆ្នាំសិក្សា២០២២-២៣។ ជាថ្ងៃចូលរៀនលើកដំបូង សម្រាប់កុមារាកុមារី ទើបចូលដល់វ័យសិក្សា តែក៏ជាថ្ងៃត្រលប់ចូលរៀនវិញដំបូងបង្អស់សម្រាប់សិស្សានុសិស្សមួយចំនួនធំផ្សេងទៀតដែលបានផ្អាកការសិក្សាតាំងពីផ្ទុះកូវីដ១៩មក។
ចុះផ្សាយនៅថ្ងៃ៖
ហ្វីលីពីនជាប្រទេសចុងក្រោយបំផុតគេមួយ នៅលើពិភពលោក ដែលសាលាបើកទ្វារ ទទួលសិស្សចូលសិក្សាក្នុងថ្នាក់រៀនយ៉ាងពេញលេញឡើងវិញ បន្ទាប់ពីបិទទ្វារអស់រយៈពេលជាងពីរឆ្នាំដើម្បីប្រយុទ្ធប្រឆាំងនឹងជំងឺរាតត្បាតសកលកូវីដ១៩។ ក្នុងអំឡុងពេលបិទសាលា សិស្សានុសិស្សហ្វីលីពីន មានកម្មវិធីសិក្សាតិចតួច ដូចជារៀនតាមឯកសារកូពីមេរៀននៅផ្ទះខ្លួនឯង រៀនតាមកម្មវិធីទូរទស្សន៍ ឬរៀនតាមបណ្តាញសង្គម។
ជាលក្ខណៈត្រៀមបើកបវេសនកាល និងលើកទឹកចិត្តសិស្សឱ្យទៅសាលា រដ្ឋាភិបាលហ្វីលីពីនបានពន្លឿនយុទ្ធនាការចាក់ថ្នាំបង្ការ និងមិនយកថ្លៃសេវាធ្វើដំណើរតាមរថយន្តសាធារណៈរហូតដល់ដំណាច់ឆ្នាំ។ ជាងនេះទៅទៀត កាលពីថ្ងៃសៅរ៍ទី ២០សីហា រដ្ឋាភិបាលបានចែកជំនួយឧបត្ថម្ភ ជាសាច់លុយ ដល់និស្សិតនិងឪពុកម្តាយ ដែលបណ្តាលឱ្យមានភាពរញ៉េរញ៉ៃយ៉ាងខ្លាំងនៅមុខមណ្ឌលចែកចាយ។
មានប្រព័ន្ធអប់រំ អន់ខ្សោយស្រាប់ ការបិទថ្នាក់រៀន ដើម្បីទប់ស្កាត់ជំងឺរាតត្បាតកូវីដ១៩ បានបង្កឱ្យមានការព្រួយបារម្ភយ៉ាងខ្លាំងខ្លាចស្ថានភាពសិក្សារបស់ក្មេងហ្វីលីពីនកាន់តែធ្ងន់ធ្ងរ។ មុនវិបត្តិកូវីដ១៩ ក្នុងចំណោមក្មេង១០នាក់ មានកុមារហ្វីលីពីនអាយុលើស១០ឆ្នាំចំនួនដល់ទៅ៩នាក់ មិនអាចអាននិងអាចយល់អត្ថបទសាមញ្ញ។ នេះបើតាមរបាយការណ៍ថ្មីៗរបស់តាមធនាគារពិភពលោក និងភ្នាក់ងារអន្តរជាតិជាច្រើនផ្សេងទៀត។ នៅលើពិភពលោកទាំងមូល មានតែ១០ប្រទេសប៉ុណ្ណោះ ដែលមានស្ថានភាពសិក្សាធ្ងន់ធ្ងរជាងហ្វីលីពីន មានជាអាទិ៍ប្រទេសអាហ្វហ្កានីស្ថាន ឡាវ ឆាដ និងយេមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ