រ៉ូហ៊ីងយ៉ា រំលឹកខួប៥ឆ្នាំនៃការរងអំពើបែប “ប្រល័យពូជសាសន៍” ពីយោធាភូមា
ថ្ងៃទី ២៥សីហានេះ ជាគម្រប់ខួប៥ឆ្នាំ គត់ ដែលជនជាតិភាគតិច កាន់សាសនាអ៊ីស្លាម គ្មានប្រទេស គ្មានសញ្ជាតិ រ៉ូហ៊ីងយ៉ា ចំនួន ប្រមាណ ៧៥០០០០នាក់ បានរងអំពើហិង្សា បង្ក្រាប កាប់សម្លាប់របស់យោធាភូមា។ ពួកគេជាច្រើនពាន់នាក់បានបង្ខំចិត្តនាំគ្នារត់គេចខ្លួនមកជ្រកកោនក្នុងទឹកដីបង់ក្លាដែសជាតិខាង ក្នុងជំរំដ៏រខេករខាក Cox's Bazar។
ចុះផ្សាយនៅថ្ងៃ៖
ស្តាប់ - ០១:២៩
ពីជំរំជនភៀសខ្លួនដ៏ធំជាងគេនៅលើពិភពលោក និងក្នុងសម្លៀកបំពាក់ប្រពៃណីភូមា (ស្លៀកសារុង) ជនរ៉ូហ៊ីងយ៉ា បានប្រមូលផ្តុំគ្នា ប្រារព្វពិធីរំលឹកខួប នៃអំពើហិង្សា ដែលពួកគេចាត់ទុកជាទង្វើបែប “ប្រល័យពូជាសាសន៍” ដោយលើកបដា និងពាក្យស្លោក ស្រែកទាមទារ ដោយសន្តិវិធី ឱ្យភូមារំលាយច្បាប់ឆ្នាំ១៩៨២។ ច្បាប់ដែលមិនអនុញ្ញាតឱ្យពួកគេមានសញ្ជាតិក្នុងប្រទេសកំណើត។
ប៉ុន្តែនៅក្នុងផ្ទៃប្រទេសភូមា តាំងពីថ្ងៃរដ្ឋប្រហារ ទី ១កុម្ភៈ២០២១មក គេសង្កេតឃើញមានលេចឡើងទម្រង់នៃការបង្រួបបង្រួមជាតិប្រឈមនឹងរបបយោធាភូមា ។ ឆន្ទៈថ្មីដែលអាចជួយឱ្យជនជាតិភាគតិចរ៉ូហ៊ីងយ៉ាឱ្យបានចូលចុះក្នុងសង្គមភូមាបានប្រសើរជាងមុន។ នេះជាការយល់ឃើញរបស់អ្នកស្រី អាឡិចសង់ដ្រា មែរសាន នរវិទូជំនាញប្រទេសភូមា និងជាសាស្ត្រាចារ្យ-អ្នកស្រាវជ្រាវនៅវិទ្យាស្ថានជាតិភាសានិងអរិយធម៌បូព៌ា (INALCO)។
អ្នកស្រី Alexandra Mersan ៖ “មានការប្តូរផ្លាស់ដ៏ចម្បង គឺតាំងពីរដ្ឋប្រហារមក រងគ្រោះ រងអំពើហិង្សា និងការបង្ក្រាបពីសំណាក់ក្រុមយោធាភូមា មិនមែនជាក្រុមជនជាតិភាគតិចទេ តែជាពលរដ្ឋទូទាំងប្រទេស តែម្តង រាប់ទាំងជនជាតិភូមាផ្ទាល់ផង។ បច្ចុប្បន្ននេះ ជនជាតិដើមភូមា កំពុងប្រឈមឈ្លោះយ៉ាងខ្លាំង ជាមួយនឹងក្រុមទាហានភូមា។ ស្ថានភាពបែបនេះ បានធ្វើឱ្យពលរដ្ឋដែលជាជាតិពិន្ធុភាគច្រើនក្នុងប្រទេស យល់ថា អំពើហិង្សា និងការបង្ក្រាបរបស់អាជ្ញាធរយោធាពេលនេះ គឺទុក្ខវេទនាប្រចាំថ្ងៃរបស់ជនជាតិភាគតិចរ៉ូហ៊ីងយ៉ា កាន់សាសនាអ៊ីស្លាម និងជនជាតិភាគតិចជាទូទៅ កាលពីពេលមុន។
អ៊ីចឹងហើយ បានជាក្រោយរដ្ឋប្រហារថ្ងៃទី ១កុម្ភៈ២០២១មក គេឃើញមានសេចក្តីថ្លែងការណ៍ មានសកម្មភាពខ្លះជាក់ស្តែង ខ្លះជានិម្មិតរូបដ៏ខ្ពង់ខ្ពស់ ទទួលស្គាល់វត្តមានដូចជាជនជាតិផ្សេងទៀតដែរ និងភាពលំបាកលំបិនរបស់ជនជនជាតិភាគតិច រ៉ូហ៊ីយ៉ា ក្នុងរយៈពេលប៉ុន្មានទសវត្សរ៍កន្លងមកនេះ។ ពោលគឺជាការបង្ហាញឆន្ទៈបែបបង្រួមបង្រួមជាតិ ឆន្ទៈគិតគូរដល់ភាពចម្រុះ មិនថាភាពចម្រុះជាតិសាសន៍ សាសនា ឬជាតិពិន្ធុ។ នេះហើយជាអ្វីដែលថ្មី”។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ