ការប្រែប្រួលអាកាសធាតុ៖G20បិទបញ្ចប់កិច្ចប្រជុំដោយគ្មានសេចក្តីថ្លែងការណ៍រួម
កិច្ចប្រជុំរបស់ក្រុមប្រទេសមានសេដ្ឋកិច្ចនាំមុខគេ ហៅកាត់ថា G20បានបិទបញ្ចប់ កាលពីថ្ងៃពុធទី ៣១សីហា ដោយគ្មានលទ្ធផលអ្វីជាដុំកំភួន។ កិច្ចប្រជុំពេញមួយថ្ងៃរបស់រដ្ឋមន្រ្តីបរិស្ថានរបស់ក្រុមប្រទេស G20 នៅកោះបាលី បានបិទបញ្ចប់ទៅ ដោយគ្មានសេចក្តីថ្លែងការណ៍រួមស្តីពីការប្រយុទ្ធប្រឆាំងនឹងការប្រែប្រួលអាកាសធាតុ។ ជាថ្មីម្តងទៀត កិច្ចប្រជុំរបស់G20 ស្តីពីអាកាសធាតុ ត្រូវបាំងបិទលុបជិតដោយវិបត្តិសង្រ្គាមអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
ដូចកិច្ចប្រជុំថ្នាក់រដ្ឋមន្រ្តីសេដ្ឋកិច្ច និងហិរញ្ញវត្ថុ កាលពីខែកក្កដា ឥណ្ឌូណេស៊ីដែលធ្វើជាម្ចាស់ផ្ទះកិច្ចប្រជុំG20ស្តីពីអាកាសធាតុខកខានមិនបានចេញសេចក្តីថ្លែងការណ៍រួម បន្ទាប់ពីសមាជិកក្រុមប្រទេសមានសេដ្ឋកិច្ចនាំមុខគេ ទាំង ២០គ្មានជំហររួមគ្នា ដើម្បីស្វែងរកដំណោះស្រាយ សម្រាប់ប្រយុទ្ធប្រឆាំងនឹងការប្រែប្រួលអាកាសធាតុ។
នៅក្នុងសន្និសីទកាសែត កាលពីថ្ងៃពុធ រដ្ឋមន្រ្តីបរិស្ថាន និងព្រៃឈៃឥណ្ឌូណេស៊ី ដែលជាប្រធានដឹកនាំកិច្ចប្រជុំបាននិយាយថា ដោយសារ បញ្ហាភូមិសាស្រ្តនយោបាយ និងប្រទេសខ្លះដែលមិនអាចបត់បែន សម្រាប់សំណុំរឿងមួយចំនួន គេអាចចេញត្រឹមសេចក្តីសង្ខេប នៃកិច្ចប្រជុំ។ តាមការអះអាងរបស់រដ្ឋមន្រ្តីបរិស្ថានឥណ្ឌូណេស៊ី ដូចជាកិច្ចប្រជុំដទៃទៀត រុស្ស៊ី និងអ៊ុយក្រែន កំពុងក្លាយជាបញ្ហាតានតឹងភូមិសាស្រ្តនយោបាយ។
ប្រភពដកស្រង់ដោយទីភ្នាក់ងារព័ត៌មានបារាំងAFP បាននិយាយថា សមាជិកក្រុមប្រទេសG20មិនអាចនិយាយចុះសម្រុងគ្នាដើម្បីចេញសេចក្តីថ្លែងការណ៍រួម។ ម្យ៉ាង នៅក្នុងកិច្ចប្រជុំ អ្នកតំណាងរបស់ប្រទេសជាច្រើនបានឡើងនិយាយ ដោយចាប់ផ្តើមដំបូងគេ គឺការថ្កោលទោសរុស្ស៊ី ដែលចូលធ្វើសង្រ្គាមឈ្លានពានអ៊ុយក្រែន អស់ ៦ខែមកហើយ។ សម្រាប់ប្រភពខាងលើ វត្តមានរបស់រុស្ស៊ី ជាហេតុផលចំបងដែលសម្លាប់កិច្ចប្រជុំ តាំងពីដំបូងទី។
ទៅតាមការអញ្ជើញរបស់ឥណ្ឌូណេស៊ី ដែលជាម្ចាស់ផ្ទះ រុស្ស៊ីបានបញ្ជូនអនុរដ្ឋមន្រ្តីសម្រាប់ការអភិវឌ្ឍសេដ្ឋកិច្ចទៅចូលរួមក្នុងកិច្ចប្រជុំក្រុមប្រទេសG20 ស្តីពីអាកាសធាតុ នោះបើទោះបីជាមានការប្រឆាំងពី ក្រុមប្រទេសលោកខាងលិច ដែលជាសមាជិក។ នៅមុនបើកកិច្ចប្រជុំ រដ្ឋមន្រ្តីបរិស្ថានឥណ្ឌូណេស៊ីបានព្រមាន រំលឹកក្រុមប្រទេសដែលមានសេដ្ឋកិច្ចនាំមុខគេឲ្យចាត់វិធានការបន្ទាន់ រួមគ្នាដើម្បីទប់ស្កាត់ការឡើងកំដៅផែនដី។
ដោយសារការប្រែប្រួលអាកាសធាតុ ដែលជាលទ្ធផលនៃការឡើងកំដៅផែនដី ក្រុមប្រទេសអ្នកមាន មិនថា នៅអឺរ៉ុប នៅអាមេរិក និងក្រុមប្រទេសកំពុងអភិវឌ្ឍនៅក្នុងពិភពលោក ដូចជាចិន ឥណ្ឌាបានជួបប្រទះបញ្ហាអាកាសធាតុធ្ងន់ធ្ងរមិនធ្លាប់មាន ដូចជាភ្លើងឆេះព្រៃ រលកកំដៅ គ្រោះរាំងស្ងួតខ្លាំង និងទឹកជំនន់ ដូចករណីប៉ាគីស្ថាន ដែលមានផ្ទៃដី មួយភាគបី ត្រូវជន់លិចដោយទឹកជំនន់។ អ្នកវិទ្យាសាស្រ្តបានព្រមានហើយថា តទៅនេះ បណ្តាប្រទេសនៅក្នុងពិភពលោកនឹងត្រូវជួប វិបត្តិខ្វះស្បៀងអាហារ ដោយសារតែគ្រោះរាំងស្ងួត រលកកំដៅ និងទឹកជំនន់កើតមានកាន់តែញឹកញាប់ ដោយសារកត្តាប្រែប្រួលអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ