ឥណ្ឌូណេស៊ី ព្យាយាមធ្វើជាអន្តរការី ក្នុងសង្គ្រាមអ៊ុយក្រែន
ប្រធានាធិបតីឥណ្ឌូណេស៊ី ព្យាយាមធ្វើជាអន្តរការី ក្នុងសង្គ្រាមអ៊ុយក្រែន។ ក្រោយពីបានជួបជាមួយប្រមុខរដ្ឋអ៊ុយក្រែន នៅក្រុងកៀវ, ប្រធានាធិបតីឥណ្ឌូណេស៊ី លោក ចូកូ វីដូដូ ក៏បានបន្តជួបលោកប្រធានាធិបតីរុស្ស៊ី ពូទីន នៅម៉ូស្កូ ហើយថែមទាំងបានប្រកាសថា លោកបានផ្តល់សារផ្តាំផ្ញើពីលោក ហ្សេឡិនស្គី ជូនទៅឲ្យលោកពូទីនរួចហើយ។ សេចក្តីប្រកាសនេះ ធ្វើឡើងក្នុងសន្និសីទកាសែតរួមគ្នា ជាមួយប្រធានាធិបតី ពូទីន។
ចុះផ្សាយនៅថ្ងៃ៖
ស្តាប់ - ០២:១៩
«បើទោះបីជា ស្ថានការណ៍លំបាកម្តេចក្តី យើងត្រូវតែឈានទៅរកការកំណត់វិធានាការច្បាប់ ហើយនិងឈានទៅរកការជជែកចរចាគ្នា។ ខ្ញុំបានបញ្ជាក់ពីឆន្ទៈរបស់ខ្ញុំក្នុងការជួយធ្វើជាអ្នកនាំសារសម្រាប់លោកប្រធានាធិបតីទាំងពីរ រុស្ស៊ី - អ៊ុយក្រែន។ ឥណ្ឌូណេស៊ីយើងខ្ញុំ គ្មានប្រយោជន៍អ្វីក្នុងរឿងនេះទេ តែយើងចង់ឲ្យសង្គ្រាមត្រូវបញ្ចប់ក្នុងពេលឆាប់ៗ» នេះគឺជាខ្លឹមសាសរនៃប្រសាសន៍របស់ប្រធានាធិបតីឥណ្ឌូណេស៊ី លោក ចូកូ វីដូដូ នៅវិមានក្រិមឡាំង ដែលត្រូវបកប្រែជាភាសារុស្ស៊ី និងភាសាផ្សេងៗទៀត ហើយត្រូវកាសែតបច្ចិមលោកចុះផ្សាយព្រោងព្រាត។
ពីចំណែកខ្លួន លោកប្រមុខរដ្ឋរុស្ស៊ី វ្ល៉ាឌីមៀរ ពូទីន បានថ្លែងអំណរគុណចំពោះ លោក ចូកូ វីដូដូ ចំពោះការជជែកគ្នាយ៉ាងមានផ្លែផ្កា និងប្តេជ្ញារឹតចំណងផលប្រយោជន៍នៃកិច្ចការសហការទ្វេភាគី រុស្ស៊ី -ឥណ្ឌូណេស៊ី។
គួរជ្រាបថា តាំងពីផ្ទុះសង្គ្រាមរុស្ស៊ី-អ៊ុយក្រែនមក ឥណ្ឌូណេស៊ី បានព្យាយាមរក្សាអព្យាក្រិត មិនថ្កោលទោសរុស្ស៊ី ហើយក៏មិនកាន់ជើងអ៊ុយក្រែន។ តែចំពោះសាច់ការជាក់ស្តែង ការណ៍ដែលប្រធានាធិបតីឥណ្ឌូណេស៊ី ចេញមុខធ្វើជាអន្តរការីក្នុងសង្គ្រាមនេះ ពីព្រោះថា ឥណ្ឌូណេស៊ី ខ្លួន បាននាំចូល ស្បៀងអាហារ ជី និងគ្រាប់ធុញ្ញជាតិពីប្រទេសទាំងពីរ។ នៅពេលរុស្ស៊ីនិងអ៊ុយក្រែនឈ្លោះគ្នា គឺបណ្តាលឲ្យទំនិញទូទៅលើលោកឡើងថ្លៃ ឥណ្ឌូណេស៊ី ក៏រងផលប៉ះពាល់ខ្លាំងដែរ។ ម្យ៉ាងទៀត ឥណ្ឌូណេស៊ី នឹងត្រូវក្លាយជាប្រធានផ្លាស់វេន ជំនួបកំពូលនៃប្រទេសមានសេដ្ឋកិច្ចជឿនលឿន G20 នៅខែវិច្ឆិកាខាងមុខ ហើយ ឥណ្ឌូណេស៊ី ចង់អញ្ជើញ រុស្ស៊ី និងអ៊ុយក្រែន ដើម្បីឲ្យទៅ ប្រជុំនៅកោះបាលី ប្រទេសឥណ្ឌូណេស៊ី។ ក៏ប៉ុន្តែ អ៊ីតាលី និងសហរដ្ឋអាមេរិក មិនចង់ឃើញវត្តមានលោក ពូទីន នោះទេ ហើយចង់ឲ្យអ៊ុយក្រែន ចូលរួមក្នុងឋានៈជាភ្ញៀវ។
ទោះជាម្តេចក្តី អ្នកនាំពាក្យវិមានក្រេមឡាំង លោក ឌីមីទ្រី ផេស្កូវ ប្រកាសថា ការពិចារណាចូលរួមប្រជុំ G20 ពីសំណាក់រុស្ស៊ី នៅខែវិច្ឆិកានោះ គឺ វាអាស្រ័យនឹងការគន់គូរចំពោះស្ថានការណ៍ជាក់ស្តែងសិន។ តែយ៉ាងណាក្តី វានៅមានពេលច្រើនទៀត សម្រាប់គិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ