សិង្ហបុរីចង់មានច្បាប់ថ្មីដើម្បីប្រយុទ្ធប្រឆាំងនឹងខ្លឹមសារអាក្រក់ចង្រៃ នៅតាមបណ្ដាញសង្គម
រដ្ឋាភិបាលប្រទេសសិង្ហបុរី បានដាក់ស្នើនូវសេចក្តីព្រាងច្បាប់ថ្មីមួយ ទៅកាន់រដ្ឋសភា ដែលច្បាប់នេះ មានកម្មវត្ថុដើម្បីប្រយុទ្ធប្រឆាំងនឹងការផ្សព្វផ្សាយទាំងឡាយណា នៅលើបណ្តាញសង្គម ដែលមានខ្លឹមសារអាក្រក់ ចង្រៃដល់សង្គមជាតិ។ ក្រុមហ៊ុនបណ្តាញសង្គម នឹងមានកាតព្វកិច្ចដកចេញ លុបចោល រឺរាំងខ្ទប់ ការបង្ហោះចែកចាយ ឬការអានខ្លឹមសារមិនល្អទាំងអស់នោះ។
ចុះផ្សាយនៅថ្ងៃ៖
ស្តាប់ - ០២:៣៣
សេចក្តីព្រាងច្បាប់ថ្មីនេះ នឹងផ្តល់សិទ្ធិឲ្យអាជ្ញាធរគ្រប់គ្រងបណ្តាញអ៊ីនធ័រនិត អាចចេញបញ្ជាទៅកាន់ក្រុមហ៊ុនបណ្តាញសង្គម ឲ្យបិទខ្ទប់ នូវការបង្ហោះផ្សាយទាំងឡាយណា ដែលមានខ្លឹមសារអាក្រក់ ចង្រៃ ឬធ្វើឲ្យតក់ស្លុត តួយ៉ាងដូចជា សារពន្យុះអំពើហិង្សា សារផ្សព្វផ្សាយអំពើភេរវកម្ម ឬក៏ខ្លឹមសារអាសអាភាស ពាក់ព័ន្ធនឹងកុមារជាដើម។
ខ្លឹមសារទាំងឡាយណា ដែលអាចបង្កផលមិនល្អ ដល់សុខភាពសាធារណៈ ឬអាចបង្កឲ្យមានការមាក់ងាយ រើសអើងប្រកាន់ពូជសាសន៍ ប្រកាន់សាសនានៅសិង្ហបុរី ក៏នឹងអាចជាប់បំរាម នៅក្នុងសេចក្តីព្រាងច្បាប់ថ្មីនេះដែរ។ នេះបើផ្អែកតាម លិខិតប្រកាសរបស់ក្រសួងទូរគមនាគមន៍ និងព័ត៌មានសិង្ហបុរី។ ក្រសួងនេះបានបញ្ជាក់ថា ថ្វីបើកន្លងមក ក្រុមហ៊ុនបណ្ដាញសង្គមភាគច្រើន បានព្យាយាមប្រយុទ្ធប្រឆាំងនឹងខ្លឹមសារអាក្រក់ ចង្រៃតាមបណ្ដាញសង្គមទាំងនោះក៏ដោយ តែវានៅតែមិនទាន់គ្រប់គ្រាន់។ ការបារម្ភនៅតែមាន ព្រោះថា ការប្រើប្រាស់បណ្តាញសង្គម មានលក្ខណៈកាន់តែទូលំទូលាយ ចូលជ្រាបទៅគ្រប់ស្រទាប់សង្គម ដោយរាប់ទាំងក្មេងអនីតិជនផង។
ច្បាប់ថ្មីនឹងគ្រោងដាក់កាតព្វកិច្ច ឲ្យក្រុមហ៊ុនបណ្តាញសង្គម ដែលរកស៊ីនៅសឹង្ហបុរី ត្រូវតែតែមានវិធានការ យន្តការមានប្រសិទ្ធិភាពរឹងមាំ ដើម្បីរារាំង កុំឲ្យអ្នកប្រើប្រាស់មួយចំនួន ជាពិសេសកុមារ ក្មេងអនីតិជន អាចប្រទះអាន ឬឃើញខ្លឹមសារចង្រៃមិនល្អ ដែលគេបង្ហោះតាមបណ្តាញរបស់ខ្លួន។ ពុំនោះទេ ក្រុមហ៊ុនគ្រប់គ្រងបណ្តាញសង្គម អាចនឹងរងនូវការពិន័យ។ តែយ៉ាងណា វិធានការហាមឃាត់នេះ មិនពាក់ព័ន្ធនឹងសារឆ្លងឆ្លើយជាលក្ខណៈឯកជនទេ។
គួរបញ្ជាក់ថា សេចក្តីព្រាងច្បាប់នេះ បានទៅដល់ដៃសភាសិង្ហបុរីហើយ ហើយការជជែកពិភាក្សា នឹងត្រូវរៀបចំនៅក្នុងខែវិច្ឆិកា។ ប្រសិនបើច្បាប់នេះត្រូវបានអនុម័ត នោះវានឹងមកបន្ថែមលើវិធានការគ្រប់គ្រងបណ្តាញសង្គម ដែលសឹង្ហបុរី មានយ៉ាងតឹងរឹងរួចទៅហើយ។ អង្គការសង្គមស៊ីវីល អាចនឹងលើកឡើងដើម្បីរិះគន់រដ្ឋាភិបាលសិង្ហបុរី ទាក់ទិននឹងការអនុវត្តសិទ្ធិសេរីភាពបញ្ចេញមតិ នៅតាមបណ្តាញសង្គម។
គួររំលឹកថា កាលពីឆ្នាំទៅមិញ សិង្ហបុរីបានអនុម័តច្បាប់ដ៏ចម្រូងចម្រាសមួយ សំដៅរារាំងការលូកដៃរបស់បរទេស ចូលមកក្នុងកិច្ចការនយោបាយផ្ទៃក្នុង។ ហើយកាលពី៣ឆ្នាំមុន ប្រទេសនេះ បានធ្វើច្បាប់ប្រយុទ្ធប្រឆាំងការផ្សព្វផ្សាយព័ត៌មានប្រឌិតក្លែងក្លាយ ដោយបានប្រគល់សិទ្ធិឲ្យរដ្ឋមន្ត្រីមួយចំនួន អាចមានសិទ្ធិចេញបញ្ជា ឲ្យបណ្ដាញសង្គម ចេញសារដាស់តឿនរំឭក ដាក់ពីលើសារទាំងឡាយណា ដែលអាជ្ញាធរចាត់ទុកថា ជាព័ត៌មានប្រឌិតក្លែងក្លាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ