តុលាការបារាំង លើកលែងការចោទប្រកាន់ចំពោះលោក សម រង្ស៊ី
តុលាការនៅក្រុងប៉ារីស បានសម្រេចលើកលែងការចោទប្រកាន់ចំពោះលោក សម រង្ស៊ី ក្នុងសំណុំរឿងបទបរិហារកេរ្តិ៍ លោកនាយករដ្ឋមន្ត្រី ហ៊ុន សែន។ បើតាមប្រសាសន៍របស់សហមេធាវីចុងចោទ, ចំពោះ លោក សម រង្ស៊ី ផ្ទាល់ សាលក្រមតុលាការបារាំង ថ្ងៃទី១០តុលា គឺជាក្តីសង្ឃឹមមួយ សម្រាប់អ្នកការពារសិទ្ធិសេរីភាព នៅកម្ពុជា និងនៅទីដទៃផ្សេងទៀត។
ចុះផ្សាយនៅថ្ងៃ៖
ស្តាប់ - ០២:៣២
សំណុំរឿងបទបរិហារកេរ្តិ៍ ទាំងពីរនោះ គឺធ្វើឡើង តាមរយៈភស្តុតាង ក្នុងហ្វេសបុក នៅឆ្នាំ២០១៩ ដែលបទចោទប្រកាន់ទី១ ជាប់ទាក់ទងនឹងមរណភាពរបស់លោកឧត្តមសេនីយ៍ ហុក ឡង់ឌី នៅក្នុងឧប្បត្តិហេតុធ្លាក់ឧទ្ធម្ភាគចក្រមួយ នៅឆ្នាំ២០០៨។ ក្នុងគណនីហ្វេសបុកផ្ទាល់ខ្លួន នាឆ្នាំ២០១៩នោះ អ្នកនយោបាយប្រឆាំងដ៏លេចធ្លោ លោក សម រង្ស៊ី បានលើកឡើងថា លោកនាយករដ្ឋមន្ត្រី ហ៊ុន សែន នៅពីក្រោយនៃអំពើឃាតកម្មនេះ។ បទចោទមួយទៀត គឺត្រូវប្តឹងដោយលោក ឌី វិជ្ជា ជាកូនប្រុសរបស់លោក ហុង ឡង់ឌី និងជាកូនប្រសារបស់លោក ហ៊ុន សែន។
ទីភ្នាក់ងារព័ត៌មានបារាំង AFP ដែលបានទទួលសេចក្តីប្រកាសព័ត៌មានរបស់មេធាវីចុងចោទ សរសេរបញ្ជាក់ថា បណ្តឹងបរិហារកេរ្តិ៍ទាំងពីរនេះ ត្រូវតុលាការជាន់ទាបបារាំង ចេញសាលក្រមលើកលែងចោទប្រកាន់ហើយ។ ក្នុងសេចក្តីប្រកាសព័ត៌មាននោះ សហមេធាវីទាំងពីររបស់លោក សម រង្ស៊ី គឺ Mathias Chichportich និង Jessica Finelle បានសង្កត់ធ្ងន់ថា «ជាមួយនឹងអារម្មណ៍រំភើបរីករាយ កូនក្តីរបស់យើងបានទទួលការលើកលែងពីការចោទប្រកាន់ទាំងពីរករណី»។ មេធាវីបារាំងទាំងពីរនាក់ បន្តទៀតថា «ជាង២០ឆ្នាំមកហើយ ដែលលោក សម រង្ស៊ី បន្តរិះគន់ឧក្រិដ្ឋកម្មដែលបង្កឡើងដោយរដ្ឋអំណាចដឹកនាំកម្ពុជាសព្វថ្ងៃ។ លោក សម រង្ស៊ី ប្រឹងតស៊ូដើម្បីលិទ្ធិប្រជាធិតេយ្យ។ ទីបំផុត លោក សម រង្ស៊ី ត្រូវបង្ខំឲ្យនិរទេសខ្លួន ហើយបក្សនយោបាយរបស់លោក ក៏ត្រូវលោក ហ៊ុន សែន កម្ទេចចោលឲ្យស្ងាត់បាត់សំឡេងទៅទៀត។» នេះបើតាមខ្លឹមសារសំណេរជាភាសាបារាំងរបស់សហមេធាវីចុងចោទ។
គួររំឭកជូនថា ក្នុងពេលសវនាការផ្ទាល់ ថ្ងៃទី១កញ្ញា លោក សម រង្ស៊ី អ្នកនយោបាយភៀសខ្លួន វ័យ៧៣ឆ្នាំ បានទៅបំភ្លឺតុលាការបារាំង ក្នុងក្រុងប៉ារីស ថា «នៅស្រុកខ្មែរ រូបលោកបានជាប់បណ្តឹងជាច្រើនសន្ធឹក ពីព្រោះតែមូលហេតុនយោបាយ ហើយនិងត្រូវបង្ខំចិត្តភៀសខ្លួន។ នៅកម្ពុជា គ្មានសេរីភាពបញ្ចេញមតិទេ។ អ្នកដែលហ៊ាននិយាយរិះគន់ ត្រូវសម្លាប់ ឬចាប់ដាក់ពន្ធនាគារ។ ដូច្នេះហើយ បណ្តាញសង្គមហ្វេសបុក គឺជាមធ្យោបាយតែមួយគត់ ដែលអនុញ្ញាតឲ្យរូបលោក បានបញ្ចេញមតិយោបល់បានដោយសេរី»។ នេះបើតាមការលើកឡើងរបស់លោកសម រង្ស៊ី ក្នុងសវនាការ កាលពីខែមុន។
ជុំវិញសេចក្តីសម្រេចនេះ វិទ្យុបារាំង RFI បានទាក់ទងលោក សម រង្ស៊ី ជាចុងចោទ និងលោក គី តិច មេធាវីតំណាងដើមចោទ ដើម្បីសូមប្រតិកម្មឆ្លើយតប ក៏ប៉ុន្តែ នៅមិនទាន់ទទួលបានចម្លើយទេ នៅល្ងាច ថ្ងៃច័ន្ទ ទី១០ តុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ