ប្រធានាធិបតីឥណ្ឌូណេស៊ីប្រកាសវាយកម្ទេចពហុកីឡាដ្ឋាន ដែលមានមនុស្សរត់ជាន់គ្នា ស្លាប់ ១៣៣នាក់
១៨ថ្ងៃក្រោយព្រឹត្តិការណ៍រត់ជាន់គ្នា នៅពហុកីឡាដ្ឋានប្រកួតបាល់ទាត់ នៅទីក្រុងម៉ាឡង់ ភាគខាងកើតកោះ ហ្សាវ៉ា ដែលបានសម្លាប់មនុស្សសរុប ១៣៣នាក់ ប្រធានាធិបតីឥណ្ឌូណេស៊ី លោកហ្សូកូ វីដូដូ បានសម្រេចឲ្យគេវាយកម្ទេចចោល ពហុកីឡាដ្ឋានមរណៈ។ ប្រធានាធិបតីឥណ្ឌូណេស៊ីបានប្រកាសដំណឹងនេះ នៅក្រោយជំនួបជាមួយប្រធានសហព័ន្ធកីឡាបាល់ទាត់ពិភពលោក នៅទីក្រុងហ្សាកាតា កាលពីថ្ងៃអង្គារទី ១៨ តុលា ២០២២។
ចុះផ្សាយនៅថ្ងៃ៖
នៅក្នុងសន្និសីទកាសែតដែលធ្វើឡើងនៅក្រោយជំនួបជាមួយ ប្រធានសហព័ន្ធកីឡាបាល់ទាត់ពិភពលោក FIFA កាលពីថ្ងៃអង្គារ ប្រធានាធិបតី ឥណ្ឌូណេស៊ីលោកហ្សូកូ វីដូដូបានប្រកាសថា ពហុកីឡាដ្ឋានKajuruhan នៅទីក្រុងម៉ាឡង់ ជាទីដែលមានមនុស្សរត់ជាន់គ្នាស្លាប់ ចំនួន ១៣៣នាក់ កាលពីថ្ងៃទី ១តុលា កន្លងទៅ នឹងត្រូវវាយកម្ទេចចោល ដោយជំនួសមកវិញ នូវពហុកីឡាដ្ឋានថ្មី ដែលសាងសង់ឡើងស្របតាមខ្នាតរបស់សហព័ន្ធកីឡាបាល់ទាត់ពិភពលោក FIFA ក្នុងការធានាសន្តិសុខឲ្យកីឡាករ និងអ្នកគាំទ្រ។
ប្រធានាធិបតីឥណ្ឌូណេស៊ី បានបញ្ជាក់ដែរថា លោកយល់ស្របជាមួយ សហព័ន្ធកីឡាបាល់ទាត់ពិភពលោក ដើម្បីផ្លាស់ប្តូរឲ្យស៊ីជម្រៅ កីឡាបាល់ទាត់ឥណ្ឌូណេស៊ី ដើម្បីធានា យ៉ាងណាឲ្យគ្រប់ការប្រកួតឆ្លើយតបទៅនឹងស្តង់ដាអន្តរជាតិ។
មានវត្តមាននៅក្បែរ ប្រធានាធិបតីឥណ្ឌូណេស៊ី លោកចានី អ៊ីនហ្វាន់ទីណូ (Gianni Infantino) ប្រធានសហព័ន្ធកីឡាបាល់ទាត់ពិភពលោកFIFA បានបន្ថែមថា FIFAនឹងជួយវិនិយោគ លើកំណែទម្រង់ វិស័យបាល់ទាត់ឥណ្ឌូណេស៊ី ដើម្បីធ្វើឲ្យការរក្សាសន្តិសុខនៅក្នុងវិស័យនេះ ល្អប្រសើរឡើង។
ដោយធ្វើដំណើរទៅឥណ្ឌូណេស៊ី នៅជាង ២សប្តាហ៍ក្រោយ នៃសោកនាដកម្មរត់ជាន់គ្នា នៅពហុកីឡាដ្ឋាន នៅទីក្រុងម៉ាឡង់ ដែលបានសម្លាប់មនុស្ស១៣៣នាក់ ប្រធានសហព័ន្ធកីឡាបាល់ទាត់ពិភពលោក មានវត្តមាន នៅឥណ្ឌូណេស៊ី ដែលកំពុងត្រៀម រៀបចំការប្រកួតបាល់ទាល់ពិភពលោក សម្រាប់កីឡាករអាយុក្រោម ២០ឆ្នាំនៅឆ្នាំ ក្រោយ។
តាមការលម្អិតរបស់លោកចានី អ៊ីនហ្វាន់ទីណូ FIFA នឹងបញ្ជូនអ្នកជំនាញទៅ ឥណ្ឌូណេស៊ី ដើម្បីផ្តោតការងារសំខាន់លើដំណើរការរៀបចំ ទាក់ទងនឹងសុវត្ថិភាព នៅក្នុងពហុកីឡាដ្ឋាន អត្តចរិត របស់អ្នកគាំទ្រកីឡា និងការបណ្តុះបណ្តាលស្តីពីកីឡាបាល់ទាត់នៅតាមសាលារៀន។
សោកនាដកម្មនៅពហុកីឡាដ្ឋានម៉ាឡងបានកើតឡើង នៅយប់ថ្ងៃសៅរ៍ ទី១តុលា នៅក្រោយ ក្រុមអ្នកគាំទ្រកីឡាករអារ៉េម៉ា FC ប្រមាណ ៣ ០០០នាក់ខឹងសម្បារ និងបាននាំគ្នារត់ចូលលើទីលានប្រកួត។ នៅពេលនោះ កម្លាំងប៉ូលិសបានចូលអន្តរាគមន៍ ដោយបាញ់គ្រាប់បែកផ្សែងបង្ហូរទឹកភ្នែកយ៉ាងច្រើន ដើម្បីបំបែកហ្វូងមនុស្ស។ តាមសាក្សី ការបាញ់គ្រាប់បែកផ្សែងបង្ហូរទឹកភ្នែករបស់ប៉ូលិស សំដៅកន្លែងអង្គុយរបស់អ្នកទស្សនា បានធ្វើឲ្យមនុស្សភ័យស្លន់ស្លោ រត់រកច្រកចេញពីពហុកីឡាដ្ឋាន តាមទ្វារចង្អៀត ដែលក្នុងនោះ មានខ្លះត្រូវបានអ្នកផ្សេង រត់ជាន់រហូតថប់ដង្ហើមស្លាប់ ហើយខ្លះទៀតស្លាប់ដោយផ្សែងបង្ហូរទឹកភ្នែករបស់ប៉ូលិស។
នៅមួយថ្ងៃក្រោយហេតុការណ៍រត់ជាន់គ្នា នៅក្នុងពហុកីឡាដ្ឋាន នៅទីក្រុងម៉ាឡង ប្រធានាធិបតីឥណ្ឌូណេស៊ី បានបញ្ជាឲ្យគេផ្អាករាល់ការប្រកួតបាល់ទាត់នៅក្នុងប្រទេស នៅក្នុងពេលរង់ចាំលទ្ធផលនៃការស៊ើបអង្កេត ព្រមទាំងបញ្ជាឲ្យគេពិនិត្យឡើងវិញ គ្រប់លក្ខខណ្ឌសន្តិសុខនៅគ្រប់ពហុកីឡាដ្ឋាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ