ឥណ្ឌូណេស៊ី ប្រកាសផ្អាកលក់ថ្នាំស៊ីរ៉ូក្អកនិងក្តៅខ្លួន ក្រោយមានករណីក្មេងស្លាប់ច្រើន
អាជ្ញាធរឥណ្ឌូណេស៊ី បានប្រកាសនៅថ្ងៃពុធទី ១៩តុលា ២០២២ ផ្អាកជាបណ្តោះអាសន្ន ការលក់ និងការចេញវេជ្ជបញ្ជា ឱ្យប្រើថ្នាំស៊ីរ៉ូក្អកនិងក្តៅខ្លួន សម្រាប់ព្យាបាលទារកនិងកុមារ ក្នុងរយៈពេលនៃការធ្វើអង្កេត។ សេចក្តីប្រកាសនេះធ្វើឡើងបន្ទាប់ពី មានករណីកុមារស្លាប់ជាតិ១០០នាក់ ដោយជំងឺខ្សោយតម្រងនោម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
តាំងពីខែសីហា២០២២មក អាជ្ញាធរសុខាភិបាលឥណ្ឌូណេស៊ី បានសង្កេតឃើញ មានកំណើនករណីក្មេងស្លាប់ដោយរោគខ្សោយតម្រង យ៉ាងចម្លែកខុសប្រក្រតី។ ជាសរុប មានក្មេងចំនួន២០៦នាក់ ភាគច្រើនអាយុក្រោម៥ឆ្នាំ នៅក្នុងខេត្តចំនួន២០ បានធ្លាក់ខ្លួនឈឺតម្រងនោមធ្ងន់ធ្ងរក្នុងនោះ៩៩នាក់បានស្លាប់។ ដើម្បីជាកិច្ចការពារ ក្រសួងសុខាភិបាលឥណ្ឌូណេស៊ី បានស្នើសុំឱ្យគ្រូពេទ្យផ្អាកការចេញវេជ្ជបញ្ជាឱ្យប្រើថ្នាំទឹក និងស្នើឱ្យឱសថស្ថានឈប់លក់ពពួកថ្នាំក្អក-ក្តៅខ្លួន មួយរយៈសិន រហូតទាល់តែការអង្កេតចប់សព្វគ្រប់។
នៅមុនឥណ្ឌូណេស៊ីប៉ុន្មានថ្ងៃ ថ្នាំក្អកនិងក្តៅខ្លួន ក្នុងទម្រង់ជាទឹកស៊ីរ៉ូ ផលិតនៅប្រទេសឥណ្ឌា ក៏កំពុងជាប់ចោទថាបង្កឱ្យកុមារហ្គំប៊ីចំនួន ៦៩នាក់ស្លាប់ ក្នុងរយៈពេលបីខែចុងក្រោយមកនេះ ដោយជំងឺខ្សោយតម្រងនោមដែរ។ នៅខែតុលា អង្គការសុខភាពពិភពលោក បានទាញសញ្ញាអាសន្នចេញអនុសាសន៍ឱ្យ ដកថ្នាំក្អកផ្តាសាយផលិតនៅឥណ្ឌាចំនួន បួនមុខ ផលិតដោយក្រុមហ៊ុនឱសថ Maiden Pharmaceuticals ពីទីផ្សារផង ព្រោះពពួកថ្នាំនេះ អាចមានពាក់ព័ន្ធនឹងការស្លាប់របស់កុមារនៅហ្កំប៊ី។
នៅក្នុងការវិភាគបឋមរបស់អង្គការសុខភាពពិភពលោក ថ្នាំទាំងបួនមុខនោះដែលមានជាអាទិ៍ថ្នាំឈ្មោះ Promethazine, Kofexmalin bébé Makoff bébé និង sirop Magrip N Cold មានបង្កប់សារធាតុគីមីពុល ពីរគឺ diéthylène glycol និង éthylène glycol ក្នុងបរិមាណច្រើនហួសហេតុ។ តាមច្បាប់ គេមិនត្រូវប្រើសារធាតុEthylène ក្នុងថ្នាំក្មេងជាដាច់ខាត។
ថ្នាំក្អកនិងក្តៅខ្លួន ផលិតដោយក្រុមហ៊ុនឥណ្ឌានេះ អាចមានលក់ ដោយខុសច្បាប់នៅអាហ្វ្រិក និងអាស៊ី។ ហើយសារធាតុពុលនេះ អាចមានប្រើក្នុងផលិតផលផ្សេងទៀត។ ដូច្នេះហានិភ័យអាចមាននៅទូទាំងពិភពលោក។ នេះបើតាមការបញ្ជាក់របស់អង្គការសុខភាពពិភពលោក។ ការិយាល័យអង្គការសុខភាពពិភពលោកនៅក្រុងហ្សាការតា មិនទាន់ផ្តល់ការបំភ្លឺអ្វីទាក់ទងនឹងករណីនៅឥណ្ឌូណេស៊ីទេ ប៉ុន្តែអាជ្ញាធរឥណ្ឌូណេស៊ី បានអះអាងថ្នាំក្អកឥណ្ឌានាំចេញទៅប្រទេសហ្កំប៊ី គ្មានលក់នៅក្នុងប្រទេសខ្លួនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ