ភូមា៖មានស្លាប់ប្រមាណជា ៥០នាក់នៅក្នុងការវាយប្រហារផ្លូវអាកាសលើក្រុមឧទ្ទាមក្នុងរដ្ឋកាឈីន
នៅក្នុងប្រទេសភូមា វរសេនីយ៍ឯកណ័រ ប៊ូបានថ្លែងក្នុងថ្ងៃចន្ទ ទី២៤ តុលាថា ការវាយប្រហារតាមផ្លូវអាកាសទៅលើពិធីប្រគុំតន្រ្តីមួយរៀបចំដោយក្រុមឧទ្ទាមជនជាតិភាគតិចបានបណ្តាលឲ្យមានមនុស្សស្លាប់ប្រមាណជា ៥០នាក់ និងរបួសប្រមាណជា ៧០នាក់ផ្សេងទៀត។ តាមវរសេនីយ៍ឯកភូមារូបនេះដដែល ពិធីប្រគុំតន្រ្តីនោះរៀបចំដោយកងទ័ពឯករាជ្យកាឈីនដែលកំពុងមានជម្លោះត តាំងនឹងរដ្ឋាភិបាលភូមាតាំងពីច្រើនទសវត្សរ៍។
ចុះផ្សាយនៅថ្ងៃ៖
ស្តាប់ - ០១:៤៤
តាមវរសេនីយ៍ឯកភូមាណ័រ ប៊ូ ទ័ពអាកាសភូមាបានប្រើយន្តហោះចំនួនពីរគ្រឿងដើម្បីវាយប្រហារលើទីតាំងប្រគុំតន្រ្តីរៀបចំដោយកងទ័ពឯករាជ្យកាឈីនកាលពីយប់ថ្ងៃអាទិត្យ ទី២៣ តុលា។ ចំណែកចំនួនអ្នកស្លាប់ប្រមាណ ៥០នាក់ និងអ្នករបួសប្រមាណ ៧០នាក់ត្រូវបានវរសេនីយ៍ឯកណ័រ ប៊ូលំអិតថា មានជនស៊ីវិល និងទាហានរបស់កងទ័ពឯករាជ្យកាឈីន។ ចំណែកបណ្តាញសារព័ត៌មានក្នុងស្រុកបានលើកឡើងពីការស្លាប់ទាហានរបស់កងទ័ពឯករាជ្យកាឈីនដល់ទៅ ៦០នាក់។ យ៉ាងណាក៏ដោយ គេនៅមិនទាន់អាចផ្ទៀងផ្ទាត់លើព័ត៌មានស្តីពីចំនួនអ្នកស្លាប់បានទេ ពិសេសជនស៊ីវិល។
ការិយាល័យអង្គការសហប្រជាជាតិប្រចាំភូមាបានសម្តែងការព្រួយបារម្ភ និងសោកស្ដាយយ៉ាងខ្លាំងចំពោះព័ត៌មានមួយនេះ ពិសេសទាក់ទងនឹងការស្លាប់ជនស៊ីវិលស្លូតត្រង់។ នៅក្នុងសេចក្តីប្រកាសព័ត៌មាន ការិយាល័យអង្គការសហប្រជាជាតិប្រចាំភូមាបានលើកឡើងពីចំនួនអ្នកស្លាប់ជាជនស៊ីវិលដល់ទៅជាង ១០០នាក់។ តែអ្នកនាំពាក្យរបបសឹកភូមាបានបដិសេធមិនធ្វើអត្ថាធិប្បាយលើព័ត៌មានលើកឡើងដោយការិយាល័យអង្គការសហប្រជាជាតិប្រចាំភូមាពេលនេះទេ។ ចំណែកស្ថានទូតអាមេរិកប្រចាំក្រុងរ៉ង់ហ្គូនបានប្រាប់ពីការតាមដានព័ត៌មាននេះយ៉ាងយកចិត្តទុកដាក់ជាទីបំផុត។
គួរបញ្ជាក់ថា តាំងពីច្រើនទសវត្សរ៍ដែលកងទ័ពឯករាជ្យកាឈីនក្នុងរដ្ឋកាឈីនតែងប្រឈមមុខផ្លូវអាវុធទល់នឹងកម្លាំងទ័ពភូមា។ ការប្រយុទ្ធគ្នាបានកើនឡើងរឹតតែខ្លាំងតាំងពីក្រោយរដ្ឋប្រហារយោធាទម្លាក់រដ្ឋាភិបាលស៊ីវិលក្នុងថ្ងៃទី១ កុម្ភៈ ឆ្នាំ ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ