World Cup៖ ក្រុមកីឡាករជំរើសជាតិអ៊ីរ៉ង់ មិនច្រៀងចម្រៀងជាតិ ដើម្បីបង្ហាញការគាំទ្រដល់បាតុករអ៊ីរ៉ង់
កម្មវិធីប្រកួតបាល់ទាត់ ពានរង្វាន់ពិភពលោក បានចាប់ផ្តើមហើយនៅប្រទេសកាតា។ នៅក្នុងការប្រកួតបើកឆាក ក្រុមកីឡាករជម្រើសជាតិអ៊ីរ៉ង់ ដែលត្រូវជួបប្រកួតជាមួយក្រុមជម្រើសជាតិអង់គ្លេសនោះ បានសម្រេចនាំគ្នាមិនច្រៀងចម្រៀងជាតិអ៊ីរ៉ង់ទេ។ ក្រុមបាល់ទាត់ជម្រើសជាតិអ៊ីរ៉ង់ បានធ្វើពហិការមិនច្រៀងចម្រៀងជាតិនេះ គឺចង់សំដែងការគាំទ្រ ដល់ចលនាបាតុកម្មទូទាំងប្រទេស ដែលប្រជាជនអ៊ីរ៉ង់បានធ្វើប្រមាណជាង២ខែមកនេះ ដើម្បីប្រឆាំងនឹងរបបដឹកនាំអ៊ីស្លាមផ្តាច់ការអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៣
ក្នុងទឹកមុខរាបស្មើ យ៉ាងរឹងមាំ ក្រុមកីឡាករបាល់ទាត់ជម្រើសជាតិអ៊ីរ៉ង់ ទាំង១១នាក់ បានបដិសេធមិនបង្ហើបមាត់ច្រៀងចម្រៀងជាតិអ៊ីរ៉ង់ទេ នៅពេលភ្លេងជាតិបានបន្លឺឡើងមុនពេលប្រកួត នៅថ្ងៃទី២១វិច្ឆិកានេះ។ កាម៉េរ៉ាថតផ្សាយបន្តផ្ទាល់ បានចាប់យករូបភាពមួយភ្លែត ឲ្យឃើញស្ត្រីអ្នកគាំទ្រម្នាក់ ទទូលក្រណាត់ស ស្រក់ទឹកភ្នែករលីងរលោង អមជាមួយភ្លេងជាតិដែលកំពុងបន្លឺក្នុងពហុកីឡាដ្ឋាន។ ដោយឡែក ក្នុងពេលនោះ គេឃើញសមាជិកម្នាក់នៃគណៈប្រតិភូដឹកនាំក្រុមជម្រើសជាតិអ៊ីរ៉ង់ បង្ហើបមាត់ច្រៀងតែម្នាក់ឯង។ ផ្ទាំងបដាក្រណាត់ សរសេរជាភាសាអង់គ្លេស “ស្ត្រី ជីវិត សេរីភាព” ដែលជាពាក្យស្លោករបស់បាតុករអ៊ីរ៉ង់ ត្រូវបានគេប្រទះភ្នែកមួយភ្លែតនៅកន្លែងដែលក្រុមអ្នកគាំទ្រអ៊ីរ៉ង់អង្គុយ មុននឹងត្រូវគេដកចេញវិញ។
សូមរំលឹកថា កីឡាករ Alireza Jahanbakhsh ដែលជាប្រធានក្រុមជម្រើសជាតិអ៊ីរ៉ង់ ធ្លាប់បានប្រកាសថា ការច្រៀងឬមិនច្រៀងចម្រៀងជាតិ វាគឺជាការសម្រេចរួមគ្នារបស់ក្រុមទាំងមូលតែម្តង។ កីឡាកររូបនេះអះអាងថា ក្រុមជម្រើសជាតិអ៊ីរ៉ង់ ចង់ធ្វើអ្វីម្យ៉ាង ជាកាយវិការដើម្បីបង្ហាញការគាំទ្រ ដល់បាតុករអ៊ីរ៉ង់ ក៏ដូចជាដល់ជនរងគ្រោះទាំងអស់ ដែលត្រូវបានសមត្ថកិច្ចអ៊ីរ៉ង់ បង្ក្រាបយ៉ាងចាស់ដៃជាទីបំផុត។
គួរបញ្ជាក់ថា អស់រយៈពេលជាង២ខែមកហើយ ដែលប្រជាជនអ៊ីរ៉ង់ ជាពិសេសយុវជន សិស្សនិស្សិត បាននាំគ្នាធ្វើបាតុកម្មទូទាំងប្រទេស ប្រឆាំងនឹងរបបដឹកនាំបែបអ៊ីស្លាមផ្តាច់ការ បំបិទសិទ្ធិសេរីភាព។ ចលនាបាតុកម្ម ដែលបានផ្ទុះឡើង ក្រោយការស្លាប់របស់ស្ត្រីឈ្មោះ Mahsa Amini អាយុ២២ឆ្នាំ ដែលត្រូវបានសមត្ថកិច្ចអ៊ីរ៉ង់ចាប់ខ្លួន ដោយចោទថាស្លៀកពាក់ ទទូលក្រណាត់គ្រប់ក្បាលមិនជិតត្រឹមត្រូវ។
បើទោះបីជារងការបង្រ្កាបយ៉ាងខ្លាំងក្លា ពីសំណាក់សមត្ថកិច្ច តែចលនាបាតុកម្មមិនចុះថមថយទេ រហូតមកទល់ពេលនេះ ខណៈបញ្ហាជីវភាព វិបត្តិសេដ្ឋកិច្ចកាន់តែរួមរិត ធ្វើឲ្យយុវជនអ៊ីរ៉ង់ កាន់តែអស់សង្ឃឹម។ ចលនាបាតុកម្មដ៏ក្លាហានរបស់យុវជនអ៊ីរ៉ង់នេះ បានទទួលការគាំទ្រផងដែរ ពីសំណាក់កីឡាករល្បីៗអ៊ីរ៉ង់ជាច្រើន ទាំងក្នុងនិងក្រៅប្រទេស ដែលបាននាំគ្នាផ្ញើសារគាំទ្រ តាមរូបភាពផ្សេងៗ។
កាលពីថ្ងៃទី២៧កញ្ញា ក្នុងការប្រកួតមិត្តភាពនៅអូទ្រីស ជាមួយក្រុមកីឡាបាល់ទាត់ជម្រើសជាតិសេណេហ្កាល់ ក្រុមជម្រើសជាតិអ៊ីរ៉ង់ ក៏បានបដិសេធមិនច្រៀងចម្រៀងជាតិអ៊ីរ៉ង់ដែរ និងបានឱនមុខចុះ ដើម្បីបង្ហាញការកាន់ទុក្ខ ចំពោះជនរងគ្រោះអ៊ីរ៉ង់ស្លាប់ដោយការបង្ក្រាបរបស់សមត្ថកិច្ច។ ក្រោយមកទៀត នៅថ្ងៃទី៦វិច្ឆិកា ក្នុងការប្រកួតបាល់ទាត់លើខ្សាច់នៅឌូបៃ ក្រុមជំរើសជាតិអ៊ីរ៉ង់ក៏បានបដិសេធមិនច្រៀងចម្រៀងជាតិដែរ ធ្វើឲ្យទូរទស្សន៍ជាតិអ៊ីរ៉ង់ ត្រូវកាត់ផ្តាច់ការផ្សាយបន្តផ្ទាល់ភ្លាមៗ។ ហើយកាលពីថ្ងៃអាទិត្យទី២០វិច្ឆិកា តុលាការអ៊ីរ៉ង់ បានកោះហៅគ្រូបង្វឹកក្រុមកីឡាបាល់ទាត់ Club Persepolis ដ៏ល្បីល្បាញ បន្ទាប់ពីគ្រូបង្វឹករូបនេះបានលើកឡើងថា នៅពេលដែលក្រុមជម្រើសជាតិអ៊ីរ៉ង ចូលទៅជួបលោកប្រធានាធិបតីអ៊ីប្រាហ៊ីម រ៉ៃស៊ី ក្រុមនេះគួរណាតែប្រាប់ទៅប្រធានាធិបតីដោយផ្ទាល់ ស្តីអំពីទុក្ខវេទនារបស់ប្រជាពលរដ្ឋអ៊ីរ៉ង់ ដែលត្រូវរបបនេះកៀបសង្កត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ