កាណាដាបង្ហាញយុទ្ធសាស្រ្តឥណ្ឌូប៉ាស៊ីហ្វិកដើម្បីប្រជែងជាមួយចិន
កាលពីថ្ងៃអាទិត្យ រដ្ឋាភិបាលកាណាដាបានប្រកាសដាក់ចេញជាផ្លូវការនូវយុទ្ធសាស្រ្តសម្រាប់តំបន់ឥណ្ឌូប៉ាស៊ីហ្វិក ដោយនៅក្នុងនោះ កាណាដាត្រៀមកញ្ចប់ថវិកាចំនួន ១ពាន់៧រយលានដុល្លារអាមេរិក ដើម្បីពង្រឹងសមត្ថភាពយោធា និងបង្កើនឥទ្ធិពលទាំងខាងផ្នែកសេដ្ឋកិច្ច និងការទូត នៅក្នុងតំបន់ឥណ្ឌូប៉ាស៊ីហ្វិក។ គោលដៅចម្បងបំផុតនៃយុទ្ធសាស្រ្តនេះ គឺដើម្បីប្រជែងឥទ្ធិពលជាមួយនឹងចិន។
ចុះផ្សាយនៅថ្ងៃ៖
ស្តាប់ - ០២:០៩
យុទ្ធសាស្រ្តឥណ្ឌូប៉ាស៊ីហ្វិក ដែលកាណាដាប្រកាសឲ្យដឹង កាលពីថ្ងៃអាទិត្យនេះ ត្រូវបានលម្អិត នៅក្នុងឯកសារកម្រាស់ ២៦ទំព័រ ដោយនៅក្នុងនោះ ថ្វីដ្បិតតែមានលើកឡើងជាលក្ខណៈទូទៅ អំពីទំនាក់ទំនងជាមួយប្រទេសប្រមាណជា ៤០ ពាក់ព័ន្ធនឹងតំបន់ឥណ្ឌូប៉ាស៊ីហ្វិក ក៏ប៉ុន្តែ ប្រទេសជាអាទិភាពចម្បងបំផុតនៃយុទ្ធសាស្រ្តនេះ គឺប្រទេសចិន ដែលត្រូវបានលើកឡើងរហូតដល់ទៅជាង ៥០ដងឯណោះ។
ក្រៅពីឯកសារ ២៦ទំព័រនេះ សមាជិករដ្ឋាភិបាលរបស់លោក ហ្សូស្តាំង ទ្រុយដូ ក៏បានបញ្ជាក់បន្ថែមផងដែរ អំពីការយកប្រទេសចិនជាអាទិភាពនៃយុទ្ធសាស្រ្តឥណ្ឌូប៉ាស៊ីហ្វិក ដោយរដ្ឋមន្រ្តីក្រសួងការបរទេសកាណាដាបានប្រាប់សារព័ត៌មានថា ចិនគឺជាមហាអំណាចមួយ ដែលកំពុងតែកកូរកកាយពិភពលោកកាន់តែខ្លាំង ដូច្នេះ កាណាដានឹងប្រឈមតទល់ជាមួយនឹងចិន នៅនៅក្នុងគ្រប់សំណុំរឿងណាដែលប្រទេសទាំងពីរមានជំហរផ្ទុយគ្នា។
ក្នុងគោលដៅប្រជែងឥទ្ធិពលជាមួយចិននេះ កាណាដាគ្រោងបង្កើនវត្តមានយោធា តាមរយៈការបង្កើនចំនួននាវាចម្បាំង ដែលត្រូវបញ្ជូនទៅកាន់តំបន់ឥណ្ឌូប៉ាស៊ីហ្វិក ក៏ដូចជា ការបញ្ជូនកងទ័ពឲ្យទៅចូលរួមក្នុងសមយុទ្ធយោធានៅក្នុងតំបន់ រួមជាមួយនឹងប្រទេសសម្ព័ន្ធមិត្តផ្សេងទៀត។
នៅក្នុងស្រុកវិញ កាណាដាក៏គ្រោងផងដែររឹតបន្តឹងការត្រួតពិនិត្យលើវិនិយោគរបស់ចិន ជាពិសេស វិនិយោគរបស់ក្រុមហ៊ុនរដ្ឋចិន ទៅលើវិស័យយុទ្ធសាស្ត្រ ដែលអាចបង្កផលប៉ះពាល់ទៅដល់សន្តិសុខជាតិរបស់កាណាដា ដោយនៅក្នុងនោះក៏មានដែរ ការវិនិយោគទៅលើធនធានរ៉ែយុទ្ធសាស្រ្តរបស់កាណាដា។
ក៏ប៉ុន្តែ នៅក្នុងយុទ្ធសាស្រ្តឥណ្ឌូប៉ាស៊ីហ្វិកនេះ បើទោះជាកាណាដាដាក់អាទិភាពលើការប្រជែងជាមួយនឹងចិន ប្រឈមតទល់ជាមួយនឹងចិននៅក្នុងវិស័យដែលខ្វែងគំនិតគ្នា ប៉ុន្តែក្នុងពេលជាមួយគ្នា កាណាដាក៏បង្ហាញផងដែរ អំពីចេតនាចង់បង្កើនកិច្ចសហប្រតិបត្តិការជាមួយនឹងចិន នៅក្នុងវិស័យណាដែលជាផលប្រយោជន៍រួមសម្រាប់ពិភពលោក រួមមានជាអាទិ៍ ការប្រយុទ្ធប្រឆាំងនឹងការប្រែប្រួលអាកាសធាតុ សំណុំរឿងទាក់ទងនឹងបញ្ហាសុខភាពពិភពលោក ក៏ដូចជា ការប្រយុទ្ធប្រឆាំងនឹងការរីកសាយភាយអាវុធនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ