នាយករដ្ឋមន្ត្រីតៃវ៉ាន់រិះគន់ចិនខ្លាំងៗ ក្រោយចិនចេញវិធានការ ហាមឃាត់ទំនិញតៃវ៉ាន់បន្ថែមទៀត
ចាប់ពីថ្ងៃសុក្រកន្លងមកនេះ រដ្ឋាភិបាលចិនបានចេញវិធានការហាមឃាត់ការនាំចូលទំនិញរបស់តៃវ៉ាន់បន្ថែមទៀត ដែលមានជាអាទិ៍ ភេសជ្ជៈមានជាតិអាល់កុល។ ជាវិធានការរារាំង ដែលត្រូវបានលោករដ្ឋមន្ត្រីកោះតៃវ៉ាន់ ចេញមុខរិះគន់បរិហារចិនយ៉ាងខ្លាំង។ លោកបានអះអាងថា តៃវ៉ាន់នឹងប្តឹងទៅអង្គការពាណិជ្ជកម្មពិភពលោក ព្រោះចិនកំពុងតែបំពាន នឹងវិធានច្បាប់ដោះដូរពាណិជ្ជកម្មដោយសេរី។
ចុះផ្សាយនៅថ្ងៃ៖
ស្តាប់ - ០២:៣៤
យោងតាមក្រសួងហិរញ្ញវត្ថុកោះតៃវ៉ាន់ គឺអាជ្ញាធរគយចិន បានសម្រេចហាមឃាត់ភ្លាមៗ តែម្តង កាលពីថ្ងៃសុក្រទី៩ធ្នូ មិនឲ្យនាំចូលផលិតផលទំនិញភេសជ្ជៈមានជាតិអាល់កុលផលិតនៅតៃវ៉ាន់។ ជាវិធានការដែលអាជ្ញាធរគយចិន បានអនុវត្តដោយអនុឡោម ទៅតាមច្បាប់មួយចេញកាលពីខែមករា ដែលតម្រូវឲ្យក្រុមហ៊ុននាំចូលទំនិញចំណីអាហារ ព្រមទាំងភេសជ្ជៈមានជាតិអាល់កុលទាំងអស់ ត្រូវតែចុះបញ្ជីជាមួយនឹងអាជ្ញាធរគយរបស់ចិន។
ខណៈដែលក្រុមហ៊ុនតៃវ៉ាន់រាប់សិបក្រុមហ៊ុន កំពុងរងចាំនីតិវិធីចុះបញ្ជី ការដែលអាជ្ញាធរចិនចេញវិធានការហាមឃាត់ការនាំចូលទំនិញភ្លាមៗបែបនេះ បានបង្កឲ្យមានការខឹងសម្បារជាខ្លាំង ពីសំណាក់ភាគីតៃវ៉ាន់។ នៅថ្ងៃអាទិត្យទី១១ធ្នូ លោក ស៊ូ សេងឆាង នាយករដ្ឋមន្ត្រីតៃវ៉ាន់បានប្រតិកម្មរិះគន់ខ្លាំងៗ ថាចិនកំពុងតែបំពានទៅនឹងវិធានច្បាប់ដោះដូរពាណិជ្ជកម្មដោយសេរី របស់អង្គការពាណិជ្ជកម្មពិភពលោក។ ជាការបំពានដែលចិនបានធ្វើឡើង តាមរយៈការដាក់កំហិតរារាំងផ្នែករដ្ឋបាល តាមតែចិត្តខ្លួនចង់បាន ដើម្បីរំខានដល់វិស័យពាណិជ្ជកម្មរបស់តៃវ៉ាន់។
នៅចំពោះមុខអ្នកកាសែត លោកនាយករដ្ឋមន្ត្រីតៃវ៉ាន់ បានអះអាងថា តៃវ៉ាន់នឹងដាក់ពាក្យប្តឹងទៅកាន់អង្គការពាណិជ្ជកម្មពិភពលោក ព្រមទាំងជួយក្រុមហ៊ុនតៃវ៉ាន់ ដែលកំពុងតែជួបរឿងអយុត្តិធម៌ទាំងនេះ។ លោកបានបន្ថែមទៀតថា ជានិច្ចជាកាល ចិនតែងតែធ្វើរឿងរំខាន ចាប់ទោសអូសដំណើរខ្លាំងសម្បើមណាស់ មកលើតៃវ៉ាន់ ដោយទាមទារឲ្យធ្វើបែបនេះ ធ្វើបែបនោះ វិលក្បុងតាមតែចិត្តខ្លួន។
សូមរំលឹកថា ជាប្រតិកម្មឆ្លើយតបចំពោះដំណើរទៅដល់របស់លោកស្រីណាន់ស៊ី ប៉េឡូស៊ី ទៅដល់កោះតៃវ៉ាន់ កាលពីខែសីហា ចិនបានធ្វើសមយុទ្ធយោធាទ្រង់ទ្រាយធំ ហាត់សមសំដៅឡោមព័ទ្ធកោះតៃវ៉ាន់។ បន្ថែមពីនេះ រដ្ឋាភិបាលចិន បានចេញវិធានការហាមឃាត់ទំនិញមួយចំនួនរបស់តៃវ៉ាន់ មានដូចជា ផ្លែឈើ និងត្រីជាដើម។
ការហាមឃាត់ភេសជ្ជៈមានជាតិអាល់កុលរបស់តៃវ៉ាន់នាពេលនេះ គឺជាជំហានថ្មីមួយទៀតរបស់ចិន។ យោងតាមបណ្តាញព័ត៌មាន Central News Agency គឺយ៉ាងហោច ស្រាបៀរចំនួន១១យីហោ ក្នុងចំណោម២៨ ដែលចុះបញ្ជីដោយក្រោមហ៊ុនតៃវ៉ាន់ គឺត្រូវបានអាជ្ញាធរចិនហាមឃាត់ឈប់ឲ្យនាំចូល ចាប់ពីថ្ងៃសុក្រទី៩ធ្នូ ក្នុងនោះគឺមានស្រាបៀររបស់ក្រុមហ៊ុនរដ្ឋតៃវ៉ាន់ Taiwan Tobacco & Liquor Corp.។ ភេសជ្ជៈផ្សេងៗទៀត ចំនួន១២៣មុខ ក្នុងចំណោម៣៥៤ របស់តៃវ៉ាន់ ក៏ត្រូវជាប់បំរាមហាមឃាត់នេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ