គម្រោងទំនប់ទឹកដ៏ចម្រូងចម្រាសរបស់ចិន កំពុងគំរាមកំហែងពូជបក្សីបំលាស់ទី
ដោយហេតុមានភាពរាំងស្ងួតខ្លាំងហួសហេតុនៅក្នុងប្រទេសចិន អាជ្ញាធរបានផ្ទុះសន្ទុះដល់គម្រោងសាងសង់ទំនប់ទឹកដ៏ចម្រូងចម្រាសលើបឹងដែលជាប្រភពទឹកសាបដ៏ធំជាងគេនៅក្នុងប្រទេស។ ប៉ុន្តែ អ្នកការពារបរិស្ថាន បានព្រមានថា សំណង់ទំនប់ទឹកលើបឹងPoyang ប៉ូយ៉ាង អាចនឹងគំរាមកំហែងពូជបក្សីហើរមកពីតំបន់ត្រជាក់ និងធ្វើឱ្យប្រព័ន្ធអេកូសាស្ត្រផុយស្រួយ។
ចុះផ្សាយនៅថ្ងៃ៖
ស្តាប់ - ០១:៥៦
ក្នុងរយៈពេល៧០ឆ្នាំមកនេះ ចិនបានសាងសង់ទំនប់លើទំនាបទន្លេយ៉ង់សេ ចំនួនជាង៥ម៉ឺនទំនប់។ ហើយក្នុងរយៈពេលដូចគ្នានេះ ទន្លេបានបាត់បង់អស់ធារទឹករបស់ខ្លួនអស់យ៉ាងហោច៧០%។ នេះបើតាមក្រសួងបរិស្ថានចិន។ ហេតុដូច្នេះហើយបានជាគម្រោងសាងសង់ទំនប់ខ្លះ ជាពិសេសទំនប់លើបឹងទឹកសាបដ៏ធំជាងបង្អស់របស់ចិន ប៉ូយ៉ាង ត្រូវផ្អាក ក្រោយពីមានបណ្តឹងរបស់អ្នកការពារបរិស្ថាន។
ប្រឈមនឹងភាពរាំងស្ងួតឆ្នាំ២០២២ កាន់តែញឹកញយ និងដ៏ធ្ងន់ធ្ងរ មិនធ្លាប់មានក្នុងរយៈពេល៧ទសវត្សរ៍ ព្រោះតែការប្រែប្រួលអាកាសធាតុ អាជ្ញាធរមូលដ្ឋានបានគាស់គម្រោងសាងសង់ទំនប់ឆ្នាំ២០១៦ឡើងវិញ ដើម្បីស្តារទំហំបឹង ទប់ទឹកសម្រាប់ជាប្រយោជន៍កសិកម្មនិងចរាចរណ៍ផ្លូវទឹក។
ប៉ុន្តែសម្រាប់អ្នកការពារបរិស្ថាន ប្រសិនបើគម្រោងសាងសង់ទំនប់ប្រវែងជាងបីពាន់ម៉ែត្រ លេចចេញជារូបរាងមែន នោះប៉ូយ៉ាង នឹងក្លាយបឹងបិទជិត និងគំរាមកំហែងសត្វបក្សីជិតផុតពូជយ៉ាងខ្លាំង។
ការសិក្សាអំពីផលប៉ះពាល់ដល់បរិស្ថានកាលពីខែឧសភា ដែលអ្នកជំនាញមានពេលតែពីរសប្តាហ៍សម្រាប់ត្រួតពិនិត្យឯកសារកម្រាស១២០០ទំព័រ និងប្តឹងតវា បានបង្ហាញថា ទំនប់នេះមិនត្រឹមតែរំខានដល់ចរន្តទឹកហូរជាធម្មជាតិរបស់ទន្លេយ៉ងសេទេ តែថែមទាំងប៉ះពាល់ដល់ជីវិតសត្វបក្សីជាច្រើន ជាពិសេសការគំរាមកំហែងដល់ពពួកបក្សីជិតផុតពូជ មានជាអាទិ៍ សត្វក្រៀល ព្រមទាំងសត្វស្រដៀងផ្សោតរស់ក្នុងទឹកទន្លេយង់សេ ក្នុងចំនួនតែប្រមាណ១ពាន់ក្បាល ដែលតែងតែមករកជម្រកនៅបឹងនេះ នៅរដូវរងារ។
សម្រាប់អង្គការក្រៅរដ្ឋាភិបាល មិត្តសម្លាញ់ធម្មជាតិ ចិន បើគ្មានភស្តុតាងបែបវិទ្យាសាស្ត្រ ច្បាស់លាស់ បញ្ជាក់ថាគ្មានហានិភ័យបរិស្ថានទេ គេមិនត្រូវបន្តគម្រោងសាងសង់ទំនប់ឡើយ។ គ្មានចម្លើយពីអាជ្ញាធរមូលដ្ឋាន និងក្រសួងបរិស្ថានចិន ជុំវិញសំណុំរឿងសាងសង់ទំនប់នេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ