នេប៉ាល់៖ អតីតមេទាហានម៉ៅនិយម ត្រូវតែងតាំងជានាយករដ្ឋមន្ត្រី
នៅប្រទេស នេប៉ាល់ ថ្ងៃអាទិត្យ ទី២៥ធ្នូ អតីតមេទាហានម៉ៅនិយម រហស្សនាម «ប្រាចិន្តា» (Prachanda) ត្រូវ រដ្ឋសភា តែងតាំងឲ្យធ្វើជា នាយករដ្ឋមន្ត្រីថ្មី។ អាយុ ៦៨ ឆ្នាំ លោក ផុស្សផា កាម៉ាល ដាហាល (Pushpa Kamal Dahal ) បានផ្លាស់ប្តូរចលនាបដិវត្តន៍ មកជាបក្សនយោបាយ ហើយ ធ្លាប់កាន់តំណែងនាយករដ្ឋមន្ត្រី រយៈពេលខ្លីៗ ចំនួនពីរដងរួចមកហើយ គឺនៅចន្លោះឆ្នាំ២០០៦-២០០៧ និង ឆ្នាំ២០១៦-២០១៧។ ការបោះឆ្នោតថ្ងៃទី២០វិច្ឆិកា គណបក្សរបស់នាយករដ្ឋមន្ត្រីផុតអាណត្តិ លោក Sher Bahadur Deuba បានបាត់បង់សំឡេងភាគច្រើន មិនអាចនឹងដឹកនាំរដ្ឋាភិបាលចម្រុះបាន។
ចុះផ្សាយនៅថ្ងៃ៖
ស្តាប់ - ០២:០៦
នៅក្រុងកដ្ឋមណ្ឌូ (Katmandou) នាយករដ្ឋមន្ត្រីថ្មីនេប៉ាល់ ជាអតីតជនកុម្មុយនិស្តម៉ៅនិយម និងធ្លាប់ជ្រកខ្លួន ១០ឆ្នាំ នៅក្នុងព្រៃ ដើម្បីធ្វើសង្គ្រាមស៊ីវិល ចន្លោះឆ្នាំ១៩៩៦ ដល់២០០៦។ សង្គ្រាមស៊ីវិលរវាងប្រជាជាតិខ្លួនឯងនេះ បានសម្លាប់អាយុជីវិតពលរដ្ឋនេប៉ាល់ ១៧ ០០០នាក់។ រាជានិយមនេប៉ាល់ ដែលមានអាយុជិត២៤០ឆ្នាំ ត្រូវរំលាយ នៅឆ្នាំ២០០៨។ រយៈពេល ជាង១៤ឆ្នាំចុងក្រោយនេះ រដ្ឋាភិបាលនេប៉ាល់ ប្រទះការផ្លាស់ប្តូរថ្នាក់ដឹកនាំ ១០ លើកហើយ។
ហេតុដូច្នេះហើយ ទើបអ្នកវិភាគស្ថានការណ៍នៅក្នុងតំបន់ បានប្រមើលមើលឃើញថា នេប៉ាល់នៅក្រោមការដឹកនាំរបស់នាយករដ្ឋមន្ត្រីថ្មី ក៏ទំនងជា មិនអាចរក្សាស្ថិរភាពនយោបាយបានយូរឡើយ។ ស្ថិរភាពមិនយូរ ពីព្រោះតែ បក្សកុម្មុយនិស្តម៉ៅនិយមរបស់លោក «ប្រាចិន្តា» នៅមានសំឡេងមិនច្រើនខ្លាំង ដែលត្រូវបន្តនៅជ្រកកោន ក្រោមរដ្ឋាភិបាលចម្រុះ ហើយចំណែក ផ្ទៃក្នុងប្រទេសទៀតសោត ពោរពេញដោយចលនានយោបាយផ្សេងៗគ្នា ប្រទាញប្រទង់គ្នាខ្លាំង រាប់តាំងពី បក្សសម្ព័ន្ធរួបរួមម៉ាក្ស-លេនីន និងបក្សតូចៗជាច្រើន ដែលសុទ្ធតែមានសំឡេងនៅក្នុងសភា ព្រមទាំងបណ្តាអ្នកតំណាងរាស្ត្រឯករាជ ក៏មានច្រើនដែរ។
ក្រៅពីនោះ ទិដ្ឋភាពសេដ្ឋកិច្ចក៏នៅផុយស្រួយ។ ឆ្អឹងខ្នងសេដ្ឋកិច្ច នេប៉ាល់ ពឹងផ្អែកនឹងធនធានក្នុងស្រុកជាមូលដ្ឋានសម្រាប់នាំចេញ និងពឹងផ្អែកមួយផ្នែកសំខាន់ទៀត ទៅលើវិស័យទេសចរណ៍។ ប៉ុន្តែ វិស័យទេសចរណ៍ ត្រូវជួបវិបត្តិធ្ងន់ព្រោះតែជំងឺរាតត្បាលកូវីដ១៩។ នៅពេលនេះ អតិផរណាទំនិញ ច្រើនជាង ៨%។ ទំនិញឡើងថ្លៃលុយធ្លាក់ថោក គឺធ្វើឲ្យ នេប៉ាល់ រងគ្រោះខ្លាំង ជាប់ៗគ្នា ក្នុងរយៈ ៦ ឆ្នាំចុងក្រោយ។ នេប៉ាល់ ជារដ្ឋតូច ឋិតនៅចន្លោះ មហាយក្សចិន និង មហាយក្សឥណ្ឌា និងដែលត្រូវមហាអំណាចគាបទាំងសង្ខាង ចំពោះការនាំចេញទំនិញវត្ថុធាតុដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ