លោក Nate Thayer អ្នកកាសែតអាមេរិក ដែលបានសម្ភាសន៍ប៉ុលពត ស្លាប់ក្នុងអាយុ៦២ឆ្នាំ
អ្នកកាសែតជនជាតិអាមេរិកដ៏ល្បី ឈ្មោះNate Thayer បានស្លាប់កាលពីថ្ងៃទី៤មករា ដោយជំងឺប្រចាំកាយក្នុងអាយុ៦២ឆ្នាំ។ លោកគឺជាអ្នកកាសែតបរទេសដំបូងគេបង្អស់ ដែលបានជួបសម្ភាសន៍កាលពីឆ្នាំ១៩៩៧ ជាមួយមេដឹកនាំខ្មែរក្រហម សាឡុត ស ឬ ប៉ុល ពត បន្ទាប់ពីរបបខ្មែរក្រហមបានដួលរលំ។ នៅក្នុងបទសម្ភាសន៍នោះ ដែលប៉ុល ពត បានឆ្លើយថា ខ្លួនមិនសោកស្តាយអ្វីទាំងអស់ ចំពោះវិនាសកម្មប្រល័យពូជសាសន៍ ដែលរបបខ្មែរក្រហមបានធ្វើមកលើប្រជាជនកម្ពុជា។
ចុះផ្សាយនៅថ្ងៃ៖
ស្តាប់ - ០៣:៣៧
មានរូបរាងខ្ពស់ស្រឡះ ក្បាលកោរសក់រលោងស្រិល លោក Nate Thayer គឺជាអ្នកកាសែតជំនាញរាយការណ៍ផ្នែកសង្គ្រាម និងទ័ពព្រៃ នៅតំបន់អាស៊ី ដ៏ល្បីល្បាញបំផុត ក្នុងអំឡុងទសវត្សឆ្នាំ១៩៩០។ លោក Nate Thayer គឺជាអ្នកកាសែតបរទេសដំបូងបំផុត ដែលបានសម្ភាសន៍ដោយផ្ទាល់ជាមួយ ប៉ុល ពត នៅឆ្នាំ១៩៩៧ បន្ទាប់ពីប៉ុល ពត ត្រូវបានក្រុមខ្មែរក្រហមកាត់ទោស និងដាក់បង្ឃាំងឲ្យនៅក្នុងផ្ទះ។ បទសម្ភាសន៍ ដែលត្រូវបានផ្សព្វផ្សាយ ពាសពេញពិភពលោក មួយឆ្នាំមុនពេលដែល សាឡុត ស ឬ ប៉ុល ពត បានស្លាប់នៅឆ្នាំ១៩៩៨។
លោក Nate Thayer មានដើមកំណើតនៅក្រុងបូស្តុនសហរដ្ឋអាមេរិក។ ឪពុកលោកគឺអតីតអគ្គរដ្ឋទូតសហរដ្ឋអាមេរិក ប្រចាំនៅសិង្ហបុរី។ តាំងតែពីតូច លោក Nate Thayer មាននិស្ស័យចូលចិត្តកាំភ្លើង ចូលចិត្តការប្រយុទ្ធ និងកងទ័ព។ លោកមានអត្តចរិកចង់ដឹងចង់ឮ ចចែសមានះ តស៊ូអត់ធ្មត់សម្រេចកម្មវត្ថុខ្លួន ដោយមិនរាថយនឹងឧបសគ្គ។ គឺដោយសារតែអត្តចរិកអំនត់ ដ៏ស្វិតស្វាញនេះហើយ ដែលបានញ៉ាំងឲ្យលោក អាចសម្រេច ជួបសម្ភាសន៍ជាមួយប៉ុល ពត បន្ទាប់ពីលោកបានព្យាយាមស្វែងរកដាន ស៊ើបសួរដំណឹងគ្រប់ច្រកល្ហក អស់រយៈពេលជិត២០ឆ្នាំ។
ឆ្នាំ១៩៨៤ លោកបានចាប់ផ្តើមសរសេរអត្ថបទកាសែត ពីទីក្រុងបាងកក ក្នុងនាមជាអ្នកកាសែតឯករាជ្យ ឲ្យបណ្តាញព័ត៌មានបារាំង AFP ហើយនៅឆ្នាំ១៩៩១ លោកសរសេរអត្ថបទឲ្យទីភ្នាក់ងារព័ត៌មាន Associated Press និងឲ្យទស្សនាវត្តីហុងកុង Far Eastern Economic Review។ ឆ្នាំ១៩៨៨ លោកបានឈានជើងចូលទឹកដីកម្ពុជាជាលើកទី១ ក្នុងអំឡុងពេលដែលសង្គ្រាមស៊ីវីលកំពុងតែក្តៅគគុក នៅតាមតំបន់ជាយព្រំដែនកម្ពុជា-ថៃ។ ជាការងារផ្សងគ្រោះថ្នាក់ ប្រថុយជីវិតបំផុត ដោយលោកបានឆ្លងកាត់ជម្ងឺគ្រុនចាញ់ធ្ងន់ធ្ងរ ត្រូវគេដឹកទៅសង្គ្រោះបន្ទាន់នៅសហរដ្ឋអាមេរិកជាច្រើនលើកច្រើនសារ។ ឆ្នាំ១៩៩០ ក្នុងពេលធ្វើដំណើរតាមរថយន្តក្នុងព្រៃភាគពាយ័ព្យកម្ពុជា រថយន្តបានបើកកិន ផ្ទុះមីនស្លាប់មនុស្សជាច្រើននាក់។ តែសំណាងល្អ លោកបានរងរបួសធ្ងន់ រងអំបែងគ្រាប់ជាង៣០ដុំ និងបាក់ឆ្អឹងទ្រូងចំនួន៤។
តែទោះជាឧបសគ្គ ផ្សងគ្រោះថ្នាក់យ៉ាងណា លោកនៅតែបន្តត្រលប់ចូលមកកម្ពុជា ដើម្បីប្រមូលព៏ត៌មាន ដោយសង្ឃឹមថា ថ្ងៃណាមួយលោកនឹងបានចូលទៅកៀកបំផុត នឹងមេដឹកនាំខ្មែរក្រហមដែលលាក់ខ្លួនក្នុងព្រៃ។ លោក Nate Thayer បានឆ្លងព្រំដែនមកកម្ពុជាមិនតិចជាង៣៧ដងទេ ដើម្បីស្រង់យកព័ត៌មានដោយផ្ទាល់ ពីកងកម្លាំងទ័ពព្រៃខ្មែរក្រហម ដែលប្រយុទ្ធតទល់ជាមួយកងទ័ពវៀតណាម។ ទីបំផុត ការតស៊ូព្យាយាម បានសម្រេច ដោយលោក Nate Thayer បានជួបសម្ភាសន៍សាឡុត ស ឬប៉ុល ពត នៅឆ្នាំ១៩៩៧ នៅតំបន់អន្លង់វែង។ ជាបទសម្ភាសន៍ដំបូងបំផុត ដែលគេឃើញរូបមេដឹកនាំរបបប្រល័យពូជសាសន៍ខ្មែរក្រហម មានវ័យចាស់ជរា បាត់បង់អស់អំណាចឥទ្ធិពល ត្រូវបក្សពួកខ្លួនបែរខ្នងដាក់ និងបានបង្ឃាំងឲ្យរស់ រងនៅចាំសេចក្តីស្លាប់។
នៅក្នុងបទសម្ភាសន៍មួយ ឲ្យបណ្តាញព័ត៌មាន Associated Press លោក Nate Thayer បានលើកឡើងថា ឆ្លងកាត់កាត់ការតាមដានអស់រយៈពេលជាច្រើនឆ្នាំ គឺវាបានបណ្តាលឲ្យកើតជាទឹកចិត្តទាក់ទាញ ចង់ដឹងលាយឡំដោយកំហឹង និងចម្ងល់រាប់មិនអស់ ថាហេតុអ្វីបានជាប៉ុល ពត បានបង្កវិនាសកម្មប្រល័យជាតិសាសន៍ឯង។ សូមបញ្ជាក់ថា ក្រៅពីសំណុំរឿងខ្មែរក្រហម លោកNate Thayer ក៏ធ្លាប់បានសរសេរអត្ថបទកាសែតជាច្រើន ទាក់ទិននឹងកូរ៉េខាងជើង ព្រមទាំងក្រុមឧទ្ទាមទ័ពព្រៃនៅភូមាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ