របបសឹកភូមាបើកការចរចាជាមួយក្រុមឧទ្ទាមដើម្បីត្រៀមរៀបចំការបោះឆ្នោត
ជិត២ឆ្នាំក្រោយធ្វើរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី មេដឹកនាំរបបសឹកភូមា សន្យារៀបចំការបោះឆ្នោត ដោយសេរី និងយុត្តិធម៌។ តាំងពីថ្ងៃព្រហស្បតិ៍ របបសឹកភូមាបានបើកការពិភាក្សាជាមួយក្រុមឧទ្ទាមជនជាតិភាគតិច ដើម្បីត្រៀមរៀបចំការបោះឆ្នោតសភា នៅក្នុងតំបន់ដែលគ្រប់គ្រងដោយពួកឧទ្ទាម។ ក្រៅពីប្រកាសរៀបចំការបោះឆ្នោត របបសឹកបានដោះលែងផងដែរអ្នកទោស ជាង ៧០០០នាក់ កាលពីថ្ងៃសុក្រ ដែលនៅក្នុងនោះ ៣០០នាក់ជាអ្នកទោសនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
នៅជិត២ឆ្នាំនៃការចូលកាន់អំណាច តាមរយៈការធ្វើរដ្ឋប្រហារទម្លាក់រដ្ឋាភិបាលស៊ីវិលរបបសឹកបានប្រកាសអនុវត្តតាមរដ្ឋធម្មនុញ្ញឆ្នាំ ២០០៨ ដែលចែងពីការរៀបចំបោះឆ្នោត នៅក្រោយវិធានការដាក់ប្រទេសក្នុងស្ថានភាពអាសន្នត្រូវចប់ អស់សុពលភាព។ នៅក្នុងឱកាសប្រារព្ធបុណ្យឯករាជ្យជាតិ កាលពីថ្ងៃពុធ មេដឹកនាំរបបសឹក លោកមីន អ៊ុងឡាំងបានប្រកាសរៀបចំការបោះឆ្នោតសភា ប៉ុន្តែ មិនបានលម្អិតកាលបរិច្ឆេទ។
យ៉ាងណាក៏ដោយគេជឿថា របបសឹកអាចរៀបចំការបោះឆ្នោតនៅឆ្នាំនេះ ព្រោះថា ការដាក់ប្រទេសក្នុងស្ថានភាពអាសន្ន ដែលរបបសឹកចាប់អនុវត្តតាំងពីជិត ២ឆ្នាំនៃរដ្ឋប្រហារ ត្រូវអស់សុពលភាព នៅចុងខែមករា។
នៅថ្ងៃសុក្រ របបសឹកបានបើកការចរចាជាមួយមេដឹកនាំចលនាឧទ្ទាមចំនួន៣ ដើម្បីនិយាយពីការរៀបចំបោះឆ្នោតនៅក្នុងតំបន់គ្រប់គ្រងរបស់ពួកគេ។ តាមអ្នកនាំពាក្យរបស់ចលនាចម្រើននិយមរដ្ឋស្ហានដែលដកស្រង់សំដីដោយទីភ្នាក់ងារព័ត៌មានបារាំង AFP ក្រុមឧទ្ទាមមិនបានប្រឆាំងនឹងការស្នើរបស់កងទ័ពភូមាដែលរៀបចំការបោះឆ្នោតនៅក្នុងតំបន់កាន់កាប់របស់ក្រុមឧទ្ទាម។
ភូមា មានក្រុមឧទ្ទាមប្រមាណ២០ ដែលប្រយុទ្ធគ្នាឯងផង និងប្រយុទ្ធច្បាំងជាមួយកងទ័ពជាតិភូមាផងដើម្បីទាមទារកាន់កាប់តំបន់ដែលមានការជួញដូរគ្រឿងញៀន និងតំបន់ដែលសំបូរវត្ថុធាតុដើម ដូចជារ៉ែ ត្បូងមាសជាដើម។
ក្នុងក្របខ័ណ្ឌនៃការចរចាដើម្បីរៀបចំការបោះឆ្នោត របបសឹកភូមាបានចរចាជាមួយក្រុមឧទ្ទាមយ៉ាងតិច ៨ ដែលនៅក្នុងនោះ មានផងដែរ គណបក្សរួបរួមរដ្ឋវ៉ា នៅជាប់ព្រំដែនចិន ដែលជាក្រុមឧទ្ទាមទ័ពព្រៃធំជាងគេនៅក្នុងពិភពលោក ជាមួយកម្លាំងទ័ពជាង ២៥០០០នាក់។
ក្រុមឧទ្ទាមដែលមេដឹកនាំភូមាបើកការចរចាជាមួយ ជាក្រុមដែលប្រកាសដាក់ខ្លួននៅក្រៅជម្លោះនយោបាយភូមា។ ចំណែកក្រុមឧទ្ទាមផ្សេងទៀត ដូចជាក្រុមឧទ្ទាមការ៉ែនជាដើម ដែលបានចេញមុខប្រឆាំងភ្លាមនឹងការធ្វើរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រីអ៊ុងសាន ស៊ូជី មិនស្ថិតក្នុងបញ្ជីដៃគូចរចារបស់របបសឹក។ គួរបញ្ជាក់ថា បន្ថែមពីលើការបណ្តុះបណ្តាល និងផ្តល់សព្វាវុធដល់កងកម្លាំងការពារប្រជាជនដែលជាកងទ័ពរបស់រដ្ឋាភិបាលស្រមោល ក្រុមឧទ្ទាមការ៉ែនកំពុងជួយក្រុមប្រឆាំងដើម្បីប្រយុទ្ធវាយប្រហារកងទ័ពកងទ័ពភូមា។
អសន្តិសុខ ដោយសារការប្រយុទ្ធគ្នាមិនឈប់រវាងកងទ័ពនិងចលនាប្រឆាំងរដ្ឋប្រហារពិបាកនឹងអាចធ្វើឲ្យភូមាអាចរៀបចំការបោះឆ្នោតសេរី និងយុត្តិធម៌ តាមការប្រកាសរបស់មេដឹកនាំរបបសឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ