ពលរដ្ឋឥណ្ឌូនេស៊ី ប្តឹងក្រុមហ៊ុនស្វីស ឲ្យសងជំងឺចិត្ត ព្រោះតែបំផ្លាញបរិស្ថានអាកាសធាតុ
ពលរដ្ឋឥណ្ឌូនេស៊ី បានប្តឹងក្រុមហ៊ុនស៊ីម៉ង់ត៍ស្វីសមួយ ដែលបានធ្វើសកម្មភាពអាជីវកម្ម នៅ ឥណ្ឌូនេស៊ី និងបានបង្កការខូចខាតដល់បរិស្ថានអាកាសធាតុ និងនាំឲ្យមានទឹកជំនន់។ នៅថ្ងៃទី១កុម្ភៈ តុលាការស្វីស បានបើកសវនាការកាត់ក្តីសំណុំរឿងបរិស្ថានអាកាសធាតុបែបនេះ ជាលើកទី១។ ក្នុងសវនាការ ដើមបណ្តឹង គឺតំណាងដោយអង្គការសង្គមស៊ីវិលស្វីស។
ចុះផ្សាយនៅថ្ងៃ៖
ស្តាប់ - ០២:២៦
ពលរដ្ឋឥណ្ឌូនេស៊ី ៤នាក់ ស្រីម្នាក់ ប្រុសបីនាក់ រស់នៅលើកោះ Pulau Pari ប៉ែកនីរតីនៃរដ្ឋធានីហ្សាការតា បានអះអាងក្នុងពាក្យប្តឹងថា កោះរបស់ខ្លួនបានបាត់បង់ដី និងបាក់ច្រាំងប្រហែល១១% ក្នុងរយៈ១១ឆ្នាំចុងក្រោយ។ ពួកគេប្តឹងក្រុមហ៊ុនស៊ីម៉ង់ត៍ស្វីស ឈ្មោះថា Holcim ដើម្បីទាមទារសំណងជំងឺចិត្ត និងទាមទារឲ្យក្រុមហ៊ុនស្វីសនេះ ចូលរួមដាំដើមឈើ ហើយនិងទាមទារឲ្យក្រុមចេញថ្លៃឧបត្ថម្ភវិធានការចាំបាច់ផ្សេងៗដើម្បីដោះស្រាយបញ្ហាបញ្ជៀសទឹកជំនន់ ព្រមទាំងទាមទារឲ្យក្រុមហ៊ុនគិតគូរកាត់បន្ថយការបំភាយឧស្ម័នកាបូនិកផង។ ក្នុងសំណងរដ្ឋប្បវេណី ប្រជាជនឥណ្ឌូនេស៊ី ទាំង៤នាក់ ប្តឹងទាមទារសំណងទឹកប្រាក់ ក្នុងម្នាក់ៗ ៣ ៦០០ ហ្វ្រង់ស្វីស។ នេះបើតាមមេធាវីតំណាងដើមបណ្តឹង អ្នកស្រី Cordelia Bähr ដែលថ្លែងទៅកាន់ក្រុមអ្នកកាសែត។ ប្រភពស្មាក្តីដដែល បញ្ជាក់ថា ក្នុងអង្គសវនាការ នៅតុលាការខេត្ត Zoug អ្នកតំណាងក្រុមហ៊ុនស៊ីម៉ង់ស្វីស ជាចុងចម្លើយ ពុំបានបកស្រាយឆ្លើយតបអ្វីទេចំពោះការទាមទាររបស់ប្រជាជនឥណ្ឌូនេស៊ី។
ចំណែក ទីភ្នាក់ព័ត៌មានបារាំងAFP បានទាក់ទងសុំការបំភ្លឺពីក្រុមហ៊ុនស៊ីម៉ង់ត៍ស្វីស ហើយទីបំផុតទៅ អ្នកនាំពាក្យតំណាងឲ្យក្រុមហ៊ុន Holcim ឆ្លើយតបថា សកម្មភាពផ្នែកបរិស្ថានអាកាសធាតុ គឺជាស្នូលបេះដូង នៃយុទ្ធសាស្ត្រអាទិភាពរបស់ក្រុមហ៊ុន។ ទន្ទឹមនេះ អ្នកតំណាងឲ្យក្រុមហ៊ុនស្វីស បញ្ជាក់ពីគំនិតថា ពាក្យប្តឹងចំពោះក្រុមហ៊ុនឯកជនតែមួយបែបនេះ គឺមិនអាចចូលរួមដោះស្រាយវិបត្តិអាកាសធាតុសកលលោកទាំងមូល បាននោះឡើយ។ ឆ្លៀតថ្លែងពីផែនការសកម្មភាពរបស់ខ្លួន ក្រុមហ៊ុនស៊ីម៉ង់ត៍ស្វីស Holcim ក៏បានអះអាងប្តេជ្ញាចិត្តកាត់បន្ថយការបំភាយឧស្ម័នកាបូនិក ឲ្យបាន ២៥% ដោយធៀបនឹងការផលិតស៊ីម៉ង់ត៍របស់ខ្លួន ឆ្នាំ២០១៨។
អ្នកជំនាញផ្នែកច្បាប់ស្វីស ដែលជួយផ្តល់ប្រឹក្សាដល់ពលរដ្ឋឥណ្ឌូនេស៊ីដើមបណ្តឹង បានឲ្យដឹងដែរថា ករណីប្តឹងពាក់ព័ន្ធនឹងសំណងផ្នែកបរិស្ថានរបៀបនេះ គឺជាសំណុំរឿងលើកទី១ហើយនៅប្រទេសស្វីស។ សេចក្តីសម្រេចសាលក្រមរបស់តុលាការស្វីស នឹងបង្កើតបានជាយុត្តិសាស្ត្រសាលក្រមគំរូមួយ នៅពេលខាងមុខ។ បណ្តឹងនេះ ទំនងជាត្រូវស៊ីពេលយូរ ប្រើនីតិវិធីវែង ពី ៣ ទៅ ៤ ឆ្នាំ ប្រសិនបើសំណុំរឿងត្រូវអូសបន្លាយឡើងដល់តុលាការកំពូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ