ចិនយល់ព្រមសើរើបំណុល ដើម្បីជួយធានាឲ្យស្រីលង្កាអាចទទួលប្រាក់កម្ចីពីមូលនិធិIMF
នៅក្រោយការចរចាដ៏តឹងតែងអស់រាប់ខែ ស្រីលង្កា នៅទីបំផុតបានទទួលការធានាពីចិន ប្រទេសម្ចាស់បំណុលធំចុងក្រោយ ដែលយល់ព្រមពិនិត្យសើរើបំណុល ដែលស្រីលង្កាជំពាក់ចិន។ ថ្លែងទៅកាន់សភាស្រីលង្កាកាលពីថ្ងៃអង្គារ ទី ៧មីនា លោកប្រធានាធិបតី រ៉ានីល វីក្រេមេស៊ីងហ្កេ និយាយថា នៅក្រោយភាគីចិន ផ្ញើលិខិតធានាអះអាងពីការសើរើប្រាក់បំណុលរបស់ស្រីលង្កាទៅកាន់មូលនិធិរូបិយវត្ថុអន្តរជាតិ IMF ស្រីលង្កាបានបញ្ជូនលិខិត ដែលបញ្ជាក់ជំហររបស់ស្រីលង្កា ក្នុងការអនុវត្តតាមកម្មវិធីរបស់មូលនិធិរូបិយវត្ថុអន្តរជាតិ IMF ជាថ្នូរនឹងការទទួលបានប្រាក់កម្ចី ២,៩ពាន់លានដុល្លារ ពីស្ថាប័នមួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ជាម្ចាស់បំណុលធំជាងគេរបស់ស្រីលង្កា ចិនក្លាយជាប្រទេសម្ចាស់បំណុលទី៣ បន្ទាប់ពី ឥណ្ឌា និងជប៉ុន ដែលយល់ព្រមសើរើប្រាក់បំណុលដែលស្រីលង្កាជំពាក់។ តាមការអះអាងរបស់ប្រធានាធិបតីស្រីលង្កា លោករ៉ានីល វីក្រេមេស៊ីងហ្កេ នៅថ្ងៃចន្ទ ធនាគាររដ្ឋចិន Exim ដែលជាម្ចាស់បំណុល របស់ស្រីលង្កាបានបញ្ជូនលិខិតធានាមួយ ទៅកាន់មូលនិធិរូបិយវត្ថុអន្តរជាតិ IMF ដែលនៅក្នុងនោះ ធនាគារចិនយល់ព្រមសើរើបំណុលប្រមាណ២,៨៣ពាន់លាន ដែលស្រីលង្កាជំពាក់ធនាគារ។
ប្រធានាធិបតីស្រីលង្កាមិនបានលម្អិតខ្លឹមសារនៅក្នុងលិខិតរបស់ធនាគារចិនទៅកាន់មូលនិធិរូបិយវត្ថុIMF។ នៅក្នុងលិខិតមួយ កាលពីខែ មករា ដែលធនាគារផ្ញើទៅកាន់មូលនិធិIMF ប៉ុន្តែ ដែលអ្នកជំនាញវាយតម្លៃថា មិនគ្រប់គ្រាន់ដើម្បីបញ្ចុះបញ្ចូល IMF ធនាគារចិនអះអាងថា ធនាគារយល់ព្រមផ្អាក មិនឲ្យស្រីលង្កាបង់សងប្រាក់បំណុលរយៈពេល ២ឆ្នាំ ប៉ុន្តែ ធនាគារបដិសេធមិនកាត់បន្ថយប្រាក់បំណុលសម្រាប់ស្រីលង្កាឡើយ។
លិខិតធានារបស់ធនាគារចិន នៅថ្ងៃចន្ទដើមសប្តាហ៍នេះ ហាក់មានប្រសិទ្ធិភាព ទៅបញ្ចុះបញ្ចូលមូលនិធិរូបិយវត្ថុអន្តរជាតិ ដែលធ្លាប់បានដាក់លក្ខខណ្ឌថា គ្រប់ប្រទេសម្ចាស់បំណុលទាំងអស់របស់ស្រីលង្កាត្រូវធានាសើរើ កាត់បន្ថយប្រាក់បំណុលរបស់ស្រីលង្កាជាមុនសិន បើចង់ឲ្យមូលនិធិយល់ព្រមផ្តល់ប្រាក់កម្ចី ២,៩ពាន់លានដុល្លារ សម្រាប់ជួយសង្រ្គោះសេដ្ឋកិច្ចរបស់ស្រីលង្កា។
នៅក្នុងសេចក្តីថ្លែងការណ៍ កាលពីថ្ងៃអង្គារ ប្រធាននាយកដ្ឋានអាស៊ី និងប៉ាស៊ីហ្វិក របស់មូលនិធិ IMF លោកKrishna Srinivasan និយាយថា ស្រីលង្កាបានទទួលគ្រប់គ្រាន់ ការធានាផ្នែកហិរញ្ញវត្ថុពីសំណាក់ប្រទេសម្ចាស់បំណុល។ ការធានាដែលនឹងទៅបើកផ្លូវឲ្យមូលនិធិទម្លាក់ប្រាក់កម្ចីសម្រាប់ស្រីលង្កា នៅក្នុងកិច្ចប្រជុំ នៅថ្ងៃទី ២០មីនាខាងមុខ។ សម្រាប់មន្រ្តីIMF ខាងលើ ធានាគារពិភពលោក និងធនាគារអភិវឌ្ឍអាស៊ី នឹងដើរតាមផ្លូវរបស់IMF ដើម្បីផ្តល់ឥណទាន ជួយសង្រ្គោះស្រីលង្កា ដែលកំពុងលង់ខ្លួនក្នុងវិបត្តិបំណុល និងវិបត្តិសេដ្ឋកិច្ច។
ជាប់បំណុលបរទេស ៥១ពាន់លានដុល្លារ ដែលនៅក្នុងនោះ ជាង៧ពាន់លានដុល្លារ ជាបំណុលចិន ស្រីលង្កាខកខាន មិនបានសងបំណុលបរទេស ជាលើកទី ១ កាលពីខែមេសា ឆ្នាំ២០២២។ វិបត្តិកូវីដ និងវិបត្តិនយោបាយ នៅ៣ឆ្នាំចុងក្រោយនេះបានរុញច្រានប្រទេសអាស៊ីខាងត្បូងមួយនេះ ដែលមានប្រជាជន២២លាននាក់ ឲ្យធ្លាក់ក្នុងវិបត្តិសេដ្ឋកិច្ចធ្ងន់ធ្ងរ។ នៅប៉ុន្មានសប្តាហ៍មកនេះ ប្រជាជនស្រីលង្កាដែលជួបបញ្ហាខ្វះប្រេង ថ្នាំពេទ្យ និងទំនិញឡើងថ្លៃកប់ពពក បានចុះថ្នល់ធ្វើបាតុកម្ម ប្រឆាំង វិធានការរឹតបន្តឹងថវិកា របស់រដ្ឋាភិបាលជាពិសេស ការដំឡើងពន្ធ និងការលុបបំបាត់ជំនួយឧបត្ថម្ភរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ