ទស្សនកិច្ចដ៏កម្ររបស់គណៈប្រតិភូភូមានៅបង់ក្លាដែសដើម្បីជួបជនភៀសខ្លួនរ៉ូហ៊ីងយ៉ា
នៅថ្ងៃពុធ ទី១៥ មីនា គណៈប្រតិភូភូមាមួយក្រុមបានធ្វើដំណើរទៅជួបជនភៀសខ្លួនរ៉ូហ៊ីងយ៉ានៅជំរំជនភៀសខ្លួនក្នុងប្រទេសបង់ក្លាដែស។ វត្តមានដ៏កម្រ និងលើកទី១ របស់ក្រុមមន្រ្តីរដ្ឋាភិបាលភូមានៅជំរំជនភៀសខ្លួនក្នុងទឹកដីបង់ក្លាដែលត្រូវបានរដ្ឋអំណាចបង់ក្លាដែសមើលឃើញថា មានគោលដៅព្យាយាមផ្តល់សន្ទុះឡើងវិញនូវផែនការធ្វើមាតុភូមិនិវត្តន៍របស់ពួករ៉ូហ៊ីងយ៉ាទៅភូមាវិញ។
ចុះផ្សាយនៅថ្ងៃ៖
ស្តាប់ - ០២:០៧
គណៈប្រតិភូភូមាមានគ្នាសរុបចំនួន ១៧ នាក់ដឹកនាំដោយមន្ត្រីជាន់ខ្ពស់ម្នាក់របស់ក្រសួងអន្តោប្រវេសន៍ភូមា នេះបើតាមស្នងការរងជនភៀសខ្លួនបង់ក្លាដែសលោកស្ហាមស៊ូដ ឌូហ្សា។ ចំណែកមិត្តរួមការងារម្នាក់របស់លោកស្ហាមស៊ូដ ឌូហ្សាបានបញ្ជាក់ថា គណៈប្រតិភូភូមាបានជួបសំណេះសំណាលជាមួយជនភៀសខ្លួនរ៉ូហ៊ីងយ៉ាជាង ៧០០នាក់ដើម្បីវាយតម្លៃពីភាពសមហេតុផលនៃការវិលត្រឡប់របស់ពួកគេទៅភូមាវិញ។ អ្នកទទួលខុសត្រូវជាន់ខ្ពស់ម្នាក់មិនបញ្ចេញឈ្មោះនៅក្រសួងការបរទេសបង់ក្លាដែសបានថ្លែងថា នេះជាលើកទី១ តាំងពីឆ្នាំ ២០១៧ដែលមានគណៈប្រតិភូភូមាមួយក្រុមបានធ្វើដំណើរទៅជួបសន្ទនាជាមួយជនភៀសខ្លួនរ៉ូហ៊ីងយ៉ាដោយផ្ទាល់នៅក្នុងប្រទេសបង់ក្លាដែស។
អ្នកទទួលខុសត្រូវជាន់ខ្ពស់មិនបញ្ចេញឈ្មោះរូបនេះដដែលសង្ឃឹមថា ការធ្វើមាតុភូមិនិវត្តន៍របស់ជនភៀខ្លួនរ៉ូហ៊ីងយ៉ាអាចធ្វើឡើងនៅមុនរដូវមូសសុងឈានមកដល់ និងថា គ្មានជនភៀសខ្លួនរ៉ូហ៊ីងយ៉ាណាម្នាក់នឹងត្រូវចាប់បញ្ជូនឲ្យត្រឡប់ទៅភូមាវិញដោយបង្ខំនោះទេ។ រីឯនៅភូមា អ្នកនាំពាក្យរបស់របបសឹកបានត្រឹមបញ្ជាក់ពីទស្សនកិច្ចរបស់គណៈប្រតិភូភូមា។ គួររម្លឹកថាក្នុងឆ្នាំ ២០១៧ មានប្រជាជនរ៉ូហ៊ីងយ៉ាជិត ៧០ម៉ឺននាក់បានរត់ចេញពីរដ្ឋរ៉ាឃីនទៅកាន់បង់ក្លាដែសដើម្បីគេចពីការតាមធ្វើទុក្ខបុកម្នេញរបស់កងទ័ពភូមា។ ក្នុងឆ្នាំ ២០១៧ ដដែល ភូមា និងបង់ក្លាដែសបានចុះហត្ថលេខាលើកិច្ចព្រមព្រៀងមួយដើម្បីនាំប្រជាជនរ៉ូហ៊ីងយ៉ាទៅភូមាវិញ។
តែការអនុវត្តន៍ជាក់ស្តែងហាក់មិនចម្រើនទៅមុខ និងបានបន្តទុកឲ្យពួករ៉ូហ៊ីងយ៉ារស់តាមវាសនារបស់ខ្លួននៅក្នុងជំរំជាមួយនឹងជំនួយស្បៀងអាហារដ៏តិចតួច។ ចិនដែលកំពុងដើរតួជាអាជ្ញាកណ្តាលរវាងភូមា និងបង់ក្លាដែសនៅក្នុងរឿងនេះបានធានាក្នុងថ្ងៃអង្គារ ទី១៤ មីនាថា មាតុភូមិនិវត្តន៍ជនភៀសខ្លួនរ៉ុហ៊ីងយ៉ាទៅភូមានឹងចាប់ផ្តើមឆាប់ៗខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ