លោកមេធាវី M.Ravi ត្រូវតុលាការសិង្ហបុរីព្យួរមិនឲ្យប្រកបវិជ្ជាជីវៈ ព្រោះរិះគន់ប្រព័ន្ធយុត្តិធម៌សិង្ហបុរី
លោកមេធាវីសិង្ហបុរីម្នាក់ ឈ្មោះ Ravi Madasamy ដែលល្បីឈ្មោះក្នុងការការពារក្តី ឲ្យជនជាប់ចោទ ដែលប្រឈមនឹងទោសប្រហារជីវិតនោះ ត្រូវបានតុលាការប្រទេសនេះ សម្រេចព្យួរមិនឲ្យប្រកបវិជ្ជាជីវៈ រយៈពេល៥ឆ្នាំ។ តុលាការសិង្ហបុរី បានចោទមេធាវីរូបនេះ ថាបានធ្វើខុសក្រមសីលធម៌ តាមរយៈការនិយាយរិះគន់មកលើប្រព័ន្ធយុត្តិធម៌សិង្ហបុរី ដោយគ្មានមូលដ្ឋាន។
ចុះផ្សាយនៅថ្ងៃ៖
ស្តាប់ - ០២:៤៣
លោកមេធាវី Ravi Madasamy ត្រូវគេស្គាល់ថា គឺជាមេធាវី ដែលតែងតែហ៊ាននិយាយរិះគន់មិនតមមាត់ ទៅលើប្រព័ន្ធយុត្តិធម៌របស់សិង្ហបុរី។ កាលពីឆ្នាំ២០២០ បន្ទាប់ពីបានជ័យជំនះនៅសាលាឧទ្ធរណ៍ ដែលកាត់ក្តីឲ្យកូនក្តីខ្លួនឈ្មោះ Gobi Aveda ជាប់ចោទពីបទរត់ពន់គ្រឿងញៀន ឲ្យរួចផុតពីទោសប្រហារជីវិតនោះ លោកមេធាវី Ravi Madasamy បានប្រកាសថា រដ្ឋអាជ្ញាសិង្ហបុរី មានទម្លាប់ធ្វើការចាស់គម្រិល រឹងរូសខ្លាំងហួសហេតុ នៅក្នុងដំណើរការចោទប្រកាន់ទោស។ លោកថែមទាំងបានទាមទារ ឲ្យរដ្ឋអាជ្ញា ព្រមទាំងរដ្ឋមន្ត្រីក្រសួងយុត្តិធម៌សិង្ហបុរី ថ្លែងសុំទោសកូនក្តីលោកជាសាធារណៈថែមទៀតផង។
គឺពាក្យសំដីទាំងនេះហើយ ដែលត្រូវបានតុលាការសិង្ហបុរី យកជាមូលហេតុ ដើម្បីសម្រេចនៅថ្ងៃទី២១មីនា ព្យួរលោកមិនឲ្យប្រកបវិជ្ជាជីវៈ រយៈពេល៥ឆ្នាំជាប់គ្នា។ តុលាការបានអះអាងថា គ្មានមេធាវីណាម្នាក់ ត្រូវបានអនុញ្ញាត ឲ្យប្រើពាក្យសំដីដែលគ្មានការទទួលខុសត្រូវ រិះគន់មកលើប្រព័ន្ធយុត្តិធម៌សិង្ហបុរី ដោយគ្មានមូលដ្ឋានបានឡើយ។ ទង្វើបែបនេះ វាប៉ះពាល់យ៉ាងខ្លះ មកលើភាពរឹងមាំនៃប្រព័ន្ធយុត្តិធម៌ ក៏ដូចជាទំនុកចិត្តរបស់ប្រជាពលរដ្ឋមកលើប្រព័ន្ធយុត្តិធម៌។
សូមរំលឹកថា នេះមិនមែនជាលើកទី១ទេ ដែលលោកមេធាវី Ravi Madasamy ត្រូវតុលាការសិង្ហបុរីស្តីបន្ទោស។ កាលពីឆ្នាំ២០០៧ លោកធ្លាប់ត្រូវបានតុលាការព្យួរមិនឲ្យប្រកបវិជ្ជជីវៈមេធាវី រយៈពេល១ឆ្នាំ រួចម្តងហើយ បន្ទាប់ពីលោកបានរិះគន់ស្ថាប័នអយ្យការសិង្ហបុរី ព្រមទាំងគំរាមថាលោកចង់ប្តឹង គណមេធាវីសិង្ហបុរី ដែលមិនធ្វើការងារដោយឯករាជ្យ ក្នុងការការពារមេធាវី ពីការគំរាមរបស់រដ្ឋអាជ្ញា។ គួរបញ្ជាក់ដែរ ថាគឺលោកមេធាវី Ravi Madasamy ដែលជាអ្នកការពារក្តី ឲ្យបុរសពិការជនជាតិម៉ាឡេស៊ី ឈ្មោះ Nagaenthran K. Dharmalingam ដែលត្រូវតុលាការសិង្ហបុរីកាត់ទោសប្រហារជីវិត ពីបទមានគ្រឿងញៀនជាប់ខ្លួនត្រឹមប៉ុន្មានក្រាម។ ការប្រហារជីវិត កាលពីខែមេសាឆ្នាំ២០២២ ដែលបានធ្វើឲ្យមានប្រតិកម្មរិះគន់ជាខ្លាំងពីសហគមន៍អន្តរជាតិ ទៅលើប្រព័ន្ធយុត្តិធម៌ដ៏តឹងតែងគ្មានមេត្តារបស់សិង្ហបុរី។
លោកPhil Robertson តំណាងអង្គការ Human Rights Watch ប្រចាំតំបន់អាស៊ី បានលើកឡើងថា នៅលើពិភពលោកនេះ គ្មានប្រទេសប្រជាធិបតេយ្យណា គេព្យួរមេធាវីម្នាក់មិនឲ្យប្រកបវិជ្ជាជីវៈ ដោយគ្រាន់តែមេធាវីនោះនិយាយបញ្ចេញមតិ ពាក់ព័ន្ធនឹងសំណុំរឿងក្តីដែលខ្លួនការពារនោះទេ។ លោកបន្តថា ទង្វើបំបិទសិទ្ធិសេរីភាពរបស់ប្រព័ន្ធយុត្តិធម៌សិង្ហបុរីនេះ គឺវាធ្វើឲ្យប្រទេសក៏ដូចជាសង្គមខ្លួន ដើរថយក្រោយទៅវិញទេ។៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ