ខ្យល់ពុលខ្លាំងពេក អាជ្ញាធរថៃអំពាវនាវឲ្យអ្នករស់នៅក្រុងឈៀងម៉ៃ ត្រូវសំងំនៅក្នុងផ្ទះ
ខ្យល់ពុលក្នុងបរិយាកាសគឺជាបញ្ហាចោទខ្លាំងឡើងៗ នៅក្នុងតាមទីក្រុងធំៗជាច្រើន នៅប្រទេសថៃ ខណៈកំឡុងពេលនេះជារដូវប្រាំងក្តៅហួតហែង ជាមួយនឹងសីតុណ្ហភាពក្តៅខ្លាំងបំផុត។ គិតចាប់ពីថ្ងៃសុក្រ៧មេសាមក ទីក្រុងឈៀងម៉ៃភាគខាងជើងប្រទេសថៃ ត្រូវបានគេចាត់ទុកថាជាទីក្រុងមានខ្យល់ពុលខ្លាំងលើសគេលើពិភពលោក។ យ៉ាងណាមិញ ដោយសារតែកម្រិតល្អងសារធាតុពុលមានយ៉ាងក្រាសនៅក្នុងខ្យល់បរិយាកាសនេះ អាជ្ញាធរក្រុងឈាងម៉ៃ បានអំពាវនាវឲ្យប្រជាជនត្រូវសំងំក្នុងផ្ទះកុំចេញខាងក្រៅ។
ចុះផ្សាយនៅថ្ងៃ៖
ស្តាប់ - ០២:៣២
ផ្សែង ស្រទាប់ល្អងធូលី សារធាតុពុលក្រាស់ឃ្មឹក គ្របដណ្តប់ពេញពីលើទីក្រុងឈៀងម៉ៃ អស់ជាច្រើនថ្ងៃមកហើយ។ កម្រិតខ្យល់ពុលបានកើនឡើងយ៉ាងខ្លាំង ដោយសារមួយផ្នែកមកពីការដុតរានដីធ្វើចំការ របស់កសិករ និងដោយសារភ្លើងឆេះព្រៃស្ថិតនៅមិនឆ្ងាយប៉ុន្មានពីទីក្រុងឈៀងម៉ៃ។ ផ្សែងរថយន្ត និងសកម្មភាពរោងចក្រជាច្រើននៅទីក្រុង ក៏ជាកត្តាគួបផ្សំផងដែរ។
យោងតាមទិន្នន័យរបស់អង្គការស្វ៊ីសតាមដានគុណភាពខ្យល់ដកដង្ហើម IQAir នៅទីក្រុងឈៀងម៉ៃ ថ្ងៃសុក្រទី៧មេសា កម្រឹតល្អងធូលីតូចល្អិត ទំហំ២.៥ PM មានបរិមាណចំនួន ២៩០ មីក្រូក្រាមក្នុងមួយម៉ែត្រគូបខ្យល់។ បរិមាណនេះ គឺមានទំហំលើសពីទំហំអតិបរមា របស់អង្គការសុខភាពពិភពលោក ដល់ទៅ៧០ដងឯណោះ។
ដោយយោងលើបញ្ហានេះ លោក Nirat Pongsittitavorn អភិបាលក្រុងឈៀងម៉ៃ បានចេញសេចក្តីអំពាវនាវ ឲ្យប្រជាពលរដ្ឋត្រូវសំងំនៅក្នុងផ្ទះ ធ្វើការពីផ្ទះ កុំចេញទៅខាងក្រៅ ដើម្បីកាត់បន្ថយហានិភ័យប្រឈមលើសុខភាព ដោយសារតែខ្យល់ពុល។
គួរកត់សំគាល់ថា នេះមិនមែនជាលើកទី១ទេ ដែលទីក្រុងទេសចរណ៍ថៃដ៏ល្បីល្បាញមួយនេះ ស្ថិតនៅលើលំដាប់ជួរមុខគេ ដែលមានកម្រឹតល្អងធូរលីពុលក្នុងខ្យល់បរិយាកាស ច្រើនជាងគេមួយពិភពលោក។ កន្លងមក កម្រឹតខ្យល់ពុលនៅឈៀងម៉ៃ មានលើសទីក្រុងធំៗខ្លះនៅឥណ្ឌា និងនៅចិនថែមទៀត។ ទើបតែក្នុងអំឡុងពេលវិបត្តិកូវីដ១៩ប៉ុណ្ណោះ ដែលប្រជាជនរស់នៅឈៀងម៉ៃបានដកដង្ហើមស្រួលបន្តិច។
សូមបញ្ជាក់ដែរថា ដោយសង្កេតឃើញបញ្ហាសុខភាពប្រឈមគ្រោះថ្នាក់ដោយខ្យល់ពុលនេះ ក្រុមសកម្មជនបរិស្ថានថៃ បានរួមគ្នាដាក់ញត្តិ ស្នើអត្ថបទច្បាប់មួយទៅកាន់សភាថៃ។ សេចក្តីស្នើច្បាប់ដែលមានឈ្មោះថា « ច្បាប់ដើម្បីខ្យល់អាកាសបរិសុទ្ធ » នេះបានដាក់បន្ទុកការទទួលខុសត្រូវទៅឲ្យរដ្ឋាភិបាលថៃ ជាអ្នកដោះស្រាយដើម្បីការពារសុខភាពលរដ្ឋ។ តែយ៉ាងណា សំណើរនេះ ត្រូវបានខុទ្ទការល័យនាយករដ្ឋមន្ត្រីថៃ បដិសេធចំនួន២លើក។ ជាងនេះទៀត ប្រធានបទ « ខ្យល់អាកាសដកដង្ហើមបរិសុទ្ធ » នេះ ត្រូវបានគេយកមកនិយាយវែកញែកឃោសនាតិចតួចបំផុត នៅក្នុងកម្មវិធីឃោសនាបោះឆ្នោតសភា ក្នុង អំឡុងពេលនេះ។ ទន្ទឹមគ្នានេះ យោងតាមក្រសួងសុខាភិបាលថៃ គិតពីដើមខែមករា ដល់ដើមខែមីនាដើមឆ្នាំ២០២៣នេះ មានមនុស្សយ៉ាងហោច២សែននាក់ ដែលបានចូលមន្ទីរពេទ្យដោយសារតែមានបញ្ហាពិបាកដកដង្ហើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ