ចិនហាត់សមឡោមព័ទ្ធតៃវ៉ាន់ ដើម្បីបង្ហាញសមត្ថភាពថាចិនមានកម្លាំងសព្វាវុធទំនើបបាញ់ចំគោលដៅ
ចាប់ពីថ្ងៃសៅរ៍សប្តាហ៍មុនមក កងទ័ពចិនបានបើកការធ្វើសមយុទ្ធយោធាដ៏ធំ ដើម្បីហាត់សមឡោមព័ទ្ធកោះតៃវ៉ាន់។ កាលពីថ្ងៃអាទិត្យម្សិលមិញ កងទ័ពចិនបានហាត់សមបាញ់ប្លោង ទំលាក់គ្រាប់ ចំចំណុចគោលដៅយ៉ាងច្បាស់បំផុត ដែលសុទ្ធតែជាទីតាំងយុទ្ធសាស្ត្រសន្តិសុខ របស់កោះតៃវ៉ាន់។ សមយុទ្ធយោធាដ៏ធំរបស់ចិននេះ និងបន្តនៅថ្ងៃចន្ទនេះទៀត ជាមួយនឹងការហាត់សមបាញ់គ្រាប់ពិតៗតែម្តង។ លោក Peer De Jong អតីតមេបញ្ជាការកងទ័ពបារាំង ហើយបច្ចុប្បន្នជាអនុប្រធានវិទ្យាស្ថានបណ្តុះបណ្តាល Themiis ដើម្បីស្ថិរភាពនិងសន្តិភាព បានលើកឡើងថា សមយុទ្ធយោធារបស់ចិន ហាត់សមឡោមព័ទ្ធនិងវាយប្រហារកោះតៃវ៉ាន់នាពេលនេះ គឺជាបង្ហាញកម្លាំងប្រាប់ទៅតៃវ៉ាន់និងអាមេរិក ថា ចិនមានសមត្ថភាពគ្រឿងសព្វាវុធទំនើប បាញ់ចំគោលដៅយ៉ាងច្បាស់បំផុត។
ចុះផ្សាយនៅថ្ងៃ៖
ស្តាប់ - ០២:៣២
សម្រង់បទវិភាគរបស់លោក Peer De Jong
"ការហាត់សមឡោមព័ទ្ធទាំងស្រុងលើតៃវ៉ាន់ ដែលកងទ័ពចិនកំពុងតែធ្វើនាពេលនេះ គឺមានកម្មវត្ថុ បង្ហាញថា ចិនមានសមត្ថភាព រៀបចំរាំងខ្ទប់ បិទគ្រប់ច្រកទាំងអស់នៅជុំវិញកោះតៃវ៉ាន់។ គឺក្នុងក្របខណ្ឌនេះហើយ បានជាការធ្វើសមយុទ្ធនេះ ចិនបានប្រើ នាវាចម្បាំងជាង១០គ្រឿង ធុនធំៗ ហើយច្រើនប្រភេទ អមពីលើដោយយន្តហោះចម្បាំងជាច្រើនគ្រឿងថែមទៀត។
តំបន់នេះ បើនិយាយជាក់ស្តែងទៅ វាត្រូវបានគេចាត់ទុកថាជាតំបន់របស់អាមេរិកទៅហើយ។ កងពលទី៥នៃកងទ័ពជើងទឹកអាមេរិក ឆ្លងកាត់ចុះឡើងនៅតំបន់នេះ ហើយមានជប៉ុន មានកូរ៉េខាងត្បូង និងតៃវ៉ាន់ទៀត។ និយាយជារួម នៅជំុវិញតៃវ៉ាន់ វាគឺមណ្ឌលជួរមុខ ដែលអាមេរិកគ្រប់គ្រង។ មានន័យថា រាល់ការចូលមករំខាន ពីសំណាក់កម្លាំងរបស់ចិន គឺវាធ្វើផ្អើលរញ្ជួយកម្លាំងកងទ័ពនៅតំបន់នេះទាំងមូល ដែលសុទ្ធតែជាសម្ភារៈសព្វាវុធធន់ធ្ងន់ ព្រោះថាធាតុពិតទៅ អាមេរិកចាត់ទុកមហាសមុទ្រប៉ាស៊ីហ្វិកទាំងមូល សឹងតែដូចរបស់ខ្លួនទាំងអស់ទៅហើយ។ កាលៈទេសៈពេលនេះ អ្វីដែលយើងកំពុងឃើញ គឺការហោះក្រវែលកំញើញគ្នា រវាងឥន្ទ្រីអាេមរិក និងនាគរបស់ចិន នៅក្នុងក្របខណ្ឌមួយដ៏ស្មុគស្មាញ ពិបាកស្មានណាស់។
សមយុទ្ធរបស់ចិន ធ្វើឡើងក្នុងកម្រិត២ព្រមគ្នា។ ទីមួយ គឺការឡោមព័ទ្ធបិទខ្ទប់ ឲ្យកោះតៃវ៉ាន់ឯកាទាំងស្រុង។ ទី២ គឺការកំញើញកម្លាំងប្រាប់ទៅគ្រប់ភាគីផ្សេងទៀត អ្នកណាក៏ដោយដែលចង់មកអន្តរាគមន៍ជួយតៃវ៉ាន់ ឲ្យតែចូលកៀក គឺនឹងត្រូវកំទេចជាស្វ័យប្រវត្តិដោយគ្រឿងសព្វាវុធទំនើបរបស់ចិន។ បន្ថែមពីនេះ ទីតាំងសំខាន់របស់តៃវ៉ាន់ ដែលនឹងរងនូវការវាយប្រហារមុនគេ នៅថ្ងៃផ្ទុះសង្គ្រាមពិត គឺអាចមានហេដ្ឋារចនាសម្ព័ន្ធយុទ្ធសាស្ត្រ ទីបញ្ជាការដ្ឋាន បន្ទាយប្រមូលទ័ព និងប្រព័ន្ធខែលការពារ។ តៃវ៉ាន់ជាកោះតូច តែមានប្រព័ន្ធការងារសំបូរបែប មានបណ្តាញរូងក្រោមដី ហើយចិនក៏ប្រហែលជាកំពុងតែព្យាយាម ប្រមូលព័ត៌មានទាំងអស់នេះដែរ។ ដូច្នេះ ហេដ្ឋារចនាសម្ព័ន្ធយុទ្ធសាស្ត្រទាំងនេះរបស់តៃវ៉ាន់ អាចនឹងក្លាយជាផ្ទាំងស៊ីបដំបូងគេបង្អស់ ដោយចិននឹងប្រើគ្រាប់មីស៊ីលដ៏ទំនើប បាញ់ចំគោលដៅមិនឲ្យខុស។ ពាក្យថាបាញ់ចំគោលដៅច្បាស់ៗនេះ សំខាន់ណាស់ ព្រោះយើងនិយាយអំពី ការបាញ់ចំត្រង់ៗ ខុសយ៉ាងហោច ត្រឹម ១០ ២០ម៉ែត្រពីគោលដៅប៉ុណ្ណោះ។"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ