អាមេរិក៖គ្រាប់មីស៊ីលមួយចំនួនរបស់កូរ៉េខាងជើងជាគ្រាប់មីស៊ីលក្លែងក្លាយ និងមិនដំណើរការ
ឧបទ្វីបកូរ៉េកំពុងបន្តជោរជន់ដោយព័ត៌មានបែកធ្លាយចេញពីមន្ទីរប៉ង់តាហ្គោន។ ទាក់ទងនឹងកូរ៉េខាងត្បូង ព័ត៌មានបានលើកឡើងរឿងរដ្ឋបាលអាមេរិកលួចស្តាប់ទូរស័ព្ទមន្រ្តីជាន់ខ្ពស់របស់ការិយាល័យប្រធានាធិបតីកូរ៉េខាងត្បូង។ ចំណែកទាក់ទងនឹងកូរ៉េខាងជើងវិញ ព័ត៌មានបានលើកឡើងរឿងគ្រាប់មីស៊ីលខ្លះជាគ្រាប់មីស៊ីលក្លែងក្លាយ និងមិនដំណើរការ។ គ្រាប់មីស៊ីលដែលមន្ទីរប៉ង់តាហ្គោនចង់និយាយ គឺគ្រាប់មីស៊ីលដែលក្រុងព្យុងយ៉ាងបានបង្ហាញនាឱកាសក្បួនព្យុះហយាត្រាចុងក្រោយនេះ។
ចុះផ្សាយនៅថ្ងៃ៖
ស្តាប់ - ០១:៥០
នៅក្នុងក្បួនព្យុះហយាត្រាកងទ័ពក្នុងថ្ងៃទី៨ កុម្ភៈដើម្បីអបអរសាទរខួប ៧៥ឆ្នាំនៃការបង្កើតកងទ័ពប្រជាមានិតកូរ៉េ ទីក្រុងព្យុងយ៉ាងបានបង្ហាញគ្រាប់មីស៊ីលបាលីស្ទិកអន្តរទ្វីបដ៏ច្រើនសម្បើមមិនធ្លាប់មាននៅចំពោះមុខវត្តមានមេដឹកនាំលោកគីម ជុងអ៊ុន និងកូនស្រីរបស់លោក។ គ្រាប់មីស៊ីលដែលមិនអាចកំបាំងភ្នែកភ្ញៀវជាតិ និងអន្តរជាតិបាន គឺគ្រាប់មីស៊ីលប្រភេទ Hwasong ចំនួន ១១គ្រាប់។ ជាលក្ខណៈទ្រឹស្តី គ្រាប់មីស៊ីលប្រភេទនេះអាចបំពាក់ក្បាលនុយក្លេអ៊ែរច្រើនគ្រាប់ និងអាចវាយប្រហារលើដែនដីអាមេរិកទាំងមូល។
វត្តមានគ្រាប់មីស៊ីលប្រភេទនេះរបស់កូរ៉េខាងជើងបានធ្វើឲ្យក្រុមអ្នកជំនាញបារម្ភថា ក្រុងព្យុងយ៉ាងអាចនឹងមានសមត្ថភាពខ្លាំងជាងសមត្ថភាពការពារមីស៊ីលរបស់អាមេរិក។ តែការបែកធ្លាយព័ត៌មានពីក្រសួងការពារជាតិអាមេរិកពេលនេះបានទម្លាក់ការគំរាមកំហែងរបស់កូរ៉េខាងជើង។ នេះក៏ដោយសារតែនៅក្នុងចំណោមគ្រាប់មីស៊ីលដែលក្រុងព្យុងយ៉ាងបានបង្ហាញនាឱកាសក្បួនព្យុះហយាត្រាថ្ងៃទី៨ កុម្ភៈ មានភាគច្រើនជាគ្រាប់មីស៊ីលក្លែងក្លាយ និងមិនដំណើរការ។ កម្មវត្ថុរបស់កូរ៉េខាងជើងក្នុងការបង្ហាញរូបភាពគ្រាប់មីស៊ីលដ៏ច្រើននេះ គឺដើម្បីចង់បញ្ជាក់ពីបរិមាណស្តុក និងពីប្រសិទ្ធភាពគ្រាប់មីស៊ីលរបស់ខ្លួន។
មួយវិញទៀត និងបើតាមឯកសារបែកធ្លាយដដែល រដ្ឋបាលអាមេរិកមានមន្ទិលសង្ស័យពីសមត្ថភាពរបស់កូរ៉េខាងជើងក្នុងការផលិតមីស៊ីលដែលអាចដំណើរការ។ មូលហេតុ គឺកង្វះវត្ថុធាតុដើមដោយសារតែប្រទេសជាប់ទណ្ឌកម្មអន្តរជាតិ និងការបិទប្រទេសតាំងពីថ្ងៃផ្ទុះជំងឺឆ្លងកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ