សិង្ហបុរីគ្រោងប្រហារជីវិតអ្នកទោសម្នាក់ ពាក់ព័ន្ធនឹងកញ្ជា១គីឡូក្រាម ខណៈក្រុមគ្រួសារស្រែកដង្ហើយឲ្យលើកលែងទោស
បុរសអាយុ៤៦ឆ្នាំម្នាក់ ឈ្មោះ Tangaraju Suppiah នឹងត្រូវតុលាការសឹង្ហបុរីប្រហារជីវិតនៅថ្ងៃពុធទី២៦មេសាខាងមុខ ដោយជាប់ទោសពីបទចូលរួមក្នុងជួញដូរកញ្ឆា ចំនួន១គីឡូក្រាម។ ការសម្រេចទោស ដែលត្រូវបានក្រុមគ្រួសារ ក៏ដូចជាអង្គការសិទ្ធិមនុស្សរិះគន់ជាខ្លាំង ថាវាមានភាពអមនុស្សធម៌ និងពោរ ពេញដោយចន្លោះប្រហោង។ ក្រុមគ្រួសារអ្នកទោស កំពុងតែព្យាយាមនៅនាទីចុងក្រោយ ដើម្បីអំពាវនាវ ឲ្យមានការលើកលែងទោសប្រហារជីវិត។
ចុះផ្សាយនៅថ្ងៃ៖
ស្តាប់ - ០២:៤៤
ក្រុមគ្រួសារជនជាប់ទោស ឈ្មោះ Tangaraju Suppiah កំពុងតែព្យាយាមស្រែកដង្ហើយ ឲ្យមានការលើកលែងទោសប្រហារជីវិត ដោយអះអាងថា សវនាកាត់ទោស មិនត្រូវបានធ្វើឡើងដោយយុត្តិធម៌ត្រឹមត្រូវនោះទេ។ នៅក្នុងកម្មវិធីសន្និសីទកាសែត នៅថ្ងៃអាទិត្យទី២៣មេសា ក្រុមគ្រួសារអ្នកទោសរូបនេះ បានអះអាងថា Tangaraju Suppiah ជាមនុស្សល្អស្លូតត្រង់ និងមិនដែលធ្លាប់បានប៉ះពាល់ប៉ះពាល់ដោយផ្ទាល់ ជាមួយនឹងកញ្ឆា ដែលសមត្ថកិច្ចសិង្ហបុរីបានចាប់ឃាត់នោះឡើយ។ ជាងនេះទៀត Tangaraju Suppiah ត្រូវបាននគរសិង្ហបុរីសួរចម្លើយ ដោយគ្មានវត្តមានមេធាវី និងដោយគ្មានអ្នកបកប្រែភាសាតាមិលថែមទៀតផង។
យ៉ាងណាក៏ដោយ ការិយាល័យប្រយុទ្ធប្រឆាំងគ្រឿងញៀន បានឆ្លើយតបវិញថា តុលាការបានផ្តល់ឲ្យអ្នកទោសនូវការទំនុកបម្រុងផ្លូវច្បាប់យ៉ាងត្រឹមត្រូវ ដូចមានចែងតាមច្បាប់នីតិវិធីព្រហ្មទណ្ឌ ហើយអ្នកទោសខ្លួនឯង ជាអ្នកដែលមិនបានស្នើសុំឲ្យមានអ្នកបកប្រែ។
សុំបញ្ជាក់ថា បុរសឈ្មោះ Tangaraju Suppiah ដើមកំណើតតាមិល ត្រូវបានតុលាការសិង្ហបុរី ផ្តន្ទាទោសប្រហារជីវិតនៅឆ្នាំ២០១៨ ពីបទចូលរួមក្នុងសកម្មភាពជួញដូរកញ្ឆា ចំនួនប្រមាណជាង១គីឡូក្រាម។ ចៅក្រមតុលាការកំពូលសិង្ហបុរី បានលើកឡើងថា ជនជាប់ចោទគឺជាម្ចាស់លេខទូរស័ព្ទចំនួន២ ដែលបណ្តាញជួញដូរកញ្ឆាបានប្រើប្រាស់។ ដូច្នេះគ្មានអ្វីមកដោះបន្ទុកបានទេ ពោលគឺតុលាការមានអំណះអំណាចផ្លូវច្បាប់គ្រប់គ្រាន់ និងដោយឥតប្រកែកបាន ថាជននេះពិតជាមានទោស។
សូមបញ្ជាក់ថា យោងតាមច្បាប់សិង្ហបុរី ជនណាក៏ដោយ ដែលកាន់កាប់ឬចូលរួមការជួញដូរកញ្ឆាចាប់ពី៥០០ក្រាមឡើងទៅ គឺអាចប្រឈមនឹងទោសប្រហារជីវិត។ តែយ៉ាងណា អង្គការ Amnesty International បានលើកឡើងថា នៅតាមប្រទេសកាន់តែច្រើន ដែលការកាប់និងប្រើប្រាស់កញ្ឆា លែងត្រូវចាត់ទុកថាជាបទល្មើសឧក្រិដ្ឋទៀតហើយ តួយ៉ាងដូចជានៅថៃជាដើម។ ប្រសិនបើសិង្ហបុរីព្យួរកមនុស្សម្នាក់ ដោយសារតែមានពាក់ព័ន្ធនឹងកញ្ឆា១គីឡូក្រាមពិតមែននោះ នោះវាគឺជាទង្វើផ្គើនកំញើញខ្លាំងណាស់ មកលើចលនាគាំទ្រការលុបបំបាត់ទោសប្រហារជីវិតនៅទូទាំងពិភពលោក។
គួរកត់សំគាល់ថា បន្ទាប់ពីបានស្ងប់ស្ងាត់រយៈពេល២ឆ្នាំជាប់គ្នា សិង្ហបុរីបានចាប់ផ្តើមប្រហារជីវិតអ្នកទោសចំនួន១១នាក់ កាលពីឆ្នាំ២០២២កន្លងទៅ ដែលសុទ្ធតែពាក់ព័ន្ធនឹងការជួញដូរគ្រឿងញៀន។ ករណីប្រហារជីវិតបុរសជនជាតិម៉ាឡេស៊ីម្នាក់ Nagaenthran K. Dharmalingam ដែលមានជម្ងឺវិកលចរិក បានបង្កឲ្យមានការរិះគន់យ៉ាងខ្លាំងទៅលើសិង្ហបុរី ថាជាប្រទេសគ្មានធម៌មេត្តា អមនុស្សធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ