អ្នកជំនាញ៖ សំដីអគ្គរដ្ឋទូតចិននៅបារាំង ស្តែងឲ្យឃើញពីគោលជំហរចិន ដែលចង់កែប្រែប្រវត្តិសាស្ត្រ
កាលពីថ្ងៃសុក្រសប្តាហ៍មុន លោក លូ ឆៃយ៍ (Lu Shaye) ឯកអគ្គរដ្ឋទូតចិនប្រចាំនៅបារាំង បាននិយាយសម្តីដែលបង្កឲ្យមានការតវ៉ារិះគន់ជាខ្លាំង នៅក្នុងបទសម្ភាសន៍តាមកញ្ចក់ទូរទស្សន៍បារាំង។ លោកអគ្គរដ្ឋទូតចិន បានលើកឡើងថា "តំបន់គ្រីម៉េ តាមពិតគឺជារបស់រុស្ស៊ីទេពីដើមមក"។ លោកបានបន្ថែមទៀតថា "បណ្តាប្រទេសអតីតសមាជិកសហភាពសូវៀត ពុំមានលក្ខខន្តិកៈជាផ្លូវការ នៅក្នុងច្បាប់អន្តរជាតិនោះទេ ព្រោះថាពុំមានកិច្ចព្រមព្រៀងអន្តរជាតិណាមួយ កំណត់អំពីលក្ខន្តិកៈប្រទេសទាំងនោះ ថាជាប្រទេសអធិបតេយ្យឡើយ។ សំដីនេះ បានបង្កឲ្យមានការរិះគន់យ៉ាងចាស់ដៃ ពីសំណាក់រដ្ឋាភិបាលនៃបណ្តាប្រទេសអឺរ៉ុប តំបន់បាល់ទិក ដែលអតីតសមាជិកសហភាពសូវៀត។
ចុះផ្សាយនៅថ្ងៃ៖
នៅថ្ងៃចន្ទទី២៤មេសា ក្រសួងការបរទេសបារាំង បានកោះហៅអគ្គរដ្ឋទូតចិនខាងលើ ឲ្យចូលបំភ្លឺ ទាក់ទិននឹងសំដីដែលមានខ្លឹមសារ ចង់កែប្រែប្រវត្តិសាស្ត្រ ហើយផ្ទុយនិងការទទួលស្គាល់នៃច្បាប់អន្តរជាតិ។
លោក អេម៉ានុយអែល វែរ៉ុង (Emmanuel Véron) សាស្ត្រាចារ្យជំនាញភូមិសាស្ត្រចិន បានពន្យល់ថា សំដីរបស់អគ្គរដ្ឋទូតចិនប្រចាំនៅបារាំង គឺវាបានបង្ហាញឲ្យឃើញកាន់តែច្បាស់ អំពីចរន្តគំនិត និងគោលជំហររបស់ចិនប៉េកាំង ដែលចង់កែប្រែប្រវត្តិសាស្ត្រ លែងចង់គោរពនូវអ្វីដែលច្បាប់អន្តជាតិ និងអ្វីដែលសហគមន៍អន្តរជាតិបានទទួលស្គាល់កន្លងមក។
សំរង់ប្រសាសន៍លោកសាស្ត្រាចារ្យ Emmanuel Véron ជំនាញភូមិសាស្ត្រនយោបាយចិន
"តាំងតែពីឆ្នាំ១៩៩១ ក្រោយការដួលរលំនៃសហភាពសូវៀត ចិនក្នុងនាមជាសមាជិកអចិន្ត្រៃយ៍ នៃក្រុមប្រឹក្សាសន្តិសុខ បានទទួលស្គាល់នូវអធិបតេយ្យភាព នៃបណ្តាប្រទេសថ្មីៗ អតីតសមាជិកសហភាពសូវៀត ហើយចិនក៏បានចាប់ផ្តើមបើកទំព័រសករាជ្យថ្មី រៀបចំទំនាក់ទំនងការទូតជាមួយប្រទេសទាំងអស់នេះដែរ។
ក៏ប៉ុន្តែ យើងបានសង្កេតឃើញថា ប្រមាណ២០ឆ្នាំចុងក្រោយនេះ ជាពិសេស១០ឆ្នាំកន្លងមកនេះ គោលជំហររបស់ចិនទាក់ទិននឹងអធិបតេយ្យភាព ក៏ដូចជាការទទួលស្គាល់ព្រំដែន គឺមានទំនោរកាន់តែខ្លាំង ខិតទៅរកភាពជាមហាអំណាច ដែលចង់កែប្រែប្រវត្តិសាស្ត្រ។ ពោលគឺមានន័យថាចិនមានទំនោរ កាន់តែចង់បំពាននឹងសណ្តាប់ធ្នាប់ច្បាប់អន្តរជាតិជាធរមាន នៅអង្គការសហប្រជាជាតិ។
សំដីរបស់អគ្គរដ្ឋទូតចិន ទាក់ទិននឹងអធិបតេយ្យភាពរបស់ប្រទេសអតីតសមាជិកប្លុកសង្គមនិយម គឺមានលក្ខណៈមិនច្បាស់លាស់ ពោលគឺចិនមានចេតនាប្រកាន់គោលជំហរស្រពិចស្រពិលបែបនេះតែម្តង។ ខ្ញុំចង់សង្កត់បញ្ជាក់ថា គោលជំហរបែបនេះ គឺវាប្រឆាំងនឹងសណ្តាប់ធ្នាប់អន្តរជាតិ ប្រឆាំងនឹងច្បាប់អន្តរជាតិ។ គោលជំហរចង់កែប្រែប្រវត្តិសាស្ត្របែបនេះ គឺវាជាល្បែងយុទ្ធសាស្ត្ររបស់ចិនប៉េកាំង ដូចគ្នាទៅនឹងគោលជំហររបស់ពូទីន និងក្រេមឡាំងដែរ៕"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ