អូស្ត្រាលីកំណត់គោលការណ៍យោធាឡើងវិញ ដើម្បីទប់ទល់មហិច្ឆតាចិន
នៅថ្ងៃចន្ទទី ២៤មេសា២០២៣នេះ អូស្ត្រាលីបានសើរើមើលកម្មវត្ថុយោធារបស់ខ្លួនឡើងវិញ។ ជាការកែប្រែមនោគមវិជ្ជាការពារជាតិដ៏ចម្បងមួយ ដើម្បីប្រឈមទល់នឹងការពង្រឹងសមត្ថភាពយោធារបស់ចិនផង និងដើម្បីទប់ឥទ្ធិពលចិននៅតំបន់អាស៊ីប៉ាស៊ីហ្វិកផង។ នេះបើតាមការពន្យល់របស់លោកនាយករដ្ឋមន្ត្រីអូស្ត្រាលី ទៅកាន់អ្នកសារព័ត៌មាន។
ចុះផ្សាយនៅថ្ងៃ៖
ស្តាប់ - ០២:០៣
នេះជាលើកទីមួយ គិតតាំងពី៣៥ឆ្នាំមក ដែលអូស្ត្រាលីសម្រេចកែប្រែ និងកំណត់ជាថ្មី នូវបេសកកម្មរបស់កងកម្លាំងយោធាជាតិ។ នេះបើតាមប្រសាសន៍របស់រដ្ឋមន្ត្រីក្រសួងការពារជាតិ ដោយបញ្ជាក់ថា យុទ្ធសាស្ត្រយោធាចាស់លែងស៊ីនឹងកម្មវត្ថុដែលចង់បានហើយ។
យុទ្ធសាស្ត្រយោធាអូស្ត្រាលីថ្មី ឈរលើគោលការណ៍នយោបាយរារាំង ដែលមានទិសដៅ ខ្ទប់គូសត្រូវតាំងពីចម្ងាយ ពោលគឺមុនពួកគេមកដល់ដែនដីអូស្ត្រាលី និងសំដៅពង្រឹងការការពារឆ្នេរផ្នែកខាងជើងរបស់ប្រទេស។
មូលហេតុដ៏សំខាន់មួយទៀត ដែលជំរុញឱ្យក្រសួងការពារជាតិត្រូវសម្របសម្រួលមនោគមន៍ការពារជាតិរបស់ខ្លួនឡើងវិញ គឺដោយសារតែមានការវិវឌ្ឍនៃបរិយាកាសជុំវិញខ្លួន។ ជាក់ស្តែង ការពង្រឹងពង្រីកសមត្ថភាពយោធារបស់ប៉េកាំង ដែលធ្វើឡើងដោយគ្មានតម្លាភាពនិងដោយគ្មានបញ្ជាក់អំពីឆន្ទៈនៃរបស់យុទ្ធសាស្ត្រខ្លួន ចំពោះតំបន់ឥណ្ឌូប៉ាស៊ីហ្វិក។ អ្នកវិភាគយោធាអូស្ត្រាលីតាមសង្កេតមើលចិនបង្កើនមហិច្ឆតាយោធា ទាំងព្រួយបារម្ភនិងមិនទុកចិត្ត ខ្លាចក្រែងការពង្រីកសមត្ថភាពយោធាក្លាយជាកាត់ផ្តាច់អូស្ត្រាលីពីដៃគូពាណិជ្ជកម្ម និងបណ្តាញផ្គត់ផ្គង់ពិភពលោក។ ការទាមទារគ្រប់គ្រងបូរណភាពដែនទឹកក្នុងសមុទ្ទចិនខាងត្បូងរបស់ចិន ជាការគំរាមកំហែងសណ្តាប់ធ្នាប់ពិភពលោក ក្នុងតំបន់ឥណ្ឌូប៉ាស៊ីហ្វិក ជាទូទៅ និងបើនិយាយដោយឡែក គឺជាការប៉ះពាល់ ដែលនាំឱ្យខូចដល់ប្រយោជន៍ជាតិអូស្ត្រាលី។ នេះបើតាមឯកសារដដែល ដោយសង្កត់ធ្ងន់ថា ការប្រកួតប្រជែងយុទ្ធសាស្ត្ររវាងចិននិងសហរដ្ឋអាមេរិក ត្រូវបានចាត់ទុកជាចំណុចសម្គាល់ចម្បងនៃតំបន់និងសម្រាប់សម័យកាលនេះ។
រដ្ឋមន្ត្រីក្រសួងការពារជាតិអូស្ត្រាលីលោក Richard Marles បានប្រកាសទៀតថា អំណើះតទៅ កងកម្លាំងយោធាអូស្ត្រាលី ដែលទើបប្រកាសធ្វើទំនើបកម្មនិងអភិវឌ្ឍនាវាមុជទឹកថ្មីដើរដោយថាមពលនុយក្លេអ៊ែរផងនោះ នឹងមានសមត្ថភាពវាយប្រហាររយៈឆ្ងាយ ទាំងផ្នែកវាយប្រហារដែនគោកនិងដែនអាកាស។ ប៉ុន្តែផែនការទិញយានយន្តចម្បាំង ៤៥០គ្រឿង ត្រូវបានបញ្ចុះមកនៅត្រឹម១២៩គ្រឿងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ