អូស្ត្រាលីបិទមជ្ឈមណ្ឌលថាមពលដើរធ្យូងថ្មដ៏ចំណាស់ជាងគេបំផុត ដើម្បីអាកាសធាតុ
មជ្ឈមណ្ឌលអគ្គីសនីដើរដោយធ្យូងថ្ម ដ៏ចំណាស់ជាងគេបំផុត បានបិទទ្វារជាស្ថាពរ នៅថ្ងៃនេះបន្ទាប់ពីបានដំណើរការអស់រយៈពេលជាង៥០ឆ្នាំ។ នេះគ្រាន់តែជាការចាប់ផ្តើមដំបូងមួយប៉ុណ្ណោះ នៅមានមជ្ឈមណ្ឌលធ្យូងថ្មជាច្រើនផ្សេងទៀតដែលនឹងត្រូវបិទជាបន្តបន្ទាប់តាមក្រោយ។ មូលហេតុមកពី លែងសូវបានចំណូលផង និងមកពីសម្ពាធបង្ខំឱ្យកាត់បន្ថយការបញ្ចេញឧស្ម័នពុលកាបូនិកផង។ ប៉ុន្តែការបិទមជ្ឈមណ្ឌលធ្យូងថ្ម បង្កបង្កើតឱ្យមានក្តីព្រួយបារម្ភយ៉ាងខ្លាំងទាក់ទងនឹងទីផ្សារការងារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
ជាប់ឈ្មោះជាប្រទេសអ្នកផលិតនិងអ្នកនាំចេញធ្យូងថ្មធំជាងបំផុតមួយនៅលើពិភពលោក អូស្ត្រាលីមិនដែលខ្វល់នឹងកាត់បន្ថយសកម្មភាពក្នុងវិស័យធ្យូងថ្មនេះទេ។ ប៉ុន្តែរដ្ឋាភិបាលថ្មីទើបជាប់ឆ្នោត កាលពីឆ្នាំទៅ បានសន្យានាំអូស្ត្រាលីឱ្យរកថាមពលស្អាត កំរិត៨២%នៅឆ្នាំ២០៣០។ អូស្ត្រាលីប្តូរមុខមាត់ទាំងស្រុង ដោយសម្រេចបិទមជ្ឈមណ្ឌលដើរដោយធ្យូងថ្មបន្តិចម្តងៗតែដោយរហ័សរហួន។ ផ្តើមដំបូងគេគឺរោងចក្រLiddell។
ការបិទរោងចក្រអគ្គីសនីដើរដោយធ្យូងថ្មLiddell ដែលធ្លាប់ផ្គត់ផ្គង់ភ្លើងឱ្យរដ្ឋNouvelle Galles du Sudប្រមាណ១០%នៃសេចក្តីត្រូវការ គឺជាការចាប់ផ្តើមបញ្ចប់អំណាចធ្យូងថ្មនៅក្នុងប្រទេសអូស្ត្រាលី។ សាងសង់ឡើងនៅឆ្នាំ១៩៧១ រោងចក្រដ៏ចំណាស់នេះបានក្លាយជាសំណល់មជ្ឈមណ្ឌល លែងសូវមានប្រសិទ្ធភាព បំពុលបរិស្ថាន និងត្រូវការចំណាយច្រើនដើម្បីទ្រទ្រង់ មិនអាចទុកឱ្យដំណើរការបានទៀតទេ ប្រសិនបើរដ្ឋាភិបាលចង់សម្រេចកម្មវត្ថុអាកាសធាតុនោះ។ បន្ទាប់មកនឹងមានការបិទរោងចក្រអគ្គីសនីដើរធ្យូងថ្ម ដ៏ធំជាងគេបង្អស់ឈ្មោះ Eraring ដែលតែវាម្នាក់ឯងបញ្ចេញឧស្ម័នកាបូនិកដល់ទៅ៣%។ រោងចក្រនេះត្រូវបិទនៅឆ្នាំ២០២៥ ពោលគឺ៧ឆ្នាំមុនកាលកំណត់។ មជ្ឈមណ្ឌលដើរដោយធ្យូងថ្មចំនួន៦ ក៏នឹងត្រូវបិទជាបន្តបន្ទាប់យ៉ាងយូរនៅឆ្នាំ២០៣៥ ព្រោះប្រាក់ចំណូលរបស់រោងចក្របានធ្លាក់ចុះជាគំហុកផង ហើយ រដ្ឋាភិបាលមានឆន្ទៈប្រែក្លាយអូស្តា្រលីជាមហាអំណាចផ្នែកថាមពលកើតឡើងវិញផង។
ប៉ុន្តែទោះបីជាវិស័យថាមពលស្អាត កំពុងពេញនិយមនិងមានសន្ទុះខ្លាំងក្លាយ៉ាងណាក៏ដោយ ក៏មិនអាចមិនបំពេញចន្លោះប្រហោងនៃការបិទថាមពលដើរដោយធ្យូងថ្មដែរ។ លោកស្រីចៅហ្វាយក្រុងSigleton បានអះអាងថា "វិស័យថាមពលកើតឡើងវិញ បង្កើតការងារច្រើនក្នុងដំណាក់កាលស្ថាបនា ប៉ុន្តែផ្តល់ការងារតិចនៅថ្ងៃក្រោយ នៅពេលរោងចក្រចាប់ដំណើរការ។ អនាគតទៅនឹងមានការងារតិច ហើយមិនបានកម្រៃខ្ពស់ ដូចការងារក្នុងអណ្តូងរ៉ែទេ"។
ការងារក្នុងផ្នែករ៉ែធ្យូងថ្ម ពុំរងការគំរាមកំហែងឡើយ ព្រោះទោះបីមានអនុសាសន៍ណែនាំរបស់ភ្នាក់ងារអាកាសធាតុនៃអង្គការសហប្រជាជាតិ Giec និងភ្នាក់ងារថាមពលអន្តរជាតិក្តី ក៏រដ្ឋាភិបាលអូស្ត្រាលី នៅតែបន្តអនុញ្ញាតឱ្យធ្វើអាជីវកម្មអណ្តូងរ៉ែធ្យូងថ្មថ្មីៗ នៅក្រោយឆ្នាំ២០៥០ទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ