Meta បានបិទគណនីនៃបណ្តាញដ៏ធំនៅចិន ដែលផ្សព្វផ្សាយព័ត៌មានក្លែងក្លាយតាមបណ្តាញសង្គម
ក្រុមហ៊ុន Meta ដែលជាក្រុមហ៊ុនមេរបស់ Facebook និង Instagram បានអះអាងថា ខ្លួនបានបិទគណនីជាច្រើន ដែលជាប់ពាក់ព័ន្ធជាមួយបណ្តាញមួយនៅចិន។ ជាបណ្តាញដែលបង្កើត និងផ្សព្វផ្សាយព័ត៌មានប្រឌិតក្លែងក្លាយនៅតាមបណ្តាញសង្គម ស្តីពីបញ្ហានយោបាយរសើបៗមួយចំនួននៅអឺរ៉ុប និងនៅសហរដ្ឋអាមេរិកជាដើម។ គណនីខ្លះប្រឌិតព័ត៌មាន ដែលមានលក្ខណៈគាំទ្រ ឬអួតសរសើរពីរដ្ឋាភិបាលចិន។
ចុះផ្សាយនៅថ្ងៃ៖
ស្តាប់ - ០២:២៣
ក្រុមហ៊ុន Meta អះអាងថា យ៉ាងហោចណាស់ មានគណនី Facebook និង Instagram ចំនួនជាង១០០គណនី ដែលត្រូវបានបិទខ្ទប់។ Meta អះអាងថាគណនីទាំងនេះមានប្រភពទីតាំងនៅចិន ជាបណ្តាញផ្សព្វផ្សាយព័ត៌មានប្រឌិតក្លែងក្លាយ ហើយដែលពាក់ព័ន្ធជាមួយគណនីនៅលើបណ្តាញសង្គមផ្សេងទៀតផងដែរ ដូចជា Youtube Telegram Twitter ជាដើម។
ក្រៅពីនេះ Meta ក៏បានបិទគណនីជាង៥០ផ្សេងទៀត ដែលជាប់ពាក់ព័ន្ធនឹងបណ្តាញសង្គមមួយទៀត មានប្រភពនៅចិនដែរ។ នេះបើផ្អែកតាមរបាយការណ៍ប្រចាំត្រីមាស ចេញផ្សាយកាលពីថ្ងៃពុធទី៣ឧសភា របស់ក្រុមហ៊ុនMeta ស្តីពីការគំរាមកំហែងតាមបណ្តាញសង្គម។
យោងតាមរបាយការណ៍ បណ្តាញទាំងអស់នេះ បានប្រើប្រាស់បច្ចេកទេសតាក់ទិកថ្មីៗប្លែកៗ ដែលគេពុំធ្លាប់បានសង្កេតឃើញពីមិនមកនៅចិន។ តួយ៉ាង បណ្តាញទាំងនេះ បានបង្កើតជាក្រុមហ៊ុនផ្សព្វផ្សាយព័ត៌មានដែលមានតែឈ្មោះ ធ្វើសកម្មភាពនៅតាមបណ្តាប្រទេសលោកខាងលិច និងរើសយកអ្នកសរសេរអត្ថបទឯករាជ្យ ពីតាមបណ្តាប្រទេសនានានៅទូទាំងពិភពលោក។ បណ្តាញទាំងនេះ ក៏អាចទទួលបន្ទុកផ្សព្វផ្សាយប្រមូលក្រុមបាតុករ ឬប្រើបច្ចេកទេសឲ្យមនុស្សណែនាំសមាជិកថ្មីជាដើម ដើម្បីទទួលបានកម្រៃឬរង្វាន់។
ក្នុងចំណោមសារ ឬព័ត៌មានក្លែងក្លាយ ដែលបណ្តាញទាំងនេះផ្សព្វផ្សាយ គឺមានភាគច្រើនទាក់ទិននឹងសំណុំរឿងរសើបៗមួយចំនួននៅអឺរ៉ុប និងនៅអាមេរិក ដូចជា បញ្ហាអំពើហិង្សារបស់នគរបាល បញ្ហាឧក្រិដ្ឋកម្ម អសន្តិសុខ និងសិទ្ធិអ្នកស្រលាញ់ភេទដូចគ្នាជាដើម។ ក្រៅពីនេះ វាអាចមានព័ត៌មានប្រឌិតផ្សេងទៀត ដែលគាំទ្រចិន សរសើរចិន ឬនិយាយរិះគន់គោលជំហររបស់ក្រុមប្រទេសលោកខាងលិច ទាក់ទិននឹងសំណុំរឿងខេត្តស៊ីនជាំងជាដើម។
គួរបញ្ជាក់ថា Facebook និង Twitter ត្រូវបានហាមឃាត់ជាផ្លូវការនៅចិន។ បើគេចង់ប្រើវាដោយលួចលាក់ គឺត្រូវតែឆ្លងកាត់ការប្រើបច្ចេកវិទ្យា VPN។ ជាទូទៅ រុស្ស៊ីត្រូវបានគេដឹងថាមានជំនាញ ប្រើប្រាស់បច្ចេកវិទ្យាបង្កើត “Troll” ដើម្បីបំពុលបណ្តាញសង្គម បំពុលមតិសាធារណៈនៅតាមប្រទេសអឺរ៉ុប និងអាមេរិក។ ចិនត្រូវបានអ្នកជំនាញជឿថា មិនសូវមានជំនាញផលិត “Troll”ទេ។
តែយ៉ាងណា យោងតាមរបាយការណ៍ថ្មីរបស់ Meta គឺគេបានរកឃើញថាបណ្តាញផ្សព្វផ្សាយព័ត៌មានក្លែងក្លាយរបស់ចិន គឺកាន់តែមានភាពទំនើប ស្មុគស្មាញចាក់ស្រែស។ កាលពីខែមេសាកន្លងទៅ អាជ្ញាធរអាមេរិក បានអះអាងថា គេបានរកឃើញថាក្រុមភ្នាក់ងារមួយ ធ្វើការបម្រើឲ្យអង្គភាពសន្តិសុខសាធារណៈចិន ដែលបានប្រើប្រាស់បណ្តាញសង្គម ដើម្បីផ្សព្វផ្សាយសារគាំទ្រចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ