តុលាការប៉ាគីស្ថាន ដោះលែងលោកអ៊ីមរ៉ាន់ ខាន់ជាបណ្តោះអាសន្ន និងហាមឃាត់ការចាប់ខ្លួនជាថ្មី២សប្តាហ៍
លោកអ៊ីមរ៉ាន់ ខាន់ អតីតនាយករដ្ឋមន្ត្រីប៉ាគីស្ថាន ដែលត្រូវបានក្រុមទាហានប៉ារ៉ាចាប់ឃាត់ខ្លួន កាលពីថ្ងៃអង្គារ ហើយដែលបានបណ្តាលឲ្យផ្ទុះបាតុកម្មហិង្សា សឹងទូទាងប្រទេសនោះ ពេលនេះត្រូវបានតុលាការ សម្រេចដោះលែងវិញហើយ។ តុលាការ ក្រុងអ៊ីស្លាម៉ាបាត បានប្រកាសដោះលែងលោកអ៊ីមរ៉ាន់ ខាន់ ជាបណ្តោះអាសន្ន រយៈពេល២សប្តាហ៍ ដោយក្នុងកំឡុងពេលនេះ គឺហាមរាល់ការចាប់ខ្លួនលោកសាជាថ្មី។
ចុះផ្សាយនៅថ្ងៃ៖
ស្តាប់ - ០២:៤១
ការចាប់ខ្លួនលោកអ៊ីមរ៉ាន់ ខាន់ ត្រូវបានតុលាការកំពូលប៉ាគីស្ថាន ប្រកាសច្រានចោល កាលពីព្រហស្បតិ៍ទី១១ឧសភា ដោយចាត់ទុកថាជារឿង “ខុសច្បាប់” ព្រោះវាបានធ្វើឡើងនៅក្នុងបរិវេនតុលាការ។ នៅក្រោយការប្រកាសនេះ លោកអ៊ីមរ៉ាន់ ខាន់ ត្រូវបានគេបញ្ជូនខ្លួនមកសាជាថ្មី ចូលទៅកាន់តុលាការក្រុងអ៊ីស្លាម៉ាបាត នៅព្រឹកថ្ងៃសុក្រ ទី១២ឧសភា។ អ្នករាយការណ៍ ព័ត៌មានមានបារាំង AFP ប្រចាំផ្ទាល់នៅអ៊ីស្លាម៉ាត បានឲ្យដឹងថា ក្រុមទាហានប៉ារ៉ា បានយាមល្បាតយ៉ាងព្រោងព្រាត នៅជុំវិញតុលាការ ក្នុងពេលដែលលោកអ៊ីមរ៉ាន់ ខាន់ ត្រូវគេបញ្ជូនខ្លួនមកដល់។
ក្រោយសវនាការ លោក Khawaja Harris មេធាវីម្នាក់ របស់លោកអ៊ីមរ៉ាន ខាន់ បានប្រាប់អ្នកកាសែតថា តុលាការបានសម្រេចដោះលែងលោក អ៊ីមរ៉ាន់ ខាន់ ជាបណ្តោះអាសន្ន រយៈពេល២សប្តាហ៍ និងហាមឃាត់ការចាប់ខ្លួនលោកសារជាថ្មី ក្នុងអំឡុងពេលនេះ។ តែយ៉ាងណាវាពាក់ព័ន្ធតែលើសំណុំរឿងពុករលួយមួយករណីតែប៉ុណ្ណោះ។ មានន័យថា លោកអ៊ីមរ៉ាន់ ខាន់ នៅតែអាចប្រឈមនឹងការចាប់ខ្លួន ក្នុងសំណុំរឿងជាច្រើនផ្សេងទៀត។ យ៉ាងណាមិញ លោករដ្ឋមន្ត្រីក្រសួងមហាផ្ទៃប៉ាគីស្ថាន បានប្រកាសឲ្យដឹងថា នឹងចាប់ផ្តើមបើកនីតិវិធីច្បាប់ លើសំណុំរឿងផ្សេងទៀត ដើម្បីឈានទៅចាប់ខ្លួនលោកអ៊ីមរ៉ាន់ ខាន់។
យោងតាមអ្នកវិភាគ វាមិនមែនជារឿងចម្លែកទេ ព្រោះថានៅប៉ាគីស្ថាន គឺតុលាការ តែងតែត្រូវបានគេប្រើប្រាស់ ដើម្បីចោទប្រកាន់ និងចាប់ខ្លួនគូបដិបក្សនយោបាយយកទៅដាក់គុក។ ហើយអ្នកដែលមានឥទ្ធិពលអំណាច អាចធ្វើបាន គឺមានតែក្រុមយោធាប៉ាគីស្ថានតែប៉ុណ្ណោះ។ យ៉ាងណាមិញ លោកអ៊ីមរ៉ាន់ ខាន់ និងគណបក្សរបស់លោក តែងតែបានចោទជាប្រចាំ ថាគឺក្រុមយោធាប៉ារ៉ាដែលបានប៉ុនប៉ងធ្វើឃាតលោក ហើយពេលនេះ បានប្រើតុលាការ ចោទប្រកាន់លោកជាច្រើនសំណុំរឿង ក្នុងកម្មវត្ថុតែមួយគត់ គឺរារាំងលោកមិនឲ្យចូលរួមនៅក្នុងការបោះឆ្នោត។
សូមរំលឹកថា ការចាប់ខ្លួនលោកអ៊ីមរ៉ាន់ ខាន់ ដោយក្រុមទាហានប៉ារ៉ា កាលពីថ្ងៃអង្គារកន្លងទៅ បានបណ្តាលឲ្យផ្ទុះបាតុកម្មហិង្សា សឹងពាសពេញប្រទេស។ មន្ត្រីនគរបាលជាច្រើនរយនាក់បានរងរបួស ខណៈបាតុករហិង្សាដែលជាអ្នកគាំទ្រលោកអ៊ីមរ៉ាន់ ខាន់ ត្រូវបានចាប់ខ្លួន ចំនួនប្រមាណ៣៥០០នាក់ ភាគច្រើននៅខេត្តប៉េនចាប់។ យ៉ាងហោចណាស់ មានមនុស្ស៩នាក់ បានស្លាប់ ដោយអគ្គិភ័យឆាបឆេះបង្កឡើងដោយក្រុមបាតុករ។ អាជ្ញាធរប៉ាគីស្ថាន បានបិទបណ្តាញអ៊ីនធ័រនិត និងរាំងខ្ទប់មិនឲ្យបណ្តាញសង្គមអាចដំណើរការបាន ដូចជ Facebook YouTube Twitter ជាដើម ដើម្បីទប់ស្កាត់ការផ្សព្វផ្សាយសារជួបជុំគ្នាធ្វើបាតុកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ